އަންނަ އަހަރަށް 59.7 ބިލިއަން ރުފިޔާގެ ބަޖެޓެއް ހުށަހަޅައިފި

ފިނޭންސް މިނިސްޓަރު ހަސަން ޒަރީރު ރައްޔިތުންގެ މަޖިލީހުގެ ކުރީގެ ޖަލްސާއެއްގައި: އަންނަ އަހަރު ބަޖެޓު ޑެފިސިޓު 9.4 ބިލިއަން ރުފިޔާއަށް އަރާ --- ފޮޓޯ: ރައްޔިތުންގެ މަޖިލިސް

ފިނޭންސް މިނިސްޓަރު ހަސަން ޒަރީރު ރައްޔިތުންގެ މަޖިލީހުގެ ކުރީގެ ޖަލްސާއެއްގައި: އަންނަ އަހަރު ބަޖެޓު ޑެފިސިޓު 9.4 ބިލިއަން ރުފިޔާއަށް އަރާ --- ފޮޓޯ: ރައްޔިތުންގެ މަޖިލިސް

ދައުލަތުގެ ބަޖެޓުގެ ޖުމުލަ އަދަދު މި އަހަރަށް ވުރެ ކުޑަވި ނަމަވެސް، ހަރަދުތަކާއި ޑެފިސިޓް ބޮޑުވާނެ ކަމަށް ލަފާކޮށް އަންނަ އަހަރަށް 59.7 ބިލިއަން ރުފިޔާގެ ބަޖެޓެއް ސަރުކާރުން މިއަދު ރައްޔިތުންގެ މަޖިލީހަށް މިއަދު ހުށަހަޅައިފި އެވެ.

ފިނޭންސް މިނިސްޓަރު ހަސަން ޒަރީރު މަޖިލީހަށް ހުށަހެޅުއްވި ބަޖެޓަކީ މި އަހަރުގެ 64.2 ބިލިއަން ރުފިޔާއަށް ވުރެ 4.5 ބިލިއަން ރުފިޔާ ދަށް އަދަދެކެވެ.
ނަމަވެސް، އަންނަ އަހަރު ސަރުކާރުގެ ހަރަދުތައް 52.6 ބިލިއަން ރުފިޔާއަށް އަރާނެ އެވެ. މިއީ މި އަހަރަށް ވުރެ 3.3 ބިލިއަން ރުފިޔާ އިތުރު އަދަދެކެވެ. 

އިތުރުވާ ހަރަދުގެ ބޮޑު ބައެއް ދަނީ ތަރައްގީގެ މަޝްރޫއުތަކަށެވެ. އަންނަ އަހަރުގެ ބަޖެޓާއެކީ މި ހަރަދު 6.8 ބިލިއަން ރުފިޔާއިން 9.9 ބިލިއަން ރުފިޔާއަށް އަރާނެ އެވެ. މި ބާވަތުގެ ހަރަދު އިތުރުވިޔަސް، މުސާރަ އާއި ސަބްސިޑީ ފަދަ ސަރުކާރު ހިންގުމުގެ ހަރަދު 42.7 ބިލިއަން ރުފިޔާގައި ހިފަހައްޓަން ވަނީ ބަޖެޓުކޮށްފަ އެވެ. 

އަންނަ އަހަރު އާމްދަނީގެ ގޮތުގައި ސަރުކާރަށް ލިބޭނެ ކަމަށް އަންދާޒާކުރަނީ 43.2 ބިލިއަން ރުފިޔާ އެވެ. މިއީ މި އަހަރަށް ވުރެ 1.4 ބިލިއަން ރުފިޔާ އިތުރު އަދަދެކެވެ.

