ފާއިތުވި ދުވަސްތަކުގައި ޔޫރަޕްގެ އެކި ސަރަހައްދުތަކުގައި ދަތުރުކުރި ފަސިންޖަރުން އުފުލާ ބޯޓުތަކަކަށް ބޮމުގެ އިންޒާރުތަކެއް ލިބި، ފްލައިޓްތަކުގެ މިސްރާބު ބަދަލުކުރުމާއި، ކުއްލި ހާލަތުގައި ބޯޓުތައް ޖެއްސުމުގެ އިތުރުން ސަލާމަތީ ކަންކަން ވަރުގަދަކުރަން ޖެހުން ވަނީ އިތުރުވެފަ އެވެ. ނަމަވެސް މިހާތަނަށް ބަލައި ފާސްކުރި އެއްވެސް ބޯޓަކުން ގޮވާ އެއްޗެއް ފެނިފައެއް ނުވެ އެވެ.
ފާއިތުވި ދުވަސްތަކުގައި ބޮމުގެ އިންޒާރު ލިބިގެން އަސަރުކުރި ފްލައިޓްތަކުގެ ތަފުސީލު ތިރީގައި އެވަނީ އެވެ.
އަންގާރަ ދުވަހު ރޯމްގެ ފިއުމިޗީނޯ އެއާޕޯޓަށް ޖެއްސި ރަޔަންއެއާގެ ދެ ފްލައިޓަކަށް ބޮމުގެ އިންޒާރު ލިބުމާ ގުޅިގެން އެ ބޯޓުތައް ބަލައި ފާސްކޮށްފައިވާ ކަމަށް އެއާޕޯޓް ހިންގާ އޭޑީއާރުން ބުންޏެވެ. މީގެ ތެރެއިން ލިޒްބަން އިން ފުރައިގެން އައި ފްލައިޓް ޖެއްސީ މެދުތެރޭ ޔޫރަޕް ގަޑިން ހެނދުނު 09:40 ގަ އެވެ. އަދި ޑަބްލިން އިން ފުރައިގެން އައި ފްލައިޓް 10:30 ގައި ޖެއްސިއިރު، އެ ބޯޓަށް އެހީތެރިކަން ފޯރުކޮށްދިނުމަށް އިޓަލީގެ އެއާފޯސްގެ ބޯޓުތައް ވަނީ ހަރަކާތްތެރިވެފަ އެވެ.
މި ދެ ބޯޓު ވެސް ވަނީ ސަލާމަތީ ގޮތުން ފުރިހަމަކުރަންޖެހޭ ހުރިހާ މަރުހަލާތަކެއް ފުރިހަމަކޮށްފަ އެވެ. އޭގެ ތެރޭގައި ބޯޓާއި، ފަސިންޖަރުންގެ ފޮށިތަކާއި، ފަސިންޖަރުންގެ އިތުރުން ކްރޫއިން ބަލައި ފާސްކުރުން ހިމެނެ އެވެ. އޭޑީއާރުން ބުނި ގޮތުގައި ބޯޓުތަކުން އެއްވެސް ނުރައްކަލެއް ފެނިފައި ނުވާތީ އިންޒާރު މިހާރު ވަނީ އުވާލާފަ އެވެ. އަދި އެއާޕޯޓަށް އެއްވެސް ނުރައްކަލެއް ނެތް ކަމަށާއި އެހެން ފްލައިޓްތަކަށް މީގެ ސަބަބުން ބުރޫނާރާ ކަމަށް ވެސް އެ ކުންފުނިން ބުންޏެވެ.
ސްޕެއިންގެ މުރްސިއާ ސަރަހައްދަށް ކަނޑައަޅާފައި ހުންނަވާ ސަރުކާރުގެ މަންދޫބު ފްރެންސިސްކޯ ލޫކަސް ސޯޝަލް މީޑިއާގައި ވިދާޅުވި ގޮތުގައި، ނޮވެމްބަރު 3 ވަނަ ދުވަހު މެންޗެސްޓާ އިން ފުރައިގެން މުރްސިއާގެ އިންޓަނޭޝަނަލް އެއާޕޯޓަށް ޖެއްސި ރަޔަންއެއާގެ ފްލައިޓަކަށް ބޮމުގެ އިންޒާރު ލިބުމާ ގުޅިގެން ސަލާމަތީ ފިޔަވަޅުތައް ވަނީ ވަރުގަދަކޮށްފަ އެވެ.
