ހެޔޮވެރިކަމަކީ ހަމައެކަނި މުއައްސަސާތަކެއް ހުރުން ނޫން ކަމަށާއި، ހެޔޮވެރިކަމަކީ ރައްޔިތުންގެ އަޑު އިވޭކަމުގެ އިހުސާސްވުމާއި، އެންމެންނަށް ހަމަހަމަ ފުރުސަތުތައް ލިބިދިނުން ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ޓެންޒޭނިއާގައި ކުރިއަށްދާ އިންޓަ ޕާލިމެންޓަރީ ޔޫނިއަންގެ 149 ވަނަ ބައްދަލުވުމުގައި ވާހަކަދައްކަވަމުން އަބްދުއްރަހީމް ވަނީ ހެޔޮވެރިކަމާއި، އިތުބާރާއި، ހަމަހަމަ ފުރުސަތުތަކުގެ މައްޗަށް ބިނާކޮށް މުޖުތަމައުތައް ބާރުވެރިކުރުވުމުގެ މުހިންމުކަމުގެ މައްޗަށް އަލިއަޅުއްވާލައްވާފަ އެވެ.
ގާނޫނު ހަދާ މަޖިލިސްތަކުގެ މެންބަރުންގެ މަސްއޫލިއްޔަތަކީ ހަމައެކަނި ގާނޫނުތައް ފާސްކުރުން ނޫންކަން ފާހަގަކުރައްވައި، އަބްދުއްރަހީމް ވިދާޅުވީ ރައްޔިތުންގެ އަޑު އަހައި، ސަރުކާރުގެ ސިޔާސަތުތައް ތަންފީޒުވަމުންދާ ގޮތް ބަލައި، ދައުލަތުގެ ވަސީލަތްތައް ޒިންމާދާރުކަމާއެކު ބޭނުންކުރާކަން ކަށަވަރުކުރަންޖެހޭ ކަމަށެވެ
ދިވެހިރާއްޖެ ފަދަ ޖަޒީރާ ގައުމެއްގައި ހުރިހާ ރަށަކަށް ހަމަހަމަކަމާއެކު ހިދުމަތްތައް ފޯރުކޮށްދިނުމުގައި ޓެކްނޮލޮޖީގެ ދައުރު ބޮޑުކަން އަބްދުއްރަހީމް ފާހަގަކުރެއްވި އެވެ. އެގޮތުން ރާއްޖޭގައި ބޭނުންކުރާ އީ-ފާސް ފަދަ ޑިޖިޓަލް ވަސީލަތްތަކުގެ އެހީގައި ސަރުކާރުގެ ހިދުމަތްތައް ރައްޔިތުންނާ ގާތުން ފޯރުކޮށްދެވޭކަން އެމަނިކުފާނު ބަޔާންކުރެއްވި އެވެ.
ވެރިކަމުގެ ނިޒާމަށް ރައްޔިތުންގެ އިތުބާރު ހޯދުމަކީ ދެފުށް ފެންނަ، ޒިންމާދާރު އަދި ނަޒާހަތްތެރި ނިޒާމެއް އޮވެގެން ކުރެވޭނެ ކަމެއް ކަމަށް އަބްދުއްރަހީމް ވިދާޅުވި އެވެ. އޭނާ ވިދާޅުވީ ރާއްޖޭގައި އޮތް މައުލޫމާތު ހޯދައި ލިބިގަތުމުގެ ހައްގުގެ ގާނޫނާ (އާރްޓީއައި) އާއި އެންޓި ކޮރަޕްޝަން ކޮމިޝަން (އޭސީސީ) ފަދަ މުއައްސަސާތަކުގެ މުހިންމުކަން ފާހަގަކުރެއްވި އެވެ.
މީގެއިތުރުން އަބްދުއްރަހީމް ވިދާޅުވީ ރައްޔިތުންގެ ދިރިއުޅުމާ ގުޅުންހުރި ނިންމުންތައް ނިންމުމުގައި އާންމުން ބައިވެރި ކުރުވުމަށް ފުރުސަތުތައް ފަހިކޮށްދޭންޖެހޭ ކަމަށެވެ. ރާއްޖޭގެ ރައްޔިތުންގެ މަޖިލީހަށް ޕެޓިޝަން ހުށަހެޅުމާއި ޑިޖިޓަލް ވަސީލަތްތައް މެދުވެރިކޮށް ރައްޔިތުންގެ ޝަކުވާތައް ހުށަހެޅުމުގެ ފުރުސަތު އޮތް ކަމަށް ވެސް އޭނާ ވިދާޅުވި އެވެ.
ދުނިޔޭގެ މަސްރަހުގައި ހިނގަމުންދާ ހަމަނުޖެހުންތަކަށް އިޝާރާތްކުރައްވައި، އަބްދުއްރަހީމް ވިދާޅުވީ ފަލަސްތީނާއި އެފްރިކާގެ ބައެއް ސަރަހައްދުތަކުގައި ހިނގަމުންދާ ހަނގުރާމަތަކުގެ ސަބަބުން އެންމެ ބޮޑު ތަކުލީފެއް އުފުލަންޖެހެނީ އާންމު ރައްޔިތުންނަށް ކަމަށެވެ. އެހެންކަމުން، ބައިނަލްއަގުވާމީ ގާނޫނުތަކަށް އިހުތިރާމްކޮށް، އިންސާނީ ކަރާމާތް ރައްކާތެރިކުރުމަށްޓަކައި ސުލްހަވެރި ހައްލުތައް ހޯދުމަށް މަސައްކަތް ކުރުމަކީ ގާނޫނު ހަދާ މަޖިލިސްތަކުގެ ޒިންމާއެއް ކަމަށް އެމަނިކުފާނު ވިދާޅުވި އެވެ.
އައިޕީޔޫގެ މި ބައްދަލުވުމުގެ ބޭނުން ހިފައިގެން އެއް ގައުމު އަނެއް ގައުމުގެ ތަޖުރިބާ ހިއްސާކޮށް، ގާނޫނު ހަދާ މަޖިލިސްތަކަކީ ރައްޔިތުންގެ އިތުބާރު ލިބިފައިވާ، ހުޅުވާލެވިފައިވާ އަދި ހަރުދަނާ ތަންތަނަށް ހެދުމަށް އަބްދުއްރަހީމް ގޮވާލައްވަމުންނެވެ. އަދި ރާއްޖެއިން އަބަދުވެސް ހެޔޮވެރިކަމާއި ޑިމޮކްރަސީ ކުރިއެރުވުމަށް ބައިނަލްއަގުވާމީ މުޖުތަމައާއެކު މަސައްކަތްކުރާނެ ކަމުގެ ޔަގީންކަން އޭނާ ދެއްވި އެވެ.