ހަރަދު އިތުރުވުމާ ގުޅިގެން، އަންނަ އަހަރުގެ ބަޖެޓު ޑެފިސިޓު ނުވަތަ ލިބޭ އާމްދަނީއަށް ވުރެ އިތުރަށް ކުރާ ހަރަދު 9.4 ބިލިއަން ރުފިޔާއަށް އަރާނެ އެވެ. މިއީ މި އަހަރު ނިމޭއިރު ޑެފިސިޓު ހުންނާނެ ކަމަށް ލަަފާކުރާ 7.6 ބިލިއަން ރުފިޔާއަށް ވުރެ 25 ޕަސެންޓު އިތުރު އަދަދެކެވެ. އަދި،  ޖީޑީޕީގެ ނިސްބަތުން ބަލާއިރު ޑެފިސިޓް 6.2 ޕަސެންޓުން 7.3 ޕަސެންޓަށް އަރާނެ އެވެ.

މި ޑެފިސިޓު ފޫބެއްދުމަށާއި ދަރަނި އަނބުރާ ދައްކަން އަންނަ އަހަރު ފައިނޭންސިންގެ ގޮތުގައި ހޯދަން ރާވާފައި ވަނީ 18.9 ބިލިއަން ރުފިޔާ އެވެ. މިއީ މި އަހަރު ހޯދަން ޖެހުނު 24.7 ބިލިއަން ރުފިޔާއަށް ވުރެ ވަރަށް ދަށް އަދަދެކެވެ.

ފައިނޭންސިން އަދަދާއި ޖުމްލަ ބަޖެޓު ވެސް ދަށްވީ އަންނަ އަހަރު އަނބުރާ ދައްކަން ޖެހޭ ދަރަނީގެ އަދަދު 4.5 ބިލިއަން ރުފިޔާއަށް މަދުވުމުންނެވެ. ފިނޭންސުން އަންދާޒާކުރަނީ މި އަހަރު ނިމޭއިރު ދަރަނި ދައްކަން 11.7 ބިލިއަން ރުފިޔާ ހަރަދު ވާނެ ކަމަށެވެ. މިހެންކަމުން އަންނަ އަހަރު މި ބައިން ހަރަދުކުރަން ޖެހޭ އަދަދު 7.2 ބިލިއަން މަދެވެ. 

ބަޖެޓުން ފާހަގަކޮށްލެވޭ ގޮތުގައި، ސަރުކާރުން މިހާރު އަންދާޒާ ކުރަނީ މި އަހަރު ވެސް ކަނޑައެޅި އަމާޒަށް ޓޫރިސްޓުން ނާންނާނެ ކަމަަށެވެ. ޓޫރިސްޓުން ނަޔަސް ފިނޭންސުން ވަނީ މި އަހަރު ލިބޭނެ ކަމަށް އަންދާޒާ ކުރި ވަރަށް އާމްދަނީ ލިބޭނެ ކަމަށް ބުނެފަ އެވެ. އަދި، ޓޫރިސްޓުން އަންނަ އަދަދު ވެސް އަންނަ އަހަރު ރަނގަޅު ވާނެ ކަމަށް ފިނޭންސުން ވަނީ ބުނެފަ އެވެ. 

މި ގޮތުން 2.2 މިލިއަން ޓޫރިސްޓުން އަންނާނެ ކަމަށް ލަފާކުރާއިރު، އަންނަ އަހަރަށް ރާވާފައިވާ "ވިޒިޓް މޯލްޑިވްސް އިޔާ" ގެ ހަރަކާތްތަކާއެކީ މި އަދަދު 2.5 މިލިއަން ޓޫރިސްޓުންނަށް މަތިކުރުމަކީ ސަރުކާރުގެ އަމާޒެކެވެ. 

ބަޖެޓު ހުށަހަޅުއްވަމުން ޒަރީރު ވިދާޅުވީ، މި އަހަރު ދިމާވި އެންމެ ބޮޑު ގޮންޖެހުމަކީ މެދުއިރުމަތީގައި ހިނގަމުންދާ ހަނގުރާމަ ކަމަށެވެ. މީގެ ސަބަބުން ޓޫރިސްޓުން އައުން މަދުވެ، މުޅި އިގުތިސޯދަށް އޭގެ ނޭދެވޭ އަސަރު ކުރި ކަމަށް އޭނާ ވިދާޅުވި އެެވެ. 

