ރަސްމާލެ ވިއްކުމާ ދެކޮޅަށް މަސައްކަތްކުރުމަށް އުފައްދާފައިވާ "ގައުމީ ހަރަކާތް" އިން ބާއްވަން ނިންމާފައިވާ ބޮޑު އެއްވުން، 13 ނޮވެންބަރު 2026 ވާ ހުކުރު ދުވަހަށް ފަސްކޮށްފި އެވެ.
ގައުމީ ހަރަކާތުން މިއަދު ބޭއްވި ނޫސްވެރިންގެ ބައްދަލުވުމުގައި އެ ހަރަކާތުގައި އިސްކޮށް ހަރަކާތްތެރިވެވަޑައިގަންނަވާ ކުރީގެ ހޯމް މިނިސްޓަރު އިމްރާން އަބްދުﷲ ވިދާޅުވީ އެއްވުން ފަސްކުރީ މި ހަރަކާތާ އެމްޑީޕީން ގުޅުމުން، އިތުރަށް ތައްޔާރުވުމުގެ ގޮތުން ކަމަށެވެ.
"މި ލިބުނު ވަގުތަކީ މިކަމަށް އިތުރަށް ތައްޔާރުވަން ލިބުނު ވަގުތު. ހާއްސަކޮށް އަތޮޅުތެރެއަށް ވަޑައިގަންނަވަން ތިއްބެވި ބޭފުޅުން އެ ކަމަށްޓަކައި ރަނގަޅަށް ތައްޔާރުވެގެން، ހަރަކާތްތައް އިތުރުކުރަމުން އެންމެން ގުޅެން ލިބުނު ވަގުތު،" އިމްރާން ވިދާޅުވިއެވެ.
މި މައްސަލައިގައި އެމްޑީޕީގެ ގައުމީ މަޖިލީހުން ފާސްކުރި ގަރާރަށް އިޝާރާތްކުރައްވައި އިމްރާން ވިދާޅުވީ، އެއީ ރައީސް މުހައްމަދު މުއިއްޒުއަށް، ރަސްމާލެ ޔޫއޭއީގެ އީގަލް ހިލްސްއަށް ވިއްކާލުން އިތުރަށް ކުރިއަށް ނުގެންދެވޭނެކަން ޔަގީންކުރުމަށް ލިބުނު ވަރަށް ބޮޑު ބާރެއް ކަމަށެވެ.
ރަސްމާލެއާ ދެކޮޅު އެއްވުން ކުރިން ބާއްވަން ރާވާފައި އޮތީ ނޮވެމްބަރު 6، 2026 ވާ ހުކުރު ދުވަހު އެވެ.
ރަސްމާލެ ވިއްކާލުމަށް ދެކޮޅުވާ މީހުން އިތުރުވަމުންދާތީ ސަރުކާރާއި އީގަލް ހިލްސްވެސް މިހާރު އޮތީ ބޮޑު ޕްރެޝަރެއްގެ ތެރޭގައިކަމަށް އިމްރާން ވިދާޅުވިއެވެ.
ސަރުކާރަށް މިކަމުން ފަހަތަށް ޖެހެން އޮތް އެންމެ ބޮޑު ހުރަހަކީ ވަކި ފަރާތަކާ ހަވާލުކުރެވިފައިވާ ފައިސާތަކެއްގެ މައްސަލަކަމަށް ތުހުމަތުކުރައްވައި، އެ ފައިސާ ދައްކާނެ ގޮތެއް ސަރުކާރުގެ އިސްވެރިން އަމިއްލަފުޅަށް ހޯއްދަވަން ޖެހޭނެކަމަށް އިމްރާން ވިދާޅުވިއެވެ.
"އެ ބުނާ ބުރަދަ އަބްދުﷲ އާ ހަވާލުކުރެވިފައި ހުރި ނުވަތަ ދެވިފައި ހުރި އަދަދުގެ ސަބަބުން [ރަސްމާލެ ދޫކުރުން] ހުއްޓާލައިފި ނަމަ، އެ އަދަދު އަނބުރާ ދައްކާނެ ގޮތެއް ނެތުންކަން އެއީ މިއަދު ސަރުކާރަށް މި ކަމުގައި އޮތް އެންމެ ބޮޑު ދައްޗަކީ. އެހެންނަމަވެސް، އެކަން ނިންމާނީ އެ ބޭފުޅުން އަމިއްލަފުޅަށް. އެ އަދަދު ދައްކާނެ ގޮތެއް ހޯއްދަވާނީ ބައެއް ބޭބޭފުޅުންގެ ގެދޮރު ވިއްކާލައިގެންތޯ ނުވަތަ އެ ނޫން ގޮތަކަށްތޯ އެކަން ވިސްނާނީ އެ ބޭފުޅުން،" އޭނާ ވިދާޅުވިއެވެ.
ދެން އުފެދޭ ސަރުކާރަކުން މި އެއްބަސްވުން ބާތިލްކުރާނެކަން ގައުމީ ހަރަކާތުން ކަށަވަރު ކުރާނެ ކަމަށާއި ރައްޔިތުންގެ ވިންދާ ދެކޮޅަށް އެއްބަސްވުމުގައި ސޮއިކޮށް ރަސްމާލެ ހަވާލުކޮށްފި ނަމަ އެގްރީމެންޓު ބާތިލުކުރުމުން އީގަލް ހިލްސްއަށް ލިބޭ ގެއްލުމަށް ބަދަލެއް ވެސް ނުދޭނެ ކަމަށް އިމްރާން ވިދާޅުވި އެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރުން ހުއްޓާލިކަން ސަރުކާރުން ހާމައެއް ނުކުރެ އެވެ. ދާއިމީ އެއްބަސްވުމުގައި މި ނޮވެމްބަރު މަހު ސޮއިކުރާނެ ކަމުގެ އަޑުތައް ވަނީ ފެތުރިފަ އެވެ.
