އިޓަލީގެ ސްކޫލްތަކުގައި މޫނުބުރުގާ އެޅުން މަނާކުރުމަށާއި، ކޮންމެ ކްލާހެއްގައި ތިބެވޭނެ ބޭރު ދަރިވަރުންގެ އަދަދު ވަކި މިންވަރަކަށް ކަނޑައެޅުމަށް އެ ގައުމުގެ ސަރުކާރުން ތައްޔާރުވަމުންދާ ކަމަށް ބޮޑުވަޒީރު ޖޯޖިއާ މެލޯނީ އާދީއްތަ ދުވަހު ވިދާޅުވެއްޖެ އެވެ.
މެލޯނީ މިހެން ވިދާޅުވީ އެކަމަނާ ނިސްބަތްވާ ޕާޓީން އިންތިޒާމުކޮށްގެން ބޭއްވި ޒުވާނުންގެ ހަރަކާތެއްގައި ވާހަކަދައްކަވަމުން، ކަނާތު ފިޔައިގެ ސިޔާސަތުތައް ދިފާއުކުރައްވަމުންނެވެ.
މެޑިޓަރޭނިއަން ކަނޑުގެ މެދުގައި އޮންނަ ގައުމަކަށް ވުމުން، އިޓަލީއަކީ ޔޫރަޕްގެ ގައުމުތަކުގެ ތެރެއިން އެންމެ ގިނައިން ހިޖުރަވެރިން އަންނަ އެއް ގައުމެވެ. މީގެ ސަބަބުން ހިޖުރަވެރިންގެ މައްސަލައަކީ އިޓަލީގައި އަބަދުވެސް ބޮޑު ބަހުސަކަށް ވެފައިވާ، އަދި އެކި ސަރުކާރުތަކަށް ކުރިމަތިވެފައިވާ ބޮޑު ގޮންޖެހުމެކެވެ.
ހިޖުރަވެރިން، ހާއްސަކޮށް މުސްލިމް ގައުމުތަކުން އަންނަ މީހުން އިޓަލީގެ މުޖުތަމައުގެ ތެރެއަށް ލާމެހުމުގެ މައްސަލައަކީ އެ ގައުމުގެ ސިޔާސީ މަސްރަހާއި މުޖުތަމައުގައި އަދިވެސް ހިޔާލުތަފާތުވުން ބޮޑު ކަމެކެވެ. ދީނީ ނިޝާންތަކާއި، ސަގާފީ ގޮތުން ލާމެހުމާއި، ރައްޔިތަކަށް ވުމުގެ ގަވާއިދުތަކުގެ އިތުރުން ހިޖުރަވެރިންނާ ގުޅޭ ސިޔާސަތުތަކާ މެދު ކުރެވޭ ބަހުސްތަކުގެ ސަބަބުން އާންމު ރައްޔިތުންގެ ހިޔާލު ވަނީ ވަރަށް ބޮޑަށް ބައިބައިވެފަ އެވެ.
"ބްރަދާސް އޮފް އިޓަލީ" ޕާޓީގެ ޒުވާނުންގެ ގޮފީގެ އަހަރީ ބައްދަލުވުމުގައި ވާހަކަދައްކަވަމުން މެލޯނީ ވިދާޅުވީ، ކޮންމެ ކްލާހެއްގައި ތިބެވޭނެ ބޭރު ދަރިވަރުންގެ އެންމެ ގިނަ އަދަދު ގާނޫނީ ގޮތުން ކަނޑައެޅުމަށްޓަކައި ވަރަށް އަވަހަށް ވަޒީރުންގެ މަޖިލީހަށް ހުށަހަޅުއްވާނެ ކަމަށެވެ.
މީގެ އިތުރުން، ސްކޫލް ނިޒާމުގެ ތެރެއަށް ލާމެހުމުގައި ބޮޑެތި ދަތިތަކާ ކުރިމަތިލާ ބޭރު ދަރިވަރުންގެ ބެލެނިވެރިން އިޓަލީ ބަސް ދަސްކުރުމަށް ލާޒިމުކުރުމާއި، ސްކޫލްތަކުގައި ބުރުގާ އާއި މޫނުބުރުގާ އެޅުން މަނާކުރުން ވެސް މި ފިޔަވަޅުތަކުގެ ތެރޭގައި ހިމެނޭ ކަމަށް އެކަމަނާ ވިދާޅުވި އެވެ.
"ކްލާހެއްގައި އިޓަލީ ބަސް ނޭނގޭ އެންމެ ކުއްޖަކު ހުރި ނަމަ، އެހެން ކުދިންނާއި ޓީޗަރުންގެ އެހީތެރިކަމާއެކު އެ ކުއްޖާއަށް ބަސް ދަސްކޮށް، މުޖުތަމައުގެ ތެރެއަށް ލާމެހުމުގެ ފުރުސަތު ބޮޑުވާނެ. ނަމަވެސް، ބަސް ނޭނގޭ ކުދިންގެ އަދަދު ގިނަވެ، ނުވަތަ އެއީ ކްލާހުގެ އަޣުލަބިއްޔަތަށް ވެއްޖެ ނަމަ، އެއީކީ ލާމެހުމެއް ނޫން؛ އެއީ އިހުމާލުވުން،" މެލޯނީ ވިދާޅުވި އެވެ.
ކޮންމެ ކްލާހެއްގައި ތިބެވޭނެ ބޭރު ދަރިވަރުންގެ އެންމެ ގިނަ އަދަދަކީ ކޮބައިކަމެއް މެލޯނީ ސީދާ ވިދާޅެއް ނުވެ އެވެ.
ދިރާސާކުރާ އިދާރާއެއް ކަމަށްވާ "ފޮންޑަޒިއޯން އައިއެސްއެމްޔޫ" އިން ހާމަކޮށްފައިވާ ތަފާސްހިސާބުތަކަށް ބަލާއިރު، އިޓަލީގެ ސްކޫލްތަކުގައި ކިޔަވާ ދަރިވަރުންގެ 11.6 އިންސައްތައަކީ އިޓަލީގެ ރައްޔިތުންނެއް ނޫނެވެ. މިއީ ކޮންމެ 100 ދަރިވަރަކުން ގާތްގަނޑަކަށް 12 ކުދިންނެވެ.
