އެމްއެމްޕީއާރުސީގެ ހިޔާނާތް ހިންގީ ކުރީގެ ރައީސް ޔާމީންގެ ސީދާ އިރުޝާދުގެ ދަށުން ކަމަށް ކްރިމިނަލް ކޯޓުގައި ދައުލަތުން ބުނެފި އެވެ.
ދައުލަތުން އެހެން ބުނީ ރ. ފުއްގިރި ކުއްޔަށް ދިނުމުގެ މުއާމަލާތުގެ ތެރެއިން ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑާ ކުރެއްވި ކަމަށް ބުނާ މައްސަލައިގެ ހުލާސާ ބަޔާން އިއްވުމަށް އިއްޔެ ބޭއްވި ޝަރީއަތުގެ މަޖިލީހުގަ އެވެ.
ހުލާސާ ބަޔާން އިއްވަމުން ދައުލަތުގެ ވަކީލު އަހުމަދު ޝަފީއު ވިދާޅުވީ ފުއްގިރި ކުއްޔަށް ދިނުމުގެ މުއާމަލާތަކީ ވެސް ޔާމީން ފައިސާ ހޯއްދަވަން ހިންގެވި ކަމެއް ކަމަށެވެ.
އެކަމަށް ބާރު ދިނުމުގެ ގޮތުން އޭނާ ވިދާޅުވީ އެމްއެމްޕީއާރުސީގެ ހިޔާނާތް ހިންގިކަމުގެ ކުށް ސާބިތުވެފައިވާ އަހުމަދު އަދީބު ޓޫރިޒަމް މިނިސްޓަރަކަށް އައްޔަނުކުރެއްވީ ޔާމީން ކަމަށެވެ. އަދި، ކޮރަޕްޝަންގެ ތުހުމަތު އަދީބުއަށް އަމާޒުވެފައި ވަނިކޮށް ނައިބުރައީސްގެ މަގާމަށް އަދީބު އައްޔަނުކުރެއްވީ ވެސް ޔާމީން ކަމަށެވެ.
އޭގެ ފަހުން ޓޫރިޒަމަށް ރަށްތައް ދޫކުރުން ފަދަ މުއާމަލާތްތައް ހިންގުން އެމްއެމްޕީއާރުސީގެ ދަށަށް ބަދަލުކުރެއްވި ކަމަށާއި ނައިބުރައީސްކަމަށް އައްޔަނުކުރެއްވުމަށްފަހު ވެސް، ޓޫރިޒަމް މިނިސްޓްރީގެ ހުރިހާ ޒިންމާތަކެއް ހަވާލުކޮށްފައި ހުރީ އަދީބުއާ ކަމަށް އޭނާ ވިދާޅުވި އެވެ.
ފުއްގިރި މައްސަލައަކީ އެމްއެމްޕީއާރުސީ ހިޔާނާތުގެ ތެރެއިން އެންމެ ކަމެއް ކަމަށާއި އެކަން ކޮށްފައި ވަނީ ޔާމީނަށް ފައިސާ ހޯދުމަށް ކަމަށާއި އެކަމުގައި ޔާމީން މަގާމުގެ ނުފޫޒު ބޭނުންކޮށްފައިވާކަމަށް ޝަފީއު ވިދާޅުވި އެވެ.
އެ މައްސަލައިގެ ހުލާސާ ބަޔާން އިއްވުމުގެ މަޖިލިސް އިއްޔެ ވަނީ ޔާމީންގެ ފަރާތުން އެދިގެން ކުރުކޮށްލައިފަ އެވެ. ހުލާސާ ބަޔާން އިއްވުމުގެ އަނެއްބައި ކުރިއަށް ގެންދާނީ މިއަދު މެންދުރުފަހު އެވެ.