މި ފްލައިޓުގައި ތިބި 114 ފަސިންޖަރުންނާއި ހަތް ކްރޫއިން ހިމެނޭހެން ޖުމްލަ 121 މީހުން ބޯޓުން ބާލައި، ސަލާމަތީ ގޮތުން ބަލަންޖެހޭ ކަންކަން ވަނީ ބަލާފަ އެވެ. އަދި ސަލާމަތީ ބާރުތަކުން ބޯޓު ބަލައި ފާސްކޮށް، އެއީ ހަގީގީ ނުރައްކަލެއްތޯ ކަށަވަރުކުރުމުގެ މަސައްކަތް ވަނީ ކޮށްފަ އެވެ.
ބަލްގޭރިއާގެ ޓްރާންސްޕޯޓް މިނިސްޓްރީން ރޮއިޓާސްއަށް ދިން ބަޔާނެއްގައި ބުނި ގޮތުގައި، ނޮވެމްބަރު 3 ވަނަ ދުވަހު ޑަބްލިން އިން ފުރައިގެން ސޯފިއާއަށް ދަތުރުކުރި ރަޔަންއެއާގެ ފްލައިޓަކަށް ވެސް ބޮމުގެ އިންޒާރެއް ވަނީ ލިބިފަ އެވެ. އެ ބޯޓުގައި ތިބި 185 ފަސިންޖަރުންނާއެކު ބޯޓު ސަލާމަތްތެރިކަމާއެކު ޖެއްސިއިރު، ބަލައި ފާސްކުރުމުން އެއްވެސް ގޮވާ އެއްޗެއް ފެނިފައެއް ނުވެ އެވެ.
ބަލްގޭރިއާގެ ޓްރާންސްޕޯޓް މިނިސްޓްރީން ބުނި ގޮތުގައި، ނޮވެމްބަރު 3 ވަނަ ދުވަހު މިލާންގެ ބާގަމޯ އިން ސޯފިއާއަށް ދަތުރުކުރި ވިޒް އެއާގެ ފްލައިޓަކަށް ވެސް ބޮމުގެ އިންޒާރެއް ލިބުނެވެ. އެ ބޯޓުގައި ތިބި 176 ފަސިންޖަރުންނާއެކު ބޯޓު ރައްކާތެރިކަމާއެކު ޖެއްސިއިރު، ބަލައި ފާސްކުރުމުން އެއްވެސް ނުރައްކަލެއް ފެނިފައެއް ނުވެ އެވެ.
ހަންގޭރީގެ ޑިފެންސް މިނިސްޓަރު ވިދާޅުވި ގޮތުގައި، ނޮވެމްބަރު 2 ވަނަ ދުވަހު ލަންޑަނުން ފުރައިގެން ސޯފިއާއަށް ދަތުރުކުރި ވިޒް އެއާގެ އެހެން ފްލައިޓަކަށް ބޮމުގެ އިންޒާރު ލިބުމާ ގުޅިގެން ބުޑަޕެސްޓަށް ވަނީ މިސްރާބު ބަދަލުކޮށްފަ އެވެ. އެ ބޯޓަށް އެހީތެރިވުމަށް ހަންގޭރީގެ ގްރިޕެން ފައިޓާ ޖެޓެއް ވަނީ ހަރަކާތްތެރިވެފަ އެވެ.
