ދިވެހިރާއްޖޭގެ ރިސޯޓެއްގައި ދެ ފިރިހެނުން ކައިވެނިކުރި ކަމަށް ބުނާ ވީޑިއޯގެ މައްސަލަ ތަހުގީގުކުރަން އިނާ މޯލްޑިވްސްގެ ސީއީއޯ، މުހައްމަދު ފިރާގު ގޮވާލައިފި އެވެ.
ސޯޝަލްމީޑިއާގައި ދައުރުވަމުންދާ ވީޑިއޯއެއްގެ ސްނެޕްޝޮޓުތަކުން ފެންނަނީ ރާއްޖޭގެ ރިސޯޓެއްގައި ދެ ފިރިހެނުން އަތުގުޅައިގެން ތިބޭ ތަނެވެ. އެ މީހުން ލައިގެން ތިބޭ ހެދުމުންނާއި އޭގެ ތެރެއިން ބައެއް ފޮޓޯޓަކުން ފެންނަ ގޮތުން، ބެލެވެނީ އެއީ ރަމްޒީ ކައިވެންޏެއް ކަމަށެވެ.
އެކަމާމެދު ކަންބޮޑުވުން ފާޅުކުރައްވައި ސޯޝަލްމީޑިއާގައި ފިރާގު ކުރެއްވި ޕޯސްޓެއްގައި ވިދާޅުވީ ރާއްޖެއަކީ ދުނިޔޭގެ ފެންވަރުގައި ޓޫރިޒަމްގެ ވިޔަފާރިކުރާތާ ބައި ގަރުނުވެފައިވާ މަންޒިލެއް ނަމަވެސް، ރާއްޖޭގެ ގާނޫނުތަކާއި ގަވާއިދުތަކާއި ސަގާފީ ހަމަތަކަށް ހުރިހާ އެންމެން ވެސް ރިއާޔަތްކުރަންޖެހޭނެ ކަމަށެވެ.
"ބޭރުގެ އިންވެސްޓަރުން ހިންގާ ރިސޯޓުތަކެއްކަމުގައިވިޔަސް، ދިވެހިރާއްޖޭގެ ގާނޫނުތަކުން އިސްތިސްނާއެއް ނުލިބޭނެ. ބޭރުގެ ފަރާތަކުން އިންވެސްޓުކުރުމަކީ ގައުމުގެ ގާނޫނުތަކާ ހިލާފުވުމުގެ ހުއްދައެއް ނޫން،" ފިރާގުގެ ޕޯސްޓުގައި ލިޔުއްވައިފައިވެ އެވެ.
"...މި ހާދިސާ ތަހުގީގުކޮށް ގާނޫނީ ފިޔަވަޅު އެޅުމަށް ސަރުކާރަށާއި ކަމާބެހޭ ފަރާތްތަކަށް އަޅުގަނޑު ގޮވާލަން."
ފިރާގުގެ އިތުރުން، ވެސް ވަރަށް ގިނަ ބަޔަކު ވަނީ އެ ވީޑިއޯއަށް ފާޑުކިޔައި އެފަދަ ކަންކަން ރާއްޖޭގެ ފަސްގަނޑުގައި ކުރެވިގެން ނުވާނެ ކަމަށް ބުނެ ހިޔާލުފާޅުކޮށްފަ އެވެ. ނަމަވެސް، ސަރުކާރަށް ތާއީދުކުރާ ބައެއް ފަރާތްތަކުން ވަނީ އެއީ ޒަމާނުއްސުރެ ރާއްޖޭގައި ހިނގާ ކަމެއް ކަމަށާއި އެއީ ހުއްޓުވޭނެ ކަމެއް ނޫން ކަމަށް ބުނެ ސޯޝަލްމީޑިއާގައި ހިޔާލުފާޅުކޮށްފަ އެވެ.
