އާރުއެމްއެސް ޓައިޓޭނިކް ކަނޑަށް ނެރެ ޓެސްޓުކުރި ދުވަސްވަރު އެ ބޯޓުގެ ހަލް އިންޝުއަރެންސް ކޮށްފައިވާ ލެޖަރުގެ މިހާތަނަށް ފެންނަން އޮތް ހަމައެކަނި ކޮޕީ ނީލަމެއްގައި ވިއްކާލަން ނިންމައިފި އެވެ.
މި އިންޝުއަރެންސް ޕޮލިސީއަކީ އެ ބޯޓު އިންޝުއަރެންސް ކުރި މައިގަނޑު އެއް ކުންފުނި ކަމަށްވާ އެޓްލާންޓިކް މިއުޗުއަލް އިންޝުއަރެންސް ކޮމްޕެނީގެ ދަށުން، ބޯޓުގެ ދަގަނޑު ހަލްއަށް 100،000 ޑޮލަރުގެ ކަވަރޭޖެއް ދީފައިވާ ލިޔުމެކެވެ.
މި އެއްބަސްވުމުގައި ސޮއިކޮށްފައިވަނީ 27 މާރިޗު 1912 ގައެވެ. އެއީ ނިއުޔޯކަށް ކުރި ފުރަތަމަ ދަތުރުގައި ބޯޓު އަޑިއަށް ގޮސް، އޭގައި ތިބި 1،500 މީހުން މަރުވި ހާދިސާގެ އެންމެ 19 ދުވަސް ކުރި އެވެ. ބޯޓު އަޑިއަށް ދިޔަތާ 30 ދުވަސް ނުވަނީސް އިންޝުއަރެންސްގެ ފައިސާ ވަނީ ދައްކާ ހަލާސްކޮށްފަ އެވެ.
ހެންރީ އެލްޑްރިޖް އެންޑް ސަން އޮކްޝަނިއާސްގައި މި ލިޔުން ނީލަން ކިޔުމަށް ހަމަޖެހިފައިވަނީ ނޮވެމްބަރު 21 ގައެވެ. އުންމީދު ކުރެވޭ ގޮތުގައި މި ލިޔުން 30،000 އާއި 50،000 އިނގިރޭސި ޕައުންޑާ ދެމެދުގެ އަގަކަށް ވިކޭނެ އެވެ.
އެމެރިކާގައި 1838 ވަނަ އަހަރު އުފެއްދި އެޓްލާންޓިކް މިއުޗުއަލް ކުންފުންޏަކީ 19 ވަނަ ގަރުނުގެ މެދުތެރެއާ ހަމައަށް އައިއިރު އުތުރު އެމެރިކާގައި އޮތް ކަނޑުދަތުރުފަތުރާއި އާންމު އިންޝުއަރެންސްގެ އެންމެ ބޮޑު ކުންފުންޏެވެ.
މި އިންޝުއަރެންސް ޕޮލިސީ ނަގާފައިވަނީ ޓައިޓޭނިކްގެ މައި ކުންފުނި ކަމަށްވާ އޯޝަނިކް ސްޓީމް ނެވިގޭޝަން ކޮމްޕެނީންނެވެ.
ގަބޫލުކުރެވޭ ގޮތުގައި، ޓައިޓޭނިކް އިންޝުއަރެންސް ކުރި ކުންފުނިތަކުގެ ތެރެއިން ވަކިވަކި ކުންފުނިތަކަށް ބަލާއިރު، އެންމެ ބޮޑު ކަވަރޭޖެއް ދީފައިވަނީ މި ކުންފުނިންނެވެ.
މިއަދުގެ އަގުން ބަލާނަމަ ގާތްގަނޑަކަށް 3.5 މިލިއަން ޑޮލަރުގެ އަގުހުރި މި ޕޮލިސީއަކީ 30 މާރިޗު 1912 އިން ފެށިގެން އެއް އަހަރު ދުވަހުގެ މުއްދަތަށް ދީފައިވާ ކަވަރޭޖެކެވެ.
ނީލަން ކުރިއަށްގެންދާ ކުންފުނީގެ ވެބްސައިޓުގައި ބުނެފައިވަނީ، ޓައިޓޭނިކްގެ އަސްލު އިންޝުއަރެންސް ޕޮލިސީއެއް، ވަކިން ހާއްސަކޮށް އެ ބޯޓު އިންޝުއަރެންސް ކުރި މައި ކުންފުނީގެ ލިޔުމެއް މީގެ ކުރިން ވިއްކާފައިވާ ކަމުގެ އެއްވެސް ރެކޯޑެއް ފެންނަން ނެތުމުން، މިއީ އަގުނުކުރެވޭ ފަދަ ތަފާތު ލިޔުމެއް ކަމަށެވެ.
އެޓްލާންޓިކް މިއުޗުއަލް ކުންފުންޏަކީ ނިއުޔޯކަށް ދިން 9/11 ގެ ޓެރަރިސްޓް ހަމަލާތަކާ ގުޅިގެން ލިބުނު ގެއްލުންތަކުގެ ބަދަލު ދިނުމުގައި ވެސް މުހިންމު ދައުރެއް އަދާކުރި ކުންފުންޏެކެވެ.
ނަމަވެސް، އެންމެ ފަހުން އެ ކުންފުނީގެ އިންޝުއަރެންސް ލައިސަންސްތައް ބާތިލުކޮށް، 2011 ވަނަ އަހަރު ވަނީ ކުންފުނި އުވާލާފަ އެވެ.
