އިންޑޮނޭޝިއާގެ އެކި ސަރަހައްދުތަކުގައި ރޯވެފައިވާ އަލިފާނުގެ ސަބަބުން ވައި ނުސާފުވެ، ސިއްހީ ނުރައްކާ ބޮޑުވެފައިވާތީ، ދުމުގެ އަސަރު ކުރާ މީހުންނަށް ފަރުވާ ދިނުމަށް ސިންގަޕޫރު ސަރުކާރުން ހާއްސަ ސަބްސިޑީތަކެއް ހޯމަ ދުވަހު ތައާރަފުކޮށްފި އެވެ.
ހަމައެއާއެކު، އަވަށްޓެރި މެލޭޝިއާގެ ބައެއް ސަރަހައްދުތަކުގެ ވައިގެ ފެންވަރު އިންތިހާއަށް ދަށްވުމުގެ ސަބަބުން އެ ގައުމުގެ ބައެއް ސްކޫލްތައް ވަނީ ބަންދުކޮށްފަ އެވެ.
ސްވިޒަލޭންޑުގެ އެއާ ކޮލިޓީ މޮނިޓަރެއް ކަމަށްވާ "އައިކިއު އެއާ" އިން ހާމަކުރި ގޮތުގައި، ހޯމަ ދުވަހު ވެސް ދުނިޔޭގެ އެންމެ ވައި ނުސާފު ސިޓީގެ ގޮތުގައި ރޭންކު ކުރެވިފައި ވަނީ ސިންގަޕޫރެވެ. މިއީ އިންޑޮނޭޝިއާގެ ބޯނިއޯ އަދި ސުމަޓްރާ ރަށްތަކުގައި ރޯވެފައިވާ އަލިފާނުގެ ސަބަބުން އުފެދޭ ވިހަ ދުމުގެ ސަބަބުން ދިމާވެފައިވާ ހާލަތެކެވެ. މި އަލިފާންގަނޑުތައް އިތުރަށް ވަރުގަދަވެފައި ވަނީ "އެލް ނީނޯ" މޫސުމީ ހާލަތުގެ ސަބަބުންނެވެ.
މި އަލިފާންގަނޑުތަކުގެ ސަބަބުން އެ ސަރަހައްދުތަކުގައި ވަރަށް ބޮޑަށް ދުން ބޯވެފައިވާއިރު، ނޭވާލާ ނިޒާމުގެ ބަލިތައް ޖެހިގެން އެތައް ހާސް ކޭސްތަކެއް ވަނީ ރިޕޯޓްކޮށްފަ އެވެ.
ސިންގަޕޫރުގެ ރައްޔިތުންނަށް ދުމުގެ އަސަރުގެ ސަބަބުން ދިމާވާ ސިއްހީ މައްސަލަތަކަށް އަގުހެޔޮކޮށް ފަރުވާ ހޯދޭނެ އިންތިޒާމުތަކެއް އެ ގައުމުގެ ސަރުކާރުން ހޯމަ ދުވަހު ވަނީ ހަމަޖައްސައިފަ އެވެ.
އާދީއްތަ ދުވަހުގެ ރޭ ސިންގަޕޫރުގެ ހެލްތު މިނިސްޓްރީން ނެރުނު ބަޔާނެއްގައި ބުނެފައި ވަނީ، މި ސަބްސިޑީގެ ދަށުން ނޭފަތުގެ އެލާޖީ، ނޭވާހީއްލުން، ބްރޮންކައިޓިސް، ލޮލުގެ ބަލިތައް، ފުއްޕާމޭގެ ދާއިމީ ބަލިތައް އަދި ނޭވާލާ ނިޒާމުގެ މަތީބައިގެ އިންފެކްޝަންތަކާއި އޭގެ ސަބަބުން ދިމާވާ އިތުރު އުނދަގޫތަކަށް ފަރުވާ ދެވޭނެ ކަމަށެވެ.
މި އެހީގެ ދަށުން، ޝަރުތު ހަމަވާ ގިނަ ސިންގަޕޫރު ރައްޔިތުންނަށް ފަރުވާގެ އަގު 10 ސިންގަޕޫރު ޑޮލަރަށް ވުރެ ބޮޑު ނުވާނެ ގޮތަށް ވަނީ ކަނޑައަޅައިފަ އެވެ. އަދި އުމުރުން 67 އަހަރުން މަތީގެ ދޮށީ އުމުރުގެ މީހުންނަށް މި އަގު އުޅެނީ 5 ސިންގަޕޫރު ޑޮލަރުގަ އެވެ.
