ރަސްމާލެ މަޝްރޫއުއާ ދެކޮޅަށް އިއުލާނުކޮށްފައިވާ "ދިވެހީންގެ ބިން ދިވެހީންނަށް" ހަރަކާތުން މިރޭ ފޯރަމެއް ބާއްވަން ތައްޔާރުވެއްޖެ އެވެ.
އާންމުންނަށް ހުޅުވާލައިގެން ބާއްވާ އެ ފޯރަމް އޮންނާނީ މިރޭ 8:45 ގައި މ. ފިނިފަރު 13 ވަނަ ފަންގިފިލާގަ އެވެ. ފޯރަމްގައި ޕެނަލިސްޓުންގެ ގޮތުގައި މިރޭ ބައިވެރިވެވަޑައިގަންނަވަނީ ގާނޫނީ ވަކީލު އަލީ ހުސެއިން އާއި މާލީ ދާއިރާގެ ތަޖުރިބާކާރު، އިސްމާއިލް ޒަރިޔަންދު އެވެ.
އެ ހަރަކާތް ހިންގުމުގައި އިސްކޮށް އުޅުއްވާ ކުރީގެ ހޯމް މިނިސްޓަރު، އިމްރާން އަބްދުﷲ ވިދާޅުވީ ރަސްމާލެ މަޝްރޫއުއާ ގުޅޭގޮތުން ހިޔާލުފާޅުކުރަން ނުވަތަ ސުވާލުކުރަން ބޭނުންވާ މީހުންނަށް މިރޭ އެ ފުރުސަތު ހުޅުވާލައިފައި އޮންނާނެ ކަމަށެވެ.
"މިއީ ރަސްމާލެ މަޝްރޫއުއާ މެދު ހުރި ކަންބޮޑުވުންތަކާމެދު ރައްޔިތުން ހޭލުންތެރިކުރުވުމަށް ސިލްސިލާ ގޮތެއްގައި އިންތިޒާމުކުރެވޭ ހަރަކާތްތަކެއްގެ ތެރެއިން ފުރަތަމަ ހަރަކާތް، އާންމުންގެ ތެރެއިން މިކަމާ ބެހޭގޮތުން ކޮމެންޓުކޮށް ސުވާލުކުރަން ބޭނުންފުޅުވާ ބޭފުޅުންނަށް އެ ފުރުސަތު އެރުވޭނެ،" އިމްރާން ވިދާޅުވި އެވެ.
ރަސްމާލެ މަޝްރޫއުގެ ދަށުން ހިއްކާ ބިން ބޭރުގެ ކުންފުންޏަކަށް ދިނުމާ ދެކޮޅަށް ދިވެހިންގެ ބިން ދިވެހިންނަށް ނަމުގައި ގައުމީ ހަރަކާތެއް ރަސްމީކޮށް އިއުލާނުކުރީ މިދިޔަ ހޯމަ ދުވަހު އެވެ.
އެ ހަރަކާތުގައި އިމްރާންގެ އިތުރުން، އިދިކޮޅު އެމްޑީޕީގެ ބައެއް މަޖިލިސް މެންބަރުންނާއި އެ ޕާޓީގެ ގައުމީ މަޖިލީހުގެ މެންބަރުންގެ އިތުރުން، އިދިކޮޅު ޕީއެންއެފްގެ ލީޑަޝިޕުގައި ހިމެނިވަޑައިގަންނަވާ ބޭފުޅުން ބައިވެރިވެ އެވެ.
ރަސްމާލެ ދޫކޮށްލަނީ 99 އަހަރަށް ކަމަށް ސަރުކާރުން ބުނެ އެވެ. އެއީ ގާނޫނުތައް ހުއްދަ ކުރާ ކަމަކަށް ނުވާތީ ސަރުކާރުން އުޅެނީ އެ ޕްރޮޖެކްޓަށް ފަހިކުރަން ގާނޫނުތަކެއް ހަދާށެވެ. އަދި ނޮވެމްބަރު 11، ގައި އެގްރިމެންޓުގައި ދާއިމީ އެގްރިމެންޓުގައި ސޮއި ކުރެވޭތޯ މިހާރު ދަނީ މަސައްކަތް ކުރަމުންނެވެ.
ސަރުކާރުން ބުނަނީ ރަސްމާލެއަށް އީގަލް ހިލްސް އިން 20 ބިލިއަން ޑޮލަރު އިންވެސްޓު ކުރާނެ ކަމަށެވެ. އެކަމަކު އީގަލް ހިލްސް އިން ބުނަނީ އެ ކުންފުނިން އިންވެސްޓު ކުރާނީ 12 ބިލިއަން ޑޮލަރު ކަމަށެވެ. އަލައްބާރު ފަހުން ވިދާޅުވީ 20 ބިލިއަން ޑޮލަރަކީ އެތަނުގެ މަސައްކަތް ނިމުމުން ތަނުގެ އަގު ހުންނާނެ މިންވަރު ކަމަށެވެ.
