ލޯކަލް ގަވަރމަންޓް އޮތޯރިޓީ (އެލްޖީއޭ) ބޯޑު އިންތިހާބުގެ ވޯޓުލުން މިއަދު ކުރިއަށްދާއިރު، ހދ. އަތޮޅުގެ ހުރިހާ ރޫޓެއްގެ އާރްޓީއެލް ފެރީ ދަތުރުތައް މިއަދު ހެނދުނު ކުއްލި ގޮތަކަށް ކެންސަލްކޮށްފި އެވެ.
ހދ އަތޮޅުގެ ފެރީތަކުގެ އިތުރުން ށ އަދި ހއ އަތޮޅުގެ ފެރީތައް ވެސް ކެންސަލްކޮށްފައިވާ ކަމުގެ މައުލޫމާތު މި ނޫހަށް ލިބިފައިވެ އެވެ.
ފެރީތައް ކެންސަލް ކުރުމާއި ގުޅިގެން ކަންބޮޑުވުން ފާޅުކުރި އެމްޑީޕީ ކައުންސިލަރަކު ވިދާޅުވީ މިއަދު ހެނދުނު ކުއްލި ގޮތަކަށް ހދ. އަތޮޅުގެ ހުރިހާ ރޫޓެއް ކެންސަލްކޮށް، ހއ. އަދި ށ. އަތޮޅުގެ ބައެއް ފެރީތައް ވެސް ހުއްޓާލީ އެލްޖީއޭ ވޯޓަށް ކައުންސިލަރުން ދިއުމަށް ހުރަސްއެޅުމުގެ ގޮތުން ސިޔާސީ މަންފާއަށް ޖެއްސުން ކުރުމަށް ސަރުކާރުން އަޑީގައި އޮވެގެން ކުރި ކަމެއްގެ ގޮތުގައި ބެލެވޭ ކަމަށެވެ.
"ދުރާލާ ކައުންސިލަރުން ޓިކެޓް ނަގައި ފަހު ވަގުތު ކެންސަލް ކުރީމައި ވަރަށް ރީއްޗަށް އެބަ އެނގޭ މި ވެގެން އުޅޭ ގޮތެއް. އިންތިހާބަށް ހުރަސް އަޅައި ޕީއެންސީ ކެންޑިޑޭޓުން ސަރުކާރު ހަރަދުގައި ވޯޓު ލާ މަރުކަޒުތަކަށް ގެންދިޔުމުން ވެގެން އުޅޭ ގޮތް ވަރަށް ސާފު." އޭނާ ވިދާޅުވިއެވެ.
މިއީ ސީދާ ކައުންސިލްތަކުގެ ހައްގުތަކަށް އަރައިގަތުން ކަމަށް ވެސް އެ ކައުންސިލަރު ފާހަގަކުރެއްވިއެވެ.
އެލްޖީއޭ ބޯޑު އިންތިޚާބުގެ ވޯޓުލުން މިއަދު ހެނދުނު 10:00 އިން ހަވީރު 4:00 އަށް ކުރިއަށްދާއިރު، ޖުމްލަ 807 މީހުންނަށް ވޯޓުލުމުގެ ހައްގު ލިބިގެންވެ އެވެ. ހދ އަތޮޅުގެ ވޯޓުލުން ކުރިއަށްދަނީ ކުރީގެ ހދ އަތޮޅު ކައުންސިލްގެ އިދާރާ ހިންގި އިމާރާތުގަ އެވެ.
އެލްޖީއޭގެ އިންތިހާބުގައި ސިޓީ ކައުންސިލުގެ ތެރެއިން ވާދަކުރައްވަނީ ކުޅުދުއްފުށި ސިޓީގެ މޭޔަރު މުހައްމަދު އާތިފްއެވެ. އޭނާއާ ދެކޮޅަށް އެއްވެސް ބޭފުޅަކު ކުރިމަތިނުލެއްވުމުން އިންތިހާބަކާ ނުލައި މަގާމަށް ވަނީ އިންތިހާބުވެފަ އެވެ.
އެލްޖީއޭގެ ބޯޑަށް މެންބަރުން އިންތިހާބުކުރުން ކުރިއަށް ގެންގޮސްފައި މިވަނީ މިދިޔަ އޮގަސްޓު މަހު އިންތިހާބު ބާއްވަން ނިންމުމަށްފަހުއެވެ. އެ އިންތިހާބު ނުބާއްވައި ދިގުލައިގެންދިޔުމުން އެމްޑީޕީން އެކަމާ ކަންބޮޑުވުން ފާޅުކުރި އެވެ.
