ރައްޔިތުންނަށް ބޯހިޔާވަހިކަން ދިނުމަށް ކަމަށް ބުނެ ހިއްކަމުންދާ ރަސްމާލެއިން އެއްބައި ޔޫއޭއީގެ އީގަލް ހިލްސްއަށް ދޫކޮށްލުމާއެކު ރާއްޖޭގެ އަމިއްލަވަންތަކަން ގާނޫނީ ގޮތުން ނިމުމަކަށް އަންނާނެ ކަމަށް ކުރީގެ ނައިބު ރައިސް މުހައްމަދު ޖަމީލް އަހްމަދު ރޭ ވިދާޅުވެއްޖެ އެވެ.
ޕީއެންއެފް އިން ބޭއްވި ޖަލްސާއެއްގައި ޖަމީލް ވިދާޅުވީ ރަސްމާލެ ޑީލުގައި ސޮއިކުރާ ހިސާބުން ރާއްޖޭގައި ދީނީ މިނިވަންކަން ނޯންނާނެ ކަމަށް ނުވަތަ ފައްޅި ނޭޅޭނެ ކަމަށް ނުބުނެވޭނެ ކަމަށާއި އެތަނުގައި އެހެން ގައުމެއްގެ ބަޔަކު ވަޒަންވެރިވާއިރު ބައިނަލްއަގުވާމީ ގާނޫނުތަކުގެ ދަށުން އެމީހުންނަށް އެކަންކަން މަގުފަހިކޮށްދޭން ޖެހޭ ކަމަށެވެ.
"މި އެގްރިމެންޓުގައި ސޮއިކުރާ ހިސާބަކީ ހަމަ ބަރާބަރު ގާނޫނީ ގޮތުން ލީގަލީ ދިވެހިރާއްޖޭގެ ފީޗާސް ނިމުމަކަށް އަންނަ ދުވަސް. ލީގަލީ. ހަމަ ގާނޫނީ ގޮތުން ދިވެހިރާއްޖެ ނިމުމަކަށް އަންނާނެ. އެ އަންނަނީ އެ ހިސާބުން ރާއްޖޭގެ ސަރުކާރަކަށް ނުބުނެވޭނެ މިތާނގައި މިސާލަކަށް ދީނީ މިވެނި މިނިވަންކަމެއް ނޯންނާނެއޭ. މިތާނގައި ފައްޅިތައް ނޭޅޭނެއޭ،" ޖަމީލް ވިދާޅުވި އެވެ.
"މިތާނގައި މިސާލަކަށް ސާމޯއާ ދެން ހުރި އެއްބަސްވުމުން ޕްރެކްޓިސް ނުކުރެވޭނެ. މިތާނގައި ގޭ ރައިޓްސް ނޯންނާނެ. އޮންނާނެ. އެއީ އެ މީހުންނާ އެކީގައި އެ މީހުންނަށް ވިއްކަނީ 99 އަހަރަށް. ބައިނަލްއަގުވާމީ ގާނޫނުތައް ލާޒިމުކުރާނެ އެ ބަޔަކު ދިރިއުޅޭ ތަނެއްގައި އެ ބަޔަކަށް އެއް ކަންތައްތައް ކުރަން. އެ ބަޔެއްގެ ވޯޝިޕް ކުރާ ތަންތަން، އަޅުކަންކުރާ ތަންތަން އޮންނާނެ."
ރާއްޖެ އުފެދުނީ އަމިއްލަ ތަނެއްގެ ގޮތުގައި ވަކި ސިފަތަކަކާ އެކުގައިކަން ފާހަގަކުރައްވާ ޖަމީލް ވިދާޅުވީ ބައެއް ގައުމުތައް އުފެދިފައިވަނީ ތަފާތު އެކި ސިފަތަކާއެކު ކަމަށެވެ. ނަމަވެސް ރާއްޖޭގައި އޮތީ އެއް ނަސްލަކާއި، އެއް ދީނަކާއި، އެއް ބަހެއް ކަމަށް އޭނާ ވިދާޅުވި އެވެ.
"އަސްލު ދިވެހިރާއްޖެ މި އުފެދެނީ ދިވެހިން އަމިއްލަ ތަނެއްގެ ގޮތުގައި ދިވެހިންގެ ވަކި ސިފަތަކާ އެކީގައި. އެކި މީހުން ގައުމު އުފައްދަނީ އެކި ގޮތަށް. އެހެންވީމާ ދިވެހިން ބުނީ ދިވެހިރާއްޖެއަކީ މިސާލަކަށް އެއް ނަސްލެއް، އެއް ބަހެއް އިނގޭތޯ، އެއް ދީނެއް. މިހެން އޮންނަ ކެރެކްޓާ މިއީ ތިމަންނަމެންގެ ގައުމޭ. އެ ގޮތަށް އަޅުގަނޑުމެންނަށް ކަނޑައެޅިގެން މި ދިޔައީ،" އޭނާ ވިދާޅުވި އެވެ.
ޖަމީލް ވިދާޅުވީ މެލޭޝިއާ، ސިންގަޕޫރުފަދަ ގައުމުތަކަށް މިނިވަންކަން ލިބުނުއިރު އެތާގައި އެކި ނަސްލުތަކުގެ މީހުން ތިބުމުން އެ މީހުންނަށް ބައިނަލްއަގުވާމީ ގާނޫނުން ބައެއް ހައްގުތައް ކަށަވަރުކޮށްދޭން ޖެހުނު ކަމަށެވެ. އެގޮތުން އެކި ދީންތަކަށް އެ ގައުމުތަކުގައި ފުރުސަތު ދެވިގެން ދިޔަ ކަމަށް އޭނާ ފާހަގަކުރެއްވި އެވެ.
ރަސްމާލެ ދޫކޮށްލަނީ 99 އަހަރަށް ކަމަށް ސަރުކާރުން ބުނެ އެވެ. އެއީ ގާނޫނުތައް ހުއްދަ ކުރާ ކަމަކަށް ނުވާތީ ސަރުކާރުން އުޅެނީ އެ ޕްރޮޖެކްޓަށް ފަހިކުރަން ގާނޫނުތަކެއް ހަދާށެވެ. އަދި މި މަހުގައި އެގްރިމެންޓުގައި ދާއިމީ އެގްރިމެންޓުގައި ސޮއި ކުރެވޭތޯ މިހާރު ދަނީ މަސައްކަތް ކުރަމުންނެވެ.
ރަސްމާލެ ދޫކޮށްލަން ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
