ސައުދީ އަރަބިއްޔާގެ ވެރިރަށް ރިޔާދުގެ މަރުކަޒީ މާލީ ސަރަހައްދުގައި ހުންނަ އުސް އިމާރާތެއް ކަމަށްވާ އަރަމްކޯ ޓަވަރަށް ވައިގެ މަގުން ހަމަލާއެއް ދީފި އެވެ.
ހޫތީންގެ ކޮންޓްރޯލް އޮންނަ ސަބާ ނިއުސް އެޖެންސީ މެދުވެރިކޮށް ނެރުނު ބަޔާނެއްގައި، ހޮނިހިރު ދުވަހު ރިޔާދުގެ ވިޔަފާރި ސަރަހައްދަށް އަމާޒުކޮށް ހަމަލާތަކެއް ދީފައިވާކަން ކަށަވަރުކޮށްދީފައިވީ ނަމަވެސް، އަރަމްކޯ ޓަވަރުގެ ނަން އެ ބަޔާނުގައި ވަކިން ފާހަގަކޮށްފައެއް ނުވެ އެވެ.
ސައުދީގެ އެނާޖީ މިނިސްޓްރީން ބުނި ގޮތުގައި އެ ޓަވަރަށް ލިބިފައިވަނީ "ކުޑަ ގެއްލުމެކެވެ." އަދި މި ހަމަލާގައި އެއްވެސް މީހަކު މަރުވެ ނުވަތަ އަނިޔާވެފައި ނުވާ ކަމަށް ވެސް އެ މިނިސްޓްރީން ބުނެފައިވެ އެވެ.
ބީބީސީ ވެރިފައި އިން ތަހުގީގުކޮށް ސައްހަކަން ކަށަވަރުކޮށްފައިވާ ވީޑިއޯ ފުޓޭޖްތަކުން ފެންނަ ގޮތުގައި، އެ އިމާރާތަށް ވަނީ ބޮޑެތި ގެއްލުންތަކެއް ލިބިފަ އެވެ. އެގޮތުން މިސައިލް ނުވަތަ ޑްރޯން ހަމަލާއެއްގެ ސަބަބުން އިމާރާތުގެ އެއް ފަންގިފިލާއަށް ވަރަށް ބޮޑަށް ގެއްލުންވެފައިވާކަން ފާހަގަކުރެވެ އެވެ.
މީގެ އިތުރުން، އެ ހަމަލާގެ ސަބަބުން އެ އިމާރާތުގެ އެކި ފަންގިފިލާތަކުގެ ކުޑަދޮރުތަކުގެ ބިއްލޫރިތައް ތަޅައިގެން ގޮސްފައިވާކަން ވެސް ފެންނަން ހުއްޓެވެ.
ހޫތީން ބުނި ގޮތުގައި ރިޔާދުގެ އެއާޕޯޓަށާއި އަރަމްކޯގެ ތެޔޮ ރައްކާކުރާ މަރުކަޒުތަކަށް ވެސް ވަކިވަކިން ހަމަލާތަކެއް ވަނީ ދީފަ އެވެ. ނަމަވެސް ސައުދީ އަރަބިއްޔާއިން ބުނީ އެ ގައުމުގެ ވައިގެ ދިފާއީ ނިޒާމުން ބައެއް މިސައިލްތައް ހުއްޓުވައި ނައްތާލާފައިވާ ކަމަށެވެ.
މިއީ ޔަމަނުގައި ހަރަކާތްތެރިވާ ހޫތީ ހަނގުރާމަވެރި ގުރޫޕުން ސައުދީ އަރަބިއްޔާގެ އެތެރޭގެ އަމާޒުތަކަށް ދިން އެންމެ ފަހުގެ ހަމަލާތަކެވެ. ފަހަކަށް އައިސް މިފަދަ ހަމަލާތައް ހުއްޓުވުމަށް ސައުދީން ދަނީ ބޮޑެތި ގޮންޖެހުންތަކަކާ ކުރިމަތިލަމުންނެވެ.
މި ހަމަލާތައް ދީފައި މިވަނީ، ސައުދީ އިސްވެ އޮންނަ ކޯލިޝަނުން ޔަމަނަށް ދިން ވައިގެ ހަމަލާއެއްގައި އަންހެނުންނާއި ކުޑަކުދިން ހިމެނޭހެން މަދުވެގެން 33 މީހުން މަރާލާފައިވާ ކަމަށް ހޫތީން ތުހުމަތުކުރިތާ އެއް ދުވަސް ފަހުންނެވެ.
