އެންވީޑިއާގެ ސީއީއޯ ޖެންސަން ހުއަންގް އާއި ޗައިނާގެ ޖާސޫސެއް ކަމަށް ތުހުމަތު ކުރެވޭ އަންހެނަކާ ދެމެދު އޮތް ގުޅުން އެމެރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ތަހުގީގުކުރަން ފަށައިފި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
މި މައްސަލައާ ގުޅިގެން ހޯމަ ދުވަހު ޓްރަމްޕް ވަނީ ހުއަންގްއާ ފޯނުން ވާހަކަދައްކަވާފަ އެވެ. ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ އެ އަންހެން މީހާއަކީ ޖާސޫސެއްކަން އެނގޭތޯ ހުއަންގްއާ ސުވާލު ކުރެއްވި ކަމަށެވެ. އޭނާއަކީ ޖާސޫސެއްކަން އެއްވެސް ވަރަކަށް އެނގިފައި ނުވާ ކަމަށް ހުއަންގް ވިދާޅުވި ކަމަށާއި، އެ ވާހަކަ ގަބޫލުކުރައްވާ ކަމަށް ޓްރަމްޕް ވިދާޅުވި އެވެ. ހުއަންގް އަކީ އިހުތިރާމް ލިބިގެންވާ ބޭފުޅެއް ކަމަށާއި، މި ތަހުގީގަށް ފަހު އޭނާއަށް މައްސަލައެއް ކުރިމަތިނުވާނެ ކަމަށް އުންމީދު ކުރައްވާ ކަމަށް ވެސް ރައީސް ވިދާޅުވި އެވެ.
މި މައްސަލައިގެ ރިޕޯޓްތައް ފެންމަތިވުމާއެކު ހޯމަ ދުވަހުގެ ހިއްސާގެ ބާޒާރުގައި އެންވީޑިއާގެ އަގުން ގާތްގަނޑަކަށް 250 ބިލިއަން ޑޮލަރު ވަނީ އުނިވެފަ އެވެ. އެއީ އެ ކުންފުނީގެ ހިއްސާގެ އަގުން ގާތްގަނޑަކަށް ހަތަރު ޕަސެންޓުގެ ދަށަށް ދިއުމެކެވެ.
އެންވީޑިއާ އިން ބުނެފައިވަނީ އެލިސް ހުއަންގް ނަމަކަށް ކިޔާ މި އަންހެން މީހާއާ ހުއަންގްއާ އޮތް ގުޅުމުގެ ސަބަބުން ކުންފުނީގެ ސިއްރުތަކަކަށް ނުވަތަ ގައުމީ ސަލާމަތަށް ނުރައްކަލެއް ކުރިމަތިވި ކަމަށް ގަބޫލުކުރާނެ ސަބަބެއް ނެތް ކަމަށެވެ. ނަމަވެސް ކުންފުނިން މިހާރު ދަނީ މިކަމާ ގުޅޭ މިނިވަން ތަހުގީގެއް ހިންގަމުންނެވެ.
އެމެރިކާގެ ޖާސޫސީ އިދާރާތަކުން ގަބޫލުކުރާ ގޮތުގައި އެލިސް ހުއަންގް އަކީ ޗައިނާގެ ސަރުކާރަށް މަސައްކަތްކޮށްދޭ ޖާސޫސެކެވެ. އޭނާއަކީ އެންވީޑިއާއާ ވިޔަފާރީގެ ގުޅުން އޮންނަ ސިންގަޕޫރުގެ ކުންފުންޏެއް ކަމަށްވާ މެގަސްޕީޑްގެ މެނޭޖިން ޑައިރެކްޓަރެވެ.
ނިއުޔޯކް ޓައިމްސް އިން ރިޕޯޓްކޮށްފައިވާ ގޮތުގައި، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ މި ގުޅުމާ ގުޅޭގޮތުން ވޮޝިންގްޓަންގެ އިސް އޮފިޝަލުންނަށް އިންޒާރު ދެއްވާފައެވެ.
ޗައިނާގެ ފޮރިން މިނިސްޓްރީން ވަނީ މި ތުހުމަތުތައް ދޮގުކޮށްފައެވެ. އެ މިނިސްޓްރީން ބުނި ގޮތުގައި މިއީ އެއްވެސް އަސާސެއް ނެތް، ހިޔާލީ ވާހަކަތަކެއް ކަމަށާއި މީގެ ބޭނުމަކީ ޗައިނާގެ އަގު ވައްޓާލުން ކަމަށެވެ.
އާޓިފިޝަލް އިންޓެލިޖެންސް (އޭއައި) އަށް ބޭނުންވާ ޗިޕް އުފެއްދުމުގައި އެންވީޑިއާ އަކީ ދުނިޔޭގެ އެންމެ ކުރީގައި އުޅޭ ކުންފުންޏެވެ. އެމެރިކާ އާއި ޗައިނާއާ ދެމެދު އޮތް ޓެކްނޮލޮޖީގެ ވާދަވެރިކަމުގައި މި ކުންފުނީގެ އުފެއްދުންތަކަކީ ގައުމީ ސަލާމަތާ ގުޅިފައިވާ މުހިންމު އެއްޗެއްގެ ގޮތުގައި އެމެރިކާ ސަރުކާރުން ދެކެއެވެ.
ޖެންސަން ހުއަންގް ވަނީ އޭނާގެ އަނބިމީހާއަށް ވަފާތެރިނުވެވުނު ކަމަށް އެއްބަސްވެ، އާއިލާގެ ކިބައިން މައާފަށް އެދިފައެވެ. އަދި ކުންފުނީގެ ސަލާމަތާއި އެމެރިކާގެ ގައުމީ ރައްކާތެރިކަން ކަށަވަރުކުރުމަށް މަސައްކަތް ކުރައްވާނެ ކަމަށާއި، ތަހުގީގުތަކަށް ފުރިހަމައަށް އެއްބާރުލުން ދެއްވާނެ ކަމަށް އޭނާ ވިދާޅުވިއެވެ. އަންނަ ހަފުތާގައި ކޮންގްރެސްގެ ބައެއް ކޮމިޓީތަކަށް ހާޒިރުވެ، މި މައްސަލައިގައި މައުލޫމާތު ދިނުމަށް ވެސް ހުއަންގްއަށް ވަނީ ދައުވަތު ދީފައެވެ. އެފްބީއައި އިން މި ތަހުގީގާ ގުޅޭގޮތުން ވަކި އެއްޗެއް ބުނަން ވަނީ އިންކާރުކޮށްފައެވެ.