ސިންގަޕޫރުން އެންމެ ފަހުން މިފަދަ ސަބްސިޑީ ސްކީމެއް ތައާރަފުކުރީ 2015 ވަނަ އަހަރު އެވެ. އެ އަހަރު އިންޑޮނޭޝިއާގެ ޖަންގަލިތަކުގައި ރޯވި އަލިފާނުގެ ސަބަބުން މުޅި ދެކުނު އިރުމަތީ އޭޝިއާގައި ހަފުތާތަކެއް ވަންދެން ވިހަ ދުން ފެތުރި، ގިނަ ބަޔަކު ބަލިވެ، ސްކޫލްތައް ބަންދުކޮށް އަދި ފްލައިޓްތައް ވެސް ކެންސަލް ކުރަން ޖެހުނެވެ.
އަވަށްޓެރި މެލޭޝިއާގެ ވައިގެ ފެންވަރު ކުޑަކޮށް ރަނގަޅުވުމާ ގުޅިގެން ހޯމަ ދުވަހު ގިނަ ސަރަހައްދުތަކެއްގެ ސްކޫލްތައް އަލުން ހުޅުވި ނަމަވެސް، ދެކުނުގެ ޖޮހޯރު ސްޓޭޓާއި، ވެރިރަށް ކުއާލަލަމްޕޫރުގެ ބައެއް ސަރަހައްދުތަކުގެ އިތުރުން ސެލަންގޯރު ސްޓޭޓްގެ ބައެއް ހިސާބުތަކުގައި ސްކޫލްތައް އަދިވެސް ހުރީ ބަންދުކޮށްފަ އެވެ.
ހޫނު މޫސުމުގައި އިންޑޮނޭޝިއާގައި ޖަންގަލިތަކުގައި އަލިފާން ރޯވުމަކީ އާންމުކޮށް ދިމާވާ ކަމެކެވެ. ނަމަވެސް، ފާއިތުވި 40 އަހަރު ތެރޭގައި ރެކޯޑް ކުރެވުނު އެންމެ ވަރުގަދަ "އެލް ނީނޯ"އާ ގުޅިގެން މި އަހަރުގެ އަލިފާންގަނޑުތައް ވަނީ ކުރިއަށް ވުރެ ބޮޑަށް ވަރުގަދަވެފަ އެވެ.
މީގެ އިތުރުން، ދަނޑުވެރިކަން ކުރުމަށްޓަކައި ގަސްތައް އަންދައިގެން ބިން ސާފުކުރުމުގެ ސަބަބުން، ގުދުރަތީ ގޮތުން އަލިފާނުން ރައްކާތެރިވެފައިވާ ބިންތަކުގެ ފެންވަރު ބަދަލުވެފައިވާ ކަމަށް ތަޖުރިބާކާރުން ފާހަގަކުރެ އެވެ.
ގައުމުތަކުގެ ބޯޑަރު ހުރަސްކޮށް ފެތުރެމުންދާ މި ދުމުގެ ސަބަބުން ސަރަހައްދީ ދަތުރުފަތުރަށް ވެސް ވަނީ ބުރޫއަރައިފަ އެވެ.
މެލޭޝިއާގެ ބަޖެޓް އެއާލައިން "ފަޔާފްލައި" އިން ބުނި ގޮތުގައި، ރައްކާތެރިކަމުގެ ފިޔަވަޅެއްގެ ގޮތުން ކުއާލަލަމްޕޫރު ކައިރީގައި އޮންނަ ސުލްތާން އަބްދުލް އަޒީޒް ޝާހް އެއާޕޯޓާއި ސިންގަޕޫރުގެ ސެލެޓާ އެއާޕޯޓާ ދެމެދު ކުރާ ދަތުރުތައް ހޮނިހިރު ދުވަހުން ފެށިގެން ހޯމަ ދުވަހުގެ ނިޔަލަށް ވަނީ ކެންސަލްކޮށްފަ އެވެ.