ހަނގުރާމައިގެ އަސަރުގެ ސަބަބުން މި އަހަރު އިގުތިސާދު ކުރިއަރާނީ 0.6 ޕަސެންޓާއި 1.8 ޕަސެންޓާ ދެމެދު ކަމަށް ޒަރީރު ވިދާޅުވި އެވެ. ނަމަވެސް އަންނަ އަހަރު އިގުތިސޯދީ ދުވެލި އަލުން ބާރުވެ، 3.9 ޕަސެންޓާއި 6.8 ޕަސެންޓާ ދެމެދުގައި ކުރިއަރާނެ ސަރުކާރުން ލަފާކުރެ އެވެ.

ކޮމެންޓް

ފަހުގެ ޚަބަރު

ލޯ ޑިގްރީ އިމްތިހާނަށް މާލެ އަންނާކަށް ނުޖެހޭނެ: ބާ ކައުންސިލް

ލޯ ޑިގްރީގެ އިމްތިހާނުތައް ހެދުމަށް މާލެއަށް ނުވަތަ ވަކި ހާއްސަ ރަށަކަށް ހާޒިރުވުން ލާޒިމު ނޫން ކަމަށާއި، ދަރިވަރުން ދިރިއުޅޭ ރަށެއްގެ ސްކޫލް ނުވަތަ ކައުންސިލް މެދުވެރިކޮށް އިމްތިހާނު ހެދޭނެ މަގު ބާ ކައުންސިލުން ފަހިކޮށްދީފިއެވެ. އަންނަ އަހަރުން ފެށިގެން އަމަލުކުރާ މި އުސޫލުގެ ދަށުން އިމްތިހާނު ހަދާ ގޮތަށް ބަދަލު އައި ނަމަވެސް، ކޯހުގެ މަންހަޖާއި ކިޔަވައިދޭ މުއްދަތަށް އެއްވެސް ބަދަލެއް ނާންނާނެއެވެ.

ތަރައްގީގެ އެއްވެސް ކަމެއް ކުރުމަށް ލާރިއެއް ނެތް: ޝާކިރު

އަންނަ އަހަރުގެ ބަޖެޓުގައި ރިކަރަންޓް ހަރަދަށް ކެނޑުމަށްފަހު ތަރައްގީގެ މަޝްރޫއުތަކަށް ފައިސާ ނެތް ކަމަށް ވިދާޅުވެ މެންބަރު އަހުމަދު ޝާކިރު ކަންބޮޑުވުން ފާޅުކުރައްވައިފިއެވެ. އޭނާ ވިދާޅުވީ ދައުލަތުގެ އާމްދަނީގެ ބޮޑުބައެއް ހަރަދުވަނީ ރިކަރަންޓް ކަންކަމަށް ކަމަށާއި، މަޝްރޫއުތައް ހިންގަން ޖެހެނީ އިތުރަށް ދަރަނި ނަގައިގެން ކަމަށެވެ. މީގެ އިތުރުން ސަރުކާރު ކުންފުނިތަކުން ބޮޑެތި ގެއްލުންވަމުންދާ ދިއުމަށްވެސް އޭނާ ވަނީ ފާޑުވިދާޅުވެފައެވެ.

