ސަރުކާރުގެ ސިއްހީ ނިޒާމު ހަރުދަނާކުރުމުގެ ގޮތުން، ޓާޝަރީ ހޮސްޕިޓަލްތައް އެއް ގަވަނިން ބޯޑެއްގެ ދަށުން ހިންގަން މޯލްޑިވްސް ޓާޝަރީ ހޮސްޕިޓަލްސް ގްރޫޕް" (އެމްޓީއެޗްޖީ) ގެ ނަމުގައި އާ އިދާރާއެއް އުފައްދައިފި އެވެ.
ރައީސް އޮފީހުން ބުނީ މިއީ ހައިބްރިޑް ސެންޓްރަލައިޒްޑް މޮޑެލްއެއްގެ ދަށުން މި ހޮސްޕިޓަލުތައް ހިންގަން ގެނައި ބަދަލެއް ކަމަށެވެ. އަދި މީގެ ސަބަބުން ސަރުކާރު ހޮސްޕިޓަލްތަކުގެ ހިދުމަތްތައް އެއް ފުރާޅެއްގެ ދަށުން ފޯރުކޮށްދިނުމަށް މަގުފަހިވެގެންދާނެ ކަމަށް ބުންޏެވެ.
ޓާޝަރީ ހޮސްޕިޓަލްސް ގްރޫޕް އުފެއްދުމުން، މީގެ ކުރިން މާލޭ ސަރަހައްދުގެ ހޮސްޕިޓަލްތައް ހިންގަމުންދިޔަ މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖީއެޗް) ގެ ބޯޑުގެ އިތުރުން ރަށްރަށުގައި ހުރި ސަރުކާރުގެ ޓާޝަރީ ހޮސްޕިޓަލުތަކުގެ ގަވަނިން ބޯޑުތައް ވަނީ އުވާލާފަ އެވެ.
މީގެ ތެރޭގައި ކުޅުދުއްފުށި ހޮސްޕިޓަލާއި، އުނގޫފާރު ހޮސްޕިޓަލާއި ލ. ގަން ހޮސްޕިޓަލުގެ އިތުރުން ގދ. ތިނަދޫ ޑރ. އަބްދުއްސަމަދު މެމޯރިއަލް އާއި އައްޑޫ އިކުއެޓޯރިއަލް ހޮސްޕިޓަލްގެ ބޯޑު ހިމެނެ އެވެ.
"މޯލްޑިވްސް ޓާޝަރީ ހޮސްޕިޓަލްސް ގްރޫޕްގެ ގަވަނިން ބޯޑަކީ ރައީސުލްޖުމްހޫރިއްޔާގެ އިރުޝާދުގެ ދަށުން، އެމަނިކުފާނަށް ޖަވާބުދާރީވާ، އަދި ހެލްތް މިނިސްޓްރީ ގުޅިފައިވާ ގޮތަށް ހިނގަމުންދާނެ ބޯޑެއް, މި ބޯޑުގެ ކަންކަން ސީދާ ވިލަރެސްކުރައްވާނީ ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް ފޯ ޓާޝަރީ ހެލްތު ސާވިސަސް." ސަރުކާރުން ބުނެފައިވެ އެވެ.
ސަރުކާރުން އަލަށް އެކުލަވާލި 18 މެންބަރުންގެ ގަވަނިން ބޯޑުގެ ޗެއާޕާސަނަކަށް ހަމަޖެއްސީ ސިއްހީ ދާއިރާގެ ގިނަ ދުވަސްތަކެއް ވަންދެން މަސައްކަތްކޮށްފައިވާ ޑޮކްޓަރު އަބްދުލްއަޒީޒު ޔޫސުފެވެ. ވައިސް ޗެއާޕާސަނަކަށް އައްޔަނުކުރީ ހުސައިން ހަލީމް އެވެ. މި ބޯޑުގައި ދަރުމަވަންތަ ހޮސްޕިޓަލުގެ ސީއީއޯ އިބްރާހީމް އަބްދުއްރައްޒާގު ހަލީމް ވެސް ހިމެނިވަޑައިގަންނަވަ އެވެ.
މި ގްރޫޕުގެ ދަށުން ދަރުމަވަންތަ ހޮސްޕިޓަލް، އައިޖީއެމްއެޗް، ހުޅުމާލެ ހޮސްޕިޓަލް، އަދި ވިލިމާލެ ހޮސްޕިޓަލުގެ އިދާރީ ކަންކަން ބަލަހައްޓާނެ އެވެ. މީގެ އިތުރުން މޯލްޑިވިއަން ބްލަޑް ސާވިސަސް އާއި އެތަނުގެ ދަށުން ހިނގާ ތެލަސީމިއާ ސެންޓަރު ވެސް ހިންގާނީ މި ގްރޫޕުގެ ބެލުމުގެ ދަށުންނެވެ.
ފަސް ރަށުގައި ހުރި ޓާޝަރީ ހޮސްޕިޓާތަކުގެ އިތުރުން، ފުވައްމުލަކު ހޮސްޕިޓަލު ހިންގުން ވެސް ވަނީ އެމްޓީއެޗްޖީގެ ދަށަށް ގޮސްފަ އެވެ.
