މެލޭޝިޔާގެ ކުރީގެ ބޮޑުވަޒީރު މަހާތީރު މުހައްމަދުގެ އަނބިކަނބަލުން ސިތީ ހަސްމާ މުހައްމަދު އަލީ އަވަހާރަވިތާ ދެ ދުވަސް ފަހުން، މަހާތީރު ހޮސްޕިޓަލުގައި އެޑްމިޓްކޮށްފައިވާ ކަމަށް އެމަނިކުފާނުގެ އޮފީހުން ބުނެފި އެވެ.
އުމުރުފުޅުން 101 އަހަރުގެ މަހާތީރު މުހައްމަދު، ކުއާލަލަމްޕޫރުގައި ހުންނަ ނޭޝަނަލް ހާޓް އިންސްޓިޓިއުޓް (އައިޖޭއެން) ގައި އެޑްމިޓްކުރީ ސެޕްޓެމްބަރު 29 ވަނަ ދުވަހުގެ ރޭގެ ވަގުތެއްގަ އެވެ. އެމަނިކުފާނުގެ އެހީތެރިޔާ ސޫފީ ޔޫސުފް ވިދާޅުވީ، މަހާތީރު އެޑްމިޓްކުރީ އޮބްޒަވޭޝަނަށް ކަމަށާއި، ބަލި ދެނެގަތުމަށް ކުރާ ރަސްމީ ތަހުލީލުތަކުގެ ނަތީޖާ ލިބުމުގެ ކުރިން އެޑްމިޓްކުރި ސީދާ ސަބަބެއް އަދި ސާފުނުވާ ކަމަށެވެ.
މަހާތީރުގެ ދަރިކަލުން މުޚްޒާނީ ވިދާޅުވީ ބައްޕާފުޅުގެ ހާލުކޮޅު ރަނގަޅު ކަމަށާއި ކަންބޮޑުވާންޖެހޭ ފަދަ ކަމެއް ނެތް ކަމަށެވެ.
"ބައްޕަ އައިޖޭއެންގައި އެޑްމިޓްކުރީ އޮބްޒަވޭޝަނަށް،" މެލޭޝިޔާގެ ގައުމީ ޚަބަރު ފަތުރާ އެޖެންސީ 'ބާނާމާ' އަށް މުޚްޒާނީ ވިދާޅުވި އެވެ.
"ވޭތުވެދިޔަ ދެ ދުވަހަކީ ބައްޕައަށް ވަރަށް ބޮޑު ނަފްސާނީ ފިއްތުންތަކަކާ ކުރިމަތިލާންޖެހުނު ދުވަސްތަކެއް. މިވަގުތު ބައްޕަގެ ހާލު ރަނގަޅު، ކަންބޮޑުވާންޖެހޭ ފަދަ ހާލަތެއް ނެތް،" މުޚްޒާނީ އިތުރަށް ވިދާޅުވި އެވެ.
ދެ ފަހަރެއްގެ މަތިން ވިހި އަހަރަށް ވުރެ ގިނަ ދުވަހު މެލޭޝިޔާގެ ވެރިކަން ކުރެއްވި މަހާތީރު މުހައްމަދަކީ މީގެ ކުރިން ވެސް ހިތުގެ ބަލިތަކަށް ފަރުވާ ހޯއްދަވައި، ބައިޕާސް އޮޕަރޭޝަންތަކެއް ވެސް ކުރައްވާފައިވާ ބޭފުޅެކެވެ.
ފަހަކަށް އައިސް މަހާތީރު ތަކުރާރުކޮށް ހޮސްޕިޓަލުގައި އެޑްމިޓްކުރަން ޖެހިފައިވާއިރު، އެންމެ ފަހުން އެމަނިކުފާނު އެޑްމިޓްކުރީ މިދިޔަ ޖެނުއަރީ މަހު ވެއްޓިވަޑައިގެން ކަށިގަނޑެއްގައި ރެނދުލުމާ ގުޅިގެންނެވެ.
މަހާތީރުގެ އަނބިކަނބަލުން އަދި އާންމު ސިއްހަތުގެ ދާއިރާގެ މާހިރެއް ކަމަށްވާ ޑޮކްޓަރު ސިތީ ހަސްމާ އަވަހާރަވީ ސެޕްޓެމްބަރު 28 ވަނަ ދުވަހު، އުމުރުފުޅުން 100 އަހަރުގަ އެވެ. އެކަމަނާއަކީ މަހާތީރާއެކު 70 އަހަރު ވަންދެން ކައިވެނި ބައްލަވައިގެން އުޅުއްވި ބޭފުޅެކެވެ.
މެލޭޝިޔާގައި އެންމެ ގިނަ ދުވަހު ބޮޑުވަޒީރުކަން ކުރެއްވި މަހާތީރާއި ސިތީ ހަސްމާ ކައިވެނި ބެއްލެވީ 1956 ވަނަ އަހަރު އެވެ. އެ ދެބޭފުޅުންނަށް ހަތް ބޭފުޅުން ލިބިވަޑައިގެންފައިވެއެވެ.
ސެޕްޓެމްބަރު 28 ވަނަ ދުވަހު ބޭއްވި ސިތީ ހަސްމާގެ ޖަނާޒާގެ ތެރެއިން، އޮކްސިޖަން ހޮޅި ގުޅައި، މޮޓޮރައިޒްޑް ފުރޮޅުލީ ގޮނޑިއެއްގައި އިންނެވި މަހާތީރު ފެނުނީ ވަރަށް ބޮޑަށް މާޔޫސްވެ، ހިތާމައިގައި އިންނަވަނިކޮށެވެ.
މަހާތީރުގެ ސޯޝަލް މީޑިއާ އެކައުންޓްތަކުގައި އާންމުކޮށްފައިވާ ވީޑިއޯއަކުން ފެންނަ ގޮތުގައި، އެކަމަނާ އެ ދުވަހު އަވަހާރަވެދާނެ ކަމަށް އުންމީދު ނުކުރައްވާ ކަމަށް ވިދާޅުވެ، މަހާތީރު ވަނީ މެލޭޝިޔާގެ ކުރީގެ ރަސްގެފާނުގެ އަރިހުގައި ހިތާމަފާޅުކުރައްވާފަ އެވެ.