ހޫތީން ހިންގާ އަލް މަސީރާ ޓީވީ ޗެނަލުން ދެއްކި ފުޓޭޖްތަކުން ފެންނަ ގޮތުގައި، ޔަމަނުގެ ވެރިރަށް ސަނާގެ އިރުމަތީގައި އޮންނަ އަލް-ޝާރިއްޔާ ނަމަކަށް ކިޔާ ރަށެއްގެ ބައެއް އިމާރާތްތަކުގެ ކުނިތަކުގެ ދަށުން މީހުންގެ ހަށިތައް ނެގުމުގެ މަސައްކަތް މީހުން ސަލާމަތްކުރާ ފަރާތްތަކުން ދިޔައީ ކުރަމުންނެވެ.
ސަބާ ނިއުސް އެޖެންސީން ރިޕޯޓުކޮށްފައިވާ ގޮތުގައި އެ ހަމަލާގައި 39 މީހަކަށް ވަނީ އަނިޔާވެފަ އެވެ. ނަމަވެސް މިކަމާ ގުޅޭ ގޮތުން ސައުދީ އަރަބިއްޔާއިން އެއްވެސް އެއްޗެއް ބުނެފައެއް ނުވެ އެވެ.
ބައިނަލްއަގުވާމީ ގޮތުން ބަލައިގެންފައިވާ ޔަމަނުގެ ސަރުކާރުގެ ދިފާއުގައި، ސައުދީ އިސްވެ އޮންނަ ކޯލިޝަނުން ހޫތީންނާ ހަނގުރާމަކުރާތާ މިހާރު ދިހަ އަހަރަށް ވުރެ ގިނަ ދުވަސް ވެއްޖެ އެވެ. ޔަމަނުގެ ބޮޑު ސަރަހައްދެއްގެ ކޮންޓްރޯލް މިހާރު އޮތީ ހޫތީންގެ އަތްދަށުގަ އެވެ.
ފާއިތުވި އަހަރުތަކުގައި މި ހަނގުރާމަ ކޮންމެވެސް ވަރަކަށް މަޑުޖެހިފައި އޮތް ނަމަވެސް، އީރާނުގެ ހަނގުރާމަ ފެށުނު ފަހުން ކުރިމަތިލުންތައް ވަނީ އަލުން ވަރުގަދަވެފަ އެވެ.
ނުރަސްމީ ގޮތުން ގާއިމުކޮށްފައި އޮތް ހަމަލާ ބަދަލުކުރުން ހުއްޓާލުމުގެ އެއްބަސްވުން މިދިޔަ ޖުލައި މަހު އުވާލީ، އީރާނުގެ މަދަދުލިބޭ ހޫތީން ސައުދީ އަރަބިއްޔާއާ ދެކޮޅަށް "ކަނޑުގެ ދަތުރުފަތުރުގެ ދަތިކުރުމުގެ ފިޔަވަޅުތަކެއް" އިއުލާނުކޮށް، ސައުދީގެ އެއާޕޯޓްތަކަށާއި ތެޔޮ މަރުކަޒުތަކުގެ އިތުރުން ރަތްކަނޑުން ދަތުރުކުރާ ތެޔޮ ޓޭންކަރުތަކަށް މިސައިލާއި ޑްރޯން ހަމަލާތައް ދޭން ފެށުމުންނެވެ.
ހޫތީން ބުނާ ގޮތުގައި އެމީހުން ހަމަލާ ދެނީ ސައުދީން އެމީހުންގެ ސަރަހައްދުތައް ބަންދުކޮށްފައިވާތީ އެކަމުގެ ބަދަލުހިފުމުގެ ގޮތުންނެވެ. އަދި ސަނާ އެއާޕޯޓަށް ސައުދީން ދިން ވައިގެ ހަމަލާއަކީ އީރާނުގެ ބޯޓެއް އެތަނަށް ޖެއްސުން ހުއްޓުވުމަށް ދިން ހަމަލާއެއް ކަމަށް ސައުދީން ވަނީ ބުނެފަ އެވެ.
މި ހަމަލާތަކާ ގުޅިގެން، ހޫތީންނާއި ސައުދީގެ އެހީތެރިކަން ލިބޭ ޔަމަނުގެ ސަރުކާރު ސިފައިންނާ ދެމެދު ވަރުގަދަ ހަނގުރާމައެއް ވަނީ އަލުން ފެށިފަ އެވެ.
އދ. އިން ހާމަކޮށްފައިވާ ގޮތުގައި، ހަނގުރާމަ އަލުން ފެށުނު ފަހުން މިހާތަނަށް 1,600 އަށް ވުރެ ގިނަ މީހުން މަރުވެ، 300,000 އަށްވުރެ ގިނަ މީހުން ވަނީ ގެދޮރު ދޫކޮށް ހިޖުރަކުރަން ޖެހިފަ އެވެ.
