ރަސްމާލެ މަޝްރޫއުއާ ގުޅޭގޮތުން ޖަމިއްޔަތުއްސަލަފުން ދިރާސާކުރަން ފެށިތާ ދެ ހަފުތާއަށްވުރެ ގިނަދުވަސް ފާއިތުވުމުން އެކަމަށް ފާޑުވިދާޅުވެ ކުރީގެ ނައިބުރައީސް، މުހައްމަދު ޖަމީލް އަހުމަދު އެކްސްގައި ކުރެއްވި ޕޯސްޓަކަށް ސަލަފްގެ ރައީސް، އަބްދުﷲ ބިން މުހައްމަދު އިބްރާހިމް ސިޔާސީ ގޮތުން ރައްދުދެއްވައިފި އެވެ.
އިޒްރޭލު އަދި ޔަހޫދީންނާ ގާތް ގުޅުމެއް ބާއްވާ ޔޫއޭއީގެ އީގަލް ހިލްސް ކުންފުންޏަށް ރަސްމާލޭގެ ދެބައިކުޅަ އެއްބައި ތާއަބަދަށް ދޫކޮށްލާ މަޝްރޫއުގެ ކަންބޮޑުވުންތައް ސަލަފް ޖަމިއްޔާއިން ދިރާސާކުރަން ފެށީ ސެޕްޓެމްބަރު 28، ގަ އެވެ. ނަމަވެސް، މިއަދާ ހަމައަށް އެ މަޝްރޫއުއާ ގުޅޭގޮތުން އެއްވެސް އެއްޗެއް އެ ޖަމިއްޔާއިން ބުނެފައެއް ނުވެ އެވެ.
އެކަމަށް ފާޑުވިފާޅުވެ ޖަމީލް ކުރެއްވި ޕޯސްޓުގައި ވަނީ އަބްދުﷲއަށް ނިސްބަތްވާ ގޮތަށް ސުވާލުތަކެއް އަމާޒުކުރައްވައިފަ އެވެ.
"އެ ބޭފުޅުންނަށް އަދި އެ އުޅެނީ ރަސޫލާގެ ހަދީޡްފުޅު: 'ތިމަންކަލޭގެފާނުގެ ދަރިކަނބަލުން ފާތުމަތުގެފާނު ވައްކަމެއް ކުރެއްވި ނަމަވެސް އަތްޕުޅު ކަނޑުއްވާ ހުށީމެވެ' ވެސް ނުފެނިގެން ނޫންތޯ؟ ވެރިކަމުގައި ހުރީ ޅިޔަންބެ ނުވަތަ ދޯސްތު ނޫންތޯ؟ ފަތުވާ އަންނާނީ އެކަމަށް ގިޔާސްކޮށްފަބާ؟،" ޖަމީލް ކުރެއްވި ޕޯސްޓުގައި ލިޔުއްވާފައިވެ އެވެ.
އެ ޕޯސްޓަށް ރައްދުދެއްވައި އަބްދުﷲ ކުރެއްވި ޕޯސްޓުގައި ރަސްމާލެ މަޝްރޫއުއާ ގުޅޭގޮތުން ސަލަފް ޖަމިއްޔާއިން ކުރަމުންދާ ދިރާސާއާ ބެހޭ ގޮތުން އެއްވެސް އެއްޗެއް ވިދާޅުވެފައެއް ނުވެ އެވެ. އަބްދުﷲ ރައްދުދެއްވީ ޖަމީލްގެ ނައިބުރައީސްކަމާއި ޖަސްޓިސް މިނިސްޓަރުކަމުގައި ކުރެއްވި ކަންކަމަށް ފާޑުވިދާޅުވެ އެވެ.
"ދިވެހިރާއްޖޭގެ ޖަސްޓިސް މިނިސްޓަރުކަމާ ހާއްސަ މަޖިލީހުގެ މެންބަރުކަމާއި ގައުމުގެ ނައިބުރައީސްކަމުގައި ހުންނެވިއިރު، މި ހަދީޘްމަތިން ހަނދުމަނުވިތަނުގައި އަތްކެނޑުމުގެ ހުއްދަ އުވާލައި ޖިނާއީ ގާނޫނު އިސްލާމީ ޝަރީއަތާ އެންމެ ބީރައްޓެހި މިސްރާބަކަށް ފަރުމާކުރެއްވީ ވެސް ހަމަ މަނިކުފާނުގެ އާރުކާޓީގެ ހިއްސާއާ،" އަބްދުﷲ ކުރެއްވި ޕޯސްޓުގައި ވިދާޅުވި އެވެ.
"ކޯޓުތަކަށް މޫނުބުރުގާ އަޅައިގެން އަންހެން ކަނބަލުން ވަނުން މަނާކުރެއްވީ ވެސް މަނިކުފާނުގެ ބާރުވެރިކަމުގައިކަން ވެސް މި ފުރުސަތުގައި ފާހަގަކުރަން."
އެ ޕޯސްޓާއެކު ބައެއް މީހުންގެ ފާޑުކިޔުން ޖަމީލްއަށް އަމާޒުވިއިރު، އަބްދުﷲ އަށް ވެސް ފާޑުކިޔުން އަމާޒުވެފައިވެ އެވެ.
އެގޮތުން އަބްދުﷲ އަށް ފާޑުކީ ގިނަ މީހުން ބުނެފައި ވަނީ ކުރީގެ ވާހަކަދެއްކުމުގެ ބަދަލުގައި މިހާރު ހިނގަމުންދާ ކަންކަމާ ގުޅޭގޮތުން ވާހަކަދައްކަން ޖެހޭ ކަމަށެވެ. އަދި، މީގެ ކުރިން ވެސް ގޯސްކަމަށް ބަޔާންކުރަމުން އައި ކަންކަން މިއަދު ވެސް ގޯސްކަމަށް ބުނަންޖެހޭ ކަމަށް ގިނަ ބަޔަކު ވަނީ ބުނެފަ އެވެ.
އަބްދުﷲ އަކީ ރައީސް މުއިއްޒުގެ އަނބިކަނބަލުން، ސާޖިދާ މުހައްމަދުގެ އެއްބަފާ ބޭބެ އެވެ.
