މެޑްރިޑް (ނޮވްމެބަރު 8) - ސްޕެނިޝް ލީގުގައި ރޭ ކުޅުނު މެޗުން ވެލެންސިއާ އަތުން 3-0 އިން މޮޅުވެ، ރެއާލް މެޑްރިޑުން ލީގުގެ އެއް ވަނައިގައި އޮތް ބާސެލޯނާއާ ޕޮއިންޓުން އެއްވަރުކޮށްފި އެވެ.
ބާސެލޯނާ، އެއް ވަނައިގައި އޮތީ 11 މެޗުން 30 ޕޮއިންޓް ހޯދައިގެންނެވެ. ލީގުގައި ޖެހިޖެހިގެން ހޯދި ހަތަރު ވަނަ މޮޅާ އެކު، ދެ ވަނައިގައި އޮތް ރެއާލް މެޑްރިޑަށް ވަަނީ 12 މެޗުން 30 ޕޮއިންޓް ލިބިފަ އެވެ. ތިން ވަނައިގައި އޮތް އެތުލެޓިކޯ މެޑްރިޑަށް 11 މެޗުން ވަނީ 28 ޕޮއިންޓް ލިބިފަ އެވެ. ބާސެލޯނާ އިން މިރޭ ކުޅޭނީ ލީގުގެ ތިން ވަނައިގައި އޮތް އެތުލެޓިކޯ މެޑްރިޑާ އެވެ.
ވެލެންސިއާ ދަނޑުގައި ރޭ ކުޅުނު މެޗުގެ 28 ވަނަ މިނިޓްގައި ރެއާލުން ލީޑުނެގީ ފެޑެރީކޯ ވަލްވޭޑޭ ޖެހި ގޯލުންނެވެ. މިއީ، ހިލޭޖެހުމަކުން ކީލިއަން އެމްބާޕޭ ޖެހި ބޯޅައެއް ދެ ވަނަ ފަހަރަށް ކުޅުމުގެ ތެރެއަށް އައި ވަގުތު އޭރިއާބޭރުން ގޯލުގެ ތިރީ ކަނަށް ބޯޅަ ފޮނުވާލައިގެން ވަލްވޭޑޭ ޖެހި ގޯލެކެވެ.
މެޗުގެ 36 ވަނަ މިނިޓްގައި ރެއާލުން ލީޑުފުޅާކޮށްފަ އެވެ. މިއީ، ޖޫޑް ބެލިންހަމްގެ އެޓޭކެއްގައި ވެލެންސިއާގެ އޭރިއާތެރެއިން ލިބުނު ފުރުސަތެއްގައި އާޑާ ގުލާ ވޮލީ އަކުން ޖެހި ގޯލެކެވެ. ރެއާލްގެ ތިން ވަަނަ ލަނޑު ޖެހީ އެމްބާޕޭ އެވެ. އޭނާ މި ލަނޑު ޖެހީ މެޗުގެ 75 ވަނަ މިނިޓްގަ އެވެ. މިއީ، މި ފަހަރުގެ ލީގުގައި އެމްބާޕޭ ޖެހި 13 ވަނަ ގޯލެވެ.
ރެއާލުން ހަތަރު ވަނަ ގޯލެއް ޖަަހަން ކުރި އެޓޭކެއްގައި، އެމްބާޕޭ ހުސްކޮށް ބޯޅަ ހިފައިގެން ދިޔަ ވަގުތެއްގައި އޭނާ އަށް ކުރި ފައުލަކާ ގުޅިގެން ވެލެންސިއާގެ ހޯސޭ ގާޔާ އަށް ވަނީ ރަތެއް ދައްކައިފަ އެވެ. ކުޅުންތެރިއަކު މަދުކޮށް މެޗު ނިންމާލި ވެލެންސިއާ އޮތީ 20 ޓީމު ވާދަކުރާ ލީގުގެ 19 ވަނައިގަ އެވެ. ލީގުގައި ކުޅުނު 12 މެޗުން ވެލެންސިއާ މި ވަނީ ހަތް މެޗުން ބަލިވެފަ އެވެ.
ރޭގެ މެޗު ނުވަ ވަނަ މިނިޓްގައި ވަނީ މެދުކަނޑާލައިފަ އެވެ. އެއީ، ދާދި ފަހުން މަރުވި ސްޕެއިނުގެ ދެ ވަނަ ޑިވިޝަންގެ ކްލަބް، ޓެނެރިފްގެ ފޯވާޑް، ޖީސުސް ޑި މިގުއެލްގެ ހަނދާން އާ ކުރުމުގެ ގޮތުން ގެނައި ސުކޫތެއްގައި ސަޕޯޓަރުންނާއި ކުޅުންތެރިން އަދި އޮފިޝަލުން ބައިވެރިވުމަށްޓަކަ އެވެ.