"ސިޓިޒަންސް ކޮމްޕްލެއިންޓްސް" ލައުންޖުތަކެއް ގާއިމުކޮށްފި

ރައްޔިތުންގެ ޝަކުވާތަކާއި ކަންބޮޑުވުންތައް ސަރުކާރަށް ހުށަހެޅުމަށްޓަކައި މާލެ އާއި ހުޅުމާލޭގައި "ސިޓިޒަންސް ކޮމްޕްލެއިންޓްސް" ބިއުރޯގެ ދެ ލައުންޖެއް މިއަދު ވަނީ ހުޅުވައިފައެވެ. ސަރުކާރު ބަންދު ނޫން ކޮންމެ ދުވަހަކު ޚިދުމަތް ދޭ މި އޮފީސްތަކަކީ ރައީސުލްޖުމްހޫރިއްޔާގެ އޮފީހުގެ ދަށުން ހިންގާ، ރައްޔިތުންގެ މައްސަލަތަކަށް ހައްލު ހޯދައިދިނުމަށް ގާއިމުކުރި ތަންތަނެވެ.

ރިއަލް އެސްޓޭޓު ބިލު މަޖިލީހަށް ބަލައިގަނެފި

މި ބިލު ބަލައިގަންނަން ވޯޓު ދިނީ 42 މެންބަރުން. ބިލާ ދެކޮޅަށް ވޯޓު ދެއްވީ އެމްޑީޕީގެ 13 މެންބަރުން. މި ބިލު ދިރާސާކުރާނީ ގައުމީ ތަރައްގީ އާއި ތަރިކައިގެ ކޮމިޓީން. މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް އިންތިޒާމުތަކެއް ހިމަނާފައިވާ ބިލެއް

ބޮޑެތި ޖޫރިމަނާތަކެއް ހިމަނާފައިވާ އަބުރުގެ ބިލު ކޮމިޓީއަށް

ސޯޝަލް މީޑިއާގައި މީހެއްގެ އަބުރާ ބެހޭ ފަދަ ޕޯސްޓެއް ހިއްސާކޮށްފިނަމަ 5 ލައްކަ ރުފިޔާއާ ހަމައަށް ޖޫރިމަނާ ކުރެވޭ ގޮތަށް ހުށަހެޅި އަބުރުގެ ބިލު މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ. މި ބިލުގައި ބަހާއި، ފޮޓޯއާއި، އިޝާރާތް އަދި ފިލްމު ފަދަ ވަސީލަތްތައް މެދުވެރިކޮށް އަބުރާ ބެހުމުގެ ދައުވާ ކުރެވޭނެ ގޮތްތައް ބަޔާންކޮށްފައިވެއެވެ.

މަރުގެ އަދަބު ތަންފީޒު ކުރާ ބިލު ބަލައިގެންފި

ދަންޖައްސައިގެން މަރުގެ އަދަބު ތަންފީޒުކުރާ ގޮތަށް ސަރުކާރުން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފިއެވެ. މި ބިލުގައި މަރުގެ އަދަބު ތަންފީޒުކުރާނެ ގޮތާއި، އެކަން ހިންގާނެ ޕެނަލެއް އެކުލަވާލުމުގެ އިތުރުން، ބަލިވެއިނުމާއި ދަރިފުޅަށް ދެ އަހަރު ފުރުން ފަދަ އަދަބު ތަންފީޒުނުކުރެވޭނެ ހާލަތްތައް ބަޔާންކޮށްފައިވެއެވެ.

ތިން ކުންފުންޏެއްގެ މަނީ އެކްސްޗޭންޖު ލައިސަންސް ބާތިލްކޮށްފި

މަނީ ޗޭންޖިން ގަވާއިދާ ތަކުރާރުކޮށް ހިލާފުވި ތިން ކުންފުންޏެއްގެ ލައިސަންސް އެމްއެމްއޭ އިން ބާތިލުކޮށް، އެ ކުންފުނިތައް ބޮޑެތި އަދަދުތަކުން ޖޫރިމަނާކޮށްފިއެވެ. މި ފިޔަވަޅަކީ ބޭރު ފައިސާގެ ބާޒާރު ކޮންޓްރޯލްކޮށް، ގަވާއިދާ ހިލާފު މުއާމަލާތްތައް ހުއްޓުވުމަށް އެމްއެމްއޭ އިން ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.

Newsletter

Get the latest news delivered straight to your inbox