ރައްޔިތުންގެ މަޖިލީހުގެ ރައީސް އާއި ސަރުކާރުގެ ވަޒީރުން އަދި، އުއްތަމަ ފަނޑިޔާރުގެ މުސާރަ ބޮޑުކުރަން ރައްޔިތުންގެ މަޖިލީހުން ފާސްކޮށްފި އެވެ.
ރައްޔިތުންގެ މަޖިލީހުގެ ރައީސް އާއި ސަރުކާރުގެ ވަޒީރުންގެ މުސާރަ ބޮޑުކުރަން މަޖިލީހުން ފާސްކުރީ ވޯޓުގައި ބައިވެރިވެވަޑައިގެންނެވި 42 މެންބަރުންގެ ތާއީދާއެކު އެވެ. އެ ބޭފުޅުންގެ މުސާރަ ބޮޑުކުރަން ނުފެންނަ ކަމަށް ވޯޓު ދެއްވީ 12 މެންބަރުންނެވެ.
އުއްތަމަ ފަނޑިޔާރުގެ މުސާރަ ބޮޑުކުރަން މަޖިލީހުން ފާސްކުރީ ވޯޓުގައި ބައިވެރިވެވަޑައިގެންނެވި 40 މެންބަރުންގެ ތާއީދާއެކު އެވެ. އުއްތަމަ ފަނޑިޔާރުގެ މުސާރަ ބޮޑުކުރުމާ ދެކޮޅަށް ވޯޓުދެއްވީ 12 މެންބަރުންނެވެ.
މި ބަދަލާއެކު ރައްޔިތުންގެ މަޖިލީހުގެ ރައީސްގެ މުސާރަ 73،000ރ. އިން 95،000ރ. އަށް އަދި، ވަޒީރުންނަށް ކާރު އެލަވެންެސްގެ ގޮތުގައި ލިބޭ އެލަވެންސް، 7500ރ. އިން 17،500ރ. އަށް ބޮޑުވާނެ އެވެ. އަދި، މިއަދުން ފެށިގެން އުއްތަމަ ފަނޑިޔާރަށް ލިބޭ މުސާރަ ވެސް 91،000ރ. އިން 95،125ރ. އަށް ބޮޑުވާނެ އެވެ.
އޭގެ އިތުރުން، ރާއްޖޭގެ ހުރިހާ ކައުންސިލްތަކެއްގެ ރައީސުންނާއި ނައިބު ރައީސުން އަދި، ރަށު ކައުންސިލަރުންނަށް ވެސް 5000ރ. ގެ ސާވިސް އެލަވެންސެއް ދޭން ފަށަން މަޖިލީހުން މިއަދު ވަނީ ފާސްކޮށްފަ އެވެ. މި ބަދަލާއެކު ރަށު ކައުންސިލް ރައީސުންގެ މުސާރަ 25،500ރ. އިން 30،500ރ. އަށް، ނައިބު ރައީސުންގެ މުސާރަ 25،000ރ. އަށް އަދި، ކައުންސިލަރުންގެ މުސާރަ 18،000ރ. އިން 23،000ރ. އަށް ބޮޑުވާނެ އެވެ.
މަޖިލީހުން މި ބަދަލުތައް ގެނެސްފައި މި ވަނީ ރަސްމާލޭގެ ދެބައިކުޅަ އެއްބައި އީގަލް ހިލްސް ކުންފުންޏަށް ދިނުމަށް ސަރުކާރުން ކުރަމުންދާ މަސައްކަތާ ދެކޮޅަށް ހިޔާލުފާޅުކުރާ މީހުންގެ އަޑު ގަދަވާން ފަށާފައިވާ ދަނޑިވަޅެއްގަ އެވެ.
އިދިކޮޅު ފަރާތްތަކުން ތުހުމަތު ކުރަނީ، މި ބަދަލުތައް ގެނެސްފައި ވަނީ ރަސްމާލެ މަޝްރޫއުއާ ދެކޮޅަށް ދައުލަތުގެ ބާރުތަކުގެ ވެރިން ވާހަކަދައްކަވައިފާނެކަމުގެ ބިރަށް ކަމަށް ތުހުމަތުކުރައްވައިފަ އެވެ.