ލޮޓް ޕޮލިޝް އެއާލައިންގެ ތަރުޖަމާނު ކަށަވަރުކޮށްދިން ގޮތުގައި، ނޮވެމްބަރު 3 ވަނަ ދުވަހު ލަންޑަނުން ފުރައިގެން ދަތުރުކުރި އެ އެއާލައިންގެ ފްލައިޓަކަށް ބޮމުގެ އިންޒާރު ލިބުމާ ގުޅިގެން ވޯސޯ-މޮޑްލިން އެއާޕޯޓަށް ވަނީ ކުއްލި ހާލަތުގައި ޖައްސާފަ އެވެ. މީގެ ސަބަބުން އެއާޕޯޓުގެ އޮޕަރޭޝަންތައް މެދުކަނޑާލުމަށް ފަހު އަލުން ފެށުނީ މެންދުރުގެ ވަގުތެއްގަ އެވެ. ކަމާބެހޭ އިދާރާތަކުން ބޯޓު ބަލައި ފާސްކުރިއިރު، ފަސިންޖަރުންނާއި ކްރޫއިން ތިބީ އެއާޕޯޓުގެ އެރައިވަލް ހޯލުގައި މަޑުކޮށްގެންނެވެ.
ވޯސޯ-ޗޯޕިން އެއާޕޯޓުގެ ތަރުޖަމާނު ވިދާޅުވި ގޮތުގައި، ނޮވެމްބަރު 3 ވަނަ ދުވަހު ކޯޕަންހޭގަން އިން ވޯސޯއަށް ދަތުރުކުރި އެސްއޭއެސްގެ ފްލައިޓަކަށް ބޮމުގެ އިންޒާރު ލިބުމާ ގުޅިގެން އެއާޕޯޓަށް ޖެއްސުމަށް ފަހު ވަނީ ބަލައި ފާސްކޮށްފަ އެވެ. އެސްއޭއެސް އިން ބުނީ ބޯޓު ސަލާމަތްތެރިކަމާއެކު ޖެއްސުމަށް ފަހު ފަސިންޖަރުން ބާލާފައިވާ ކަމަށެވެ. ޕޮލެންޑުގެ ކަމާބެހޭ ފަރާތްތަކުން ބުނީ އެ އިންޒާރަކީ ހަގީގީ އިންޒާރެއް ނޫން ކަމަށެވެ. އެއާޕޯޓުގެ މަސައްކަތްތައް މެދުނުކެނޑި ކުރިއަށްދިޔަ އެވެ.
މީގެ ކުރިން އޮކްޓޯބަރު 18 ވަނަ ދުވަހު، ތެލް އަވީވް އިން ފުރައިގެން ވިއެންނާއަށް ދަތުރުކުރި އޮސްޓްރިއަން އެއާލައިންސްގެ ފްލައިޓެއް ރޮމޭނިއާގެ މަތިން ދަތުރުކުރަނިކޮށް ބޮމުގެ އިންޒާރެއް ލިބުމާ ގުޅިގެން ސޯފިއާއަށް ވަނީ މިސްރާބު ބަދަލުކޮށްފަ އެވެ.
ބަލްގޭރިއާގެ އެއާފޯސްގެ މިގް-29 މަރުކާގެ ބޯޓަކުން އެ އެއާބަސް އޭ320 އަށް އެހީތެރިކަން ފޯރުކޮށްދިންއިރު، އިންޒާރު ލިބުނުތާ 30 މިނެޓް ތެރޭގައި ބޯޓު ވަނީ ޖައްސާފަ އެވެ. އަދި ވަގުތުން ފަސިންޖަރުން ބޯޓުން ބޭލި އެވެ. އޮސްޓްރިއަން އެއާލައިންސް އިން ބުނީ އެ ބޯޓުގައި 51 ފަސިންޖަރުންނާއި ހަ ކްރޫއިން ތިބި ކަމަށާއި، އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ.
އެ އެއާލައިނުން ބުނި ގޮތުގައި ސަލާމަތީ ގޮތުން ބެލި ބެލުމުން އެއްވެސް ނުރައްކަލެއް ފެނިފައެއް ނުވެ އެވެ. އަދި ފަހުން އެ ފްލައިޓް ވަނީ ހުރިހާ ފަސިންޖަރުންނާއެކު ވިއެންނާއަށް ދަތުރުކޮށްފަ އެވެ.
