މިއަންމާގެ އަސްކަރީ ވެރިޔާ މިން އަންގް ހްލައިންއާ އެކު ވެފައިވާ އެއްބަސްވުމެއްގެ ދަށުން، ހިމާޔަތަށް އެދިފައިވާ މިޔަންމާގެ 5000 މީހުން އަނބުރާ ގައުމަށް ފޮނުވާލުމުގެ މަސައްކަތް މެލޭޝިއާ ސަރުކާރުން ފަށައިފި އެވެ.
މި އެއްބަސްވުމުގެ ދަށުން އަނބުރާ ފޮނުވާލާ ފުރަތަމަ 1،476 މީހުން ގޮވައިގެން މިއަންމާގެ ކަނޑުގެ ސިފައިންގެ ތިން މަނަވަރެއް މިއަދުގެ ވަގުތެއްގައި މެލޭޝިއާއިން ފުރުމަށް ވަނީ ހަމަޖެހިފަ އެވެ.
އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ވަނީ މި ނިންމުން ކުށްވެރިކޮށްފަ އެވެ. އެ ޖަމާއަތްތަކުން ބުނާ ގޮތުގައި އަނބުރާ ފޮނުވާލާ މީހުންނަށް މިއަންމާގައި އަނިޔާވެރިކަމާއި، ފުރައްސާރައާއި، އަދި މަޖުބޫރުން އަސްކަރިއްޔާއަށް ވެއްދުން ފަދަ ނުރައްކާތަކާ ކުރިމަތިލާން ޖެހޭނެ އެވެ.
މެލޭޝިއާ ސަރުކާރުން ބުނާ ގޮތުގައި މިއީ އެމީހުން އަމިއްލައަށް އެދިގެން ކުރިއަށްގެންދާ ކަމެކެވެ. ނަމަވެސް، ބަންދު މަރުކަޒުތަކުގައި ތިބި މި މީހުންގެ ހާލަތު ބަލައި ދެނެގަތުމަށް އދ. ގެ ރެފިއުޖީ އެޖެންސީއަށް މެލޭޝިއާއިން ވަނީ ހުރަސް އަޅާފަ އެވެ.
މެލޭޝިއާގެ ބޮޑުވަޒީރު އަންވަރު އިބްރާހީމް ވިދާޅުވި ގޮތުގައި، އަނބުރާ ފޮނުވާލާ މީހުންގެ ތެރޭގައި ރޮހިންޔާ މުސްލިމުން ވެސް ހިމެނެ އެވެ. ރޮހިންޔާ މީހުންނަކީ މިއަންމާގެ ރައްޔިތުންގެ ގޮތުގައި ބަލައިނުގަތުމުގެ ސަބަބުންނާއި އެ ގައުމުން ބޭރުކޮށްލުމާ ގުޅިގެން، ގިނަ އަދަދަކަށް މެލޭޝިއާއަށް ހިޖުރަކޮށް ހިމާޔަތް ހޯދަމުންދާ ބައެކެވެ.
މި އަހަރުގެ ތެރޭގައި މަގުބޫލުކަން ވަރަށް ބޮޑަށް ދަށަށް ގޮސްފައިވާ އަންވަރު އިބްރާހީމް ވިދާޅުވީ، މެލޭޝިއާގައި ތިބި ގިނަ އަދަދެއްގެ ރޮހިންޔާ މީހުންނާ މެދު އާންމު ރައްޔިތުންގެ މެދުގައި އޮތް ނުރުހުން އިތުރުވަމުންދާތީ، އެމީހުން އަނބުރާ ފޮނުވާލުމަށް މިއަންމާ ސަރުކާރާ އެކު މަޝްވަރާ ކުރުން ނޫން އިތުރު ގޮތެއް ނެތް ކަމަށެވެ.
