ބޭންކް އޮފް މޯލްޑިވްސް އިން ދޫކުރާ ހައުސިން ލޯނުގެ ޝަރުތުތަކަށް ބަދަލު ގެނެސް، ތިން މިލިއަން ރުފިޔާއިން ދަށުގެ ލޯނުތައް ނަގާއިރު އިކުއިޓީއަށް ދައްކަންޖެހޭ މިންވަރު ފަސް ޕަސެންޓަށް ކުޑަކޮށްފި އެވެ.
ތިން މިލިއަން ރުފިޔާ ނުވަތަ އެއަށް ވުރެ ދަށުގެ ލޯނުތަކަށް ނަގާ އިކުއިޓީ ފަސް ޕަސެންޓަށް ކުޑަކުރުމުގެ އިތުރުން ލޯނު ދޫކުރާއިރު ރަހުނެއް ވެސް ބަހައްޓާކަށް ނުޖެހޭނެ އެވެ. މީގެ ކުރިން އިކުއިޓީއަށް ލޯނުގެ 20 ޕަސެންޓު ނަގަ އެވެ.
ހައުސިން ލޯނުގެ ގޮތުގައި އެންމެ ކުޑަކޮށް ނެގޭނީ 50،000 ރުފިޔާ އެވެ. އަދި އެންމެ ގިނައިން ލޯނުގެ ގޮތުގައި ދޫކުރާނީ 45 މިލިއަން ރުފިޔާ އެވެ.
އޭގެ އިތުރުން، ތިން މިލިއަން ރުފިޔާ އަދި އެއަށް ވުރެ ދަށް އަދަދުތަކުގެ ލޯނަށް ނަގާ އިންޓްރެސްޓު ވެސް ބީއެމްއެލް އިން ވަނީ 9.5 ޕަސެންޓަށް ކުޑަކޮށްފަ އެވެ.
"ގެދޮރު ބިނާ ކުރުމަށް ބޭނުންވާ ފައިނޭންސިންއަކީ އަތްފޯރާ ހިދުމަތަކަށް ހެދުމަށް ވެސް އަޅުގަނޑުމެން ވާނީ މަސައްކަތްކޮށްފައި. އެގޮތުން ހައުސިން ލޯނުތަކަށް އަމިއްލައަށް ދައްކަންޖެހޭ އިކުއިޓީ ނުވަތަ ޑައުންޕޭމަންޓު 20 ޕަސެންޓުން ފަސް ޕަސެންޓަށް ވަނީ ދަށްކޮށްދެވިފަ. މިއީ ގެދޮރު މިލްކު ކުރުމަށް އޮތް އެންމެ ބޮޑު ހުރަސް ކަމަށްވާ ފައިސާ އެއްކުރުމަށް އޮތް ތަކުލީފަށް ލިބުނު ބޮޑު ލުޔެއް،" ބީއެމްއެލްގެ ސީއީއޯ ޝަރީފް މިއަދު ވިދާޅުވި އެވެ.
ބީއެމްއެލް އިން ދޫކުރާ ހައުސިން ލޯނުތަކުގެ އިކުއިޓީ ކުޑަކުރިއިރު، ލޯނުގެ އިކުއިޓީ ސަރުކާރުން ދައްކައިދޭން ހަމަޖެހިފައިވާކަން ރައީސް މުހައްމަދު މުއިއްޒު ވަނީ ހޮނިހިރު ދުވަހު އިއުލާނު ކުރައްވައިފަ އެވެ.
"މިއީ ލޯނެއް ނޫން، މި ހިލޭ. ސަރުކާރުން ދެނީ އިކުއިޓީ ކޮމްޕޯނަންޓަށް ދޭ މިއީ ހަމަ، އަނބުރާ ދައްކަން ނުޖެހޭ އެއްޗެއް، ދެން 200،000ރ. ވަރު ކޮންމެ މީހަކަށް، ދެން ފައިވް ޕަސެންޓު، ދެން ގޭގެ ތިންހަތަރު މީހުން އެއްކޮށްލައިގެން ވެސް މިސާލަކަށް އެއް މިލިއަނެއްހައި ރުފިޔާ ވެސް ލިބިދާނެ ކަންނޭނގެ، ފަސް މީހުން ތިބެއްޖެއްޔާ ދެއްތޯ؟" ރައީސް އޮފީހުން ގެނެސްދޭ ޕްރޮގްރާމެއްގައި ވާހަކަ ދައްކަވަމުން މުއިއްޒު ވިދާޅުވި އެވެ.
