ދިވެހިރާއްޖޭގެ ކޯޓުތަކުގެ އިދާރީ އެންމެހައި ކަންކަން ބަލަހައްޓައި ހިންގުމަށް އުފައްދާފައިވާ ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ އެންމެ މަތީ ވެރިޔާގެ މަގާމަށް ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ވަކީލު، އާދަމް ޝަމީމް އައްޔަނުކޮށްފި އެވެ.
އޭނާ އެ މަގާމަށް އައްޔަނުކުރުމާ ގުޅިގެން ޖުޑީޝަލް ސާވިސް ކޮމިޝަނުން ވެސް ވަނީ މަރުހަބާ ކިޔައިފަ އެވެ.
ޝަމީމްއަކީ މީގެ ކުރިން، ކުރީގެ ރައީސް ޔާމީން އަބްދުލްގައްޔޫމްގެ ގާނޫނީ ވަކީލުންގެ ޓީމުގައި ވެސް ހިމެނިވަޑައިގެންނެވި ބޭފުޅެކެވެ. ޑީޖޭއޭގެ ވެރިއަކަށް އައްޔަނުކުރުމުގެ ކުރިން އޭނާ ހުންނެވީ ރައީސް އޮފީހުގެ އަންޑަ ސެކްރެޓަރީގެ މަގާމުގަ އެވެ.
ޑީޖޭއޭގެ ވެރިއަކަށް ޝަމީމް އައްޔަނުކުރިއިރު، ސިވިލް ކޯޓުގެ ގާޒީކަމަށް ވެސް ޕީއެންސީއަށް ނިސްބަތްވާ މީހަކު އައްޔަނުކުރަން ޖޭއެސްސީން މަސައްކަތް ކުރި އެވެ.
ސިވިލް ކޯޓުގެ ގާޒީކަމަށް އައްޔަނުކުރަން ޖޭއެސްސީން ނިންމީ ކ. އަތޮޅު ޖުޑީޝަލް ދާއިރާގެ އިސް މެޖިސްޓްރޭޓުގެ މަގާމުގައި ހުންނެވި ދުވަސްވަރު، ކޯޓުގެ އެކި އަންހެން މުވައްޒަފުންނަށް ޖިންސީ ގޯނާ ކުރުމުގެ ރެކޯޑު އޮތް މުހައްމަދު ރާގިބު އަހުމަދު އެވެ.
ނަމަވެސް، އެކަމަށް ފާޑުކިޔުން އަމާޒުވުމުން، މަގާމުގެ ހުވާ ކުރުމުގެ ރަސްމިއްޔާތަށް ކުޑަތަންވެފައި ވަނިކޮށް ޖޭއެސްސީން ވަނީ އެ ނިންމުން ބަދަލުކޮށްފަ އެވެ.
ޑީޖޭއޭގެ ވެރިޔާގެ މަގާމު ހުސްވީ އެ މަގާމުގައި ކުރިން ހުންނެވި، އަމްޖަދު މުސްތަފާ މިދިޔަ އޭޕްރިލް 21، ގައި އެ މަގާމުން އިސްތިއުފާދެއްވުމުންނެވެ. އޭނާ އެ މަގާމުން އިސްތިއުފާދެއްވީ އަމިއްލަ ސަބަބުތަކަކާ ހުރެ ކަމަށް އޭނާ އޭރު ވިދާޅުވި އެވެ.
