މިސްރުގެ ޖީޒާ ކައިރީގައި ހިނގި ރޭލު އެކްސިޑެންޓެއްގައި މަދުވެގެން ހަތް މީހުން މަރުވެ، 100 އަށް ވުރެ ގިނަ މީހުން ޒަހަމްވެއްޖެ އެވެ.
އެ ގައުމުގެ ރޭލުވޭ އޮތޯރިޓީން ބުނި ގޮތުގައި، ޖީޒާ އާއި ގާހިރާއިން ފުރައިގެން ދަތުރުކުރި ދެ ރޭލެއް ޖެހި ހިނގި މި ހާދިސާގައި، ރޭލުގެ ބައެއް ބައިތައް ދަގަނޑު މަތިން ކަހާލައިގެން ގޮސް އަރިމަތީގައި އޮތް އަޑިގަނޑަކަށް ވަނީ ވެއްޓިފަ އެވެ.
ކުއްލި ހާލަތުގައި އެހީތެރިކަން ފޯރުކޮށްދޭ ފަރާތްތަކުން ބޮޑު އޮޕަރޭޝަނެއް ފަށާފައިވާއިރު، އާންމުން ދަނީ ބަންޑުން ޖަހާލާފައިވާ ރޭލުގެ ބައިތަކުގެ ތެރޭގައި ތިބި ޒަހަމްވި މީހުން ހޯދުމުގެ މަސައްކަތް ކުރަމުންނެވެ.
މިސްރުގެ ރައީސް އަބްދުލް ފައްތާޙް އަލް-ސީސީ ވިދާޅުވީ، މި ހާދިސާ ހިނގަން މެދުވެރިވި ސަބަބުތައް ތަހުގީގުކޮށް، އިހުމާލުވި ކޮންމެ ފަރާތެއް ޖަވާބުދާރީ ކުރުވުމަށް ދައުލަތުގެ ކަމާބެހޭ އިދާރާތަކަށް އަމުރުކުރައްވާފައިވާ ކަމަށެވެ.
އެ ގައުމުގެ ޕަބްލިކް ޕްރޮސެކިއުޓަރުގެ އޮފީހުން ވަނީ މި ހާދިސާގައި މަރުވި މީހުންގެ އަދަދު އިތުރުވުން އެކަށީގެންވާ ކަމުގެ އިންޒާރު ދީފަ އެވެ.
ސަރުކާރުން ބުނި ގޮތުގައި، ގިނަ އަދަދެއްގެ ބަޔަކަށް އެއްފަހަރާ ފަރުވާ ދޭންޖެހުމާ ގުޅިގެން އެ ސަރަހައްދުގެ ހޮސްޕިޓަލްތައް ވަނީ "ހައި އެލާޓް" އަށް ގެނެސްފަ އެވެ.
މި އެކްސިޑެންޓުގައި މަރުވި މީހުންގެ ތެރޭގައި އެއް ރޭލުގެ ޑްރައިވަރު ހިމެނޭކަން ހެލްތު މިނިސްޓްރީން ވަނީ ކަށަވަރުކޮށްދީފަ އެވެ.
މި ހާދިސާ ހިނގާފައިވަނީ ޖީޒާއިން ފުރައިގެން ގާހިރާގެ ދެކުނުން އޮންނަ ފައްޔޫމަށް ދަތުރުކުރި ފުރަތަމަ ރޭލު، ގާހިރާއިން ފުރައިގެން އަސްވާނަށް ދަތުރުކުރަނިކޮށް މަޑުކޮށްގެން އޮތް ދެވަނަ ރޭލެއްގެ ފަހަތުގައި ޖެހިގެންނެވެ.
