ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ދައުވާތަކުގެ ހުކުމް އިއްވުމަށް މާދަމާއަށް ތާވަލުކުރި އަޑުއެހުން ކެންސަލްކޮށްފި އެވެ.
މި އަޑުއެހުން ކެންސަލްކުރި ސަބަބެއް އަދި ދެން ހުކުމް އިއްވާނެ ތާރީހެއް ކްރިމިނަލް ކޯޓުން އަދި ހާމައެއް ނުކުރެ އެވެ.
ގާތްގަނޑަކަށް ހަތަރު އަހަރަށް ދެމިގެންދިޔަ މި ޝަރީއަތުގެ އަޑުއެހުންތައް ނިންމާލީ މި މަހުގެ 13 ވަނަ ދުވަހު ދެ ފަރާތުން ހުލާސާ ބަޔާން ހުށަހެޅުމުންނެވެ. އެ ދުވަހުގެ އަޑުއެހުން ނިންމަވާލައްވަމުން ގާޒީ އަލީ ނަދީމް އިއުލާން ކުރެއްވީ މި މަހުގެ 29 ގައި (މާދަމާ) ހުކުމް އިއްވާނެ ކަމަށެވެ.
ދައުލަތުން ތުހުމަތުކުރާ ގޮތުގައި އެމްއެމްޕީއާރުސީ މެދުވެރިކޮށް ފުއްގިރި ކުއްޔަށް ދޫކުރީ ޔާމީންގެ ސީދާ ނުފޫޒާއި އިރުޝާދުގެ ދަށުންނެވެ. އެ މުއާމަލާތުގެ ތެރެއިން ރިޝްވަތުގެ ގޮތުގައި 1.1 މިލިއަން ޑޮލަރު އަދި 24.3 މިލިއަން ރުފިޔާ ސަން ކޮންސްޓްރަކްޝަނާއި ސަން އިންވެސްޓްމަންޓް މެދުވެރިކޮށް ޔާމީންގެ އެކައުންޓަށް ޖަމާކުރި ކަމަށް ބުނެ އެމަނިކުފާނުގެ މައްޗަށް އުފުލީ މަނީ ލޯންޑަރިންނާއި ރިޝްވަތު ގަބޫލުކުރުމުގެ ދައުވާ އެވެ.
މި މައްސަލައިގައި ޔާމީންގެ އިތުރުން ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު އަދި މއ. ކުރިކީލަހިޔާ އަހުމަދު ކްރިކް ރިޒާގެ މައްޗަށް ވެސް ދައުވާ އުފުލި އެވެ. އަދި ސަންގެ ކުންފުނިތަކުގެ މައްޗަށް ވެސް ދައުވާ އުފުލި އެވެ.
ނަމަވެސް އެ އެންމެންގެ މައްޗަށް އުފުލި ދައުވާތަކާއި ކުންފުންޏާ ދެކޮޅަށް ކުރި ދައުވާތައް ޕީޖީ އޮފީހުން ވަނީ އެކި މަރުހަލާތަކުގައި އަނބުރާ ގެންގޮސްފަ އެވެ.
ޔާމީންގެ ދިފާއީ ވަކީލުން ކޯޓުގައި ބުނީ، ދައުލަތުން މި މައްސަލައިގައި ހުށަހެޅި ހެކިބަހުގައި އެތައް ފުށުއެރުންތަކެއް ހުރި ކަމަށެވެ. އަދި، ތުހުމަތުވި އެހެން ހުރިހާ އެންމެންގެ ދައުވާ އަނބުރާ ގެންދިއުމަށް ފަހު، މި މުއާމަލާތުގައި ފައިސާ ދައުރުވި ކަމަށް ބުނާ ސަންގެ ދެ ކުންފުނި ވެސް ސަލާމަތްވެފައިވާއިރު، ހަމައެކަނި ޔާމީނަށް އަމާޒުކޮށް ޝަރީއަތް ހިންގުމަކީ ބޭއިންސާފެއް ކަމަށް ދިފާއުން ބުންޏެވެ.
މިއީ ޔާމީންގެ މައްޗަށް އުފުލި އެމްއެމްޕީއާރުސީގެ ހިޔާނާތުގެ މައްސަލަތަކުގެ ތެރެއިން ހުކުމަކާ ހަމައަށް ދިޔަ ތިން ވަނަ މައްސަލަ އެވެ. މީގެ ކުރިން ގއ. ވޮޑަމުލާ އަދި ވ. އާރަށް މައްސަލައިގައި ކްރިމިނަލް ކޯޓުން އެމަނިކުފާނު ޖަލަށް ލުމަށް ކުރި ހުކުމްތައް މަތީ މަރުހަލާގެ ކޯޓުތަކުން ވަނީ ބާތިލުކޮށްފަ އެވެ.
