ބޭރު ފައިސާއާ ބެހޭ ގާނޫނަށް ބަދަލުގެނެސް، ރަސްމީ ރޭޓު ނޫން ރޭޓެއްގެ ހަބަރު ލިޔުމާއި އެ ނޫން ރޭޓެއްގައި ޑޮލަރު ވިއްކުން މަނާކުރި ނަމަވެސް، ބޮޑު އަގުގައި ޑޮލަރު ގަނެވިއްކުން ނުހުއްޓުވޭ ކަމަށް ބުނެ ގިނަ ބަޔަކު ކަންބޮޑުވުން ފާޅުކުރަން ފަށައިފި އެވެ.
ކަޅު ބާޒާރުގައި ޑޮލަރުގެ އަގު ރެކޯޑު މިންވަރަކަށް އުފުލުނު ފަހުން، މިދިޔަ އޮގަސްޓު މަހުގެ ތެރޭގައި ސަރުކާރުން ވަނީ ބޭރު ފައިސާގެ ގާނޫނަށް ބަދަލުތައް ގެނެސް، ހާއްސަ ޓާސްކްފޯހެއް އެކުލަވާލައިގެން ކަޅު ބާޒާރު ހުއްޓުވުމުގެ މަސައްކަތް ފަށާފަ އެވެ. ސަރުކާރުން އޭރު ދިން ޔަގީންކަމަކީ، ވަރުގަދަ ފިޔަވަޅުތަކާއެކީ ޑޮލަރުގެ އަގު ތިރިކުރެވޭނެ ކަމަށެވެ.
ނަމަވެސް އަދަދު ނޫހުން އެއްކުރި މައުލޫމާތުން އެނގުނު ގޮތުގައި، ކަޅު ބާޒާރު އޮޕަރޭޓުކުރާ ގޮތަށް ބަދަލުތަކެއް އަޔަސް، އަދިވެސް ޑޮލަރު ވިއްކަމުން ދަނީ ރަސްމީ ރޭޓަށް ވުރެ ވަރަށް ބޮޑު އަގުގަ އެވެ.
ގާނޫނަށް މި ފަހުން ގެނައި ބަދަލުގެ ދަށުން، ރަސްމީ ރޭޓަށް ވުރެ ބޮޑު އަގުތައް ހާމަކުރުމާއި އެ އަގުގައި ޑޮލަރު ވިއްކަން އިޝްތިހާރު ކުރުމަކީ މިހާރު މަނާ ކަމެކެވެ. މީގެ ތެރޭގައި ޑިޖިޓަލް ވަސީލަތްތަކާއި އެކި ޕްލެޓްފޯމްތައް މެދުވެރިކޮށް އާންމުންނަށް އެނގޭނެހެން މިފަދަ މައުލޫމާތު ފެތުރުމާއި ޝާއިއުކުރުން ހިމެނޭތީ ނުއަގުގައި ވިއްކާ ރޭޓެއް ވެސް ގަންނަ ރޭޓެއް ވެސް ހަބަރެއްގައި ނުލިޔެވެ އެވެ.
ޑޮލަރު އަގު ތިރިކުރަން ނިކުތްއިރު ސަރުކާރާއި މަރުކަޒީ ބޭންކުން ބުނީ، ޑޮލަރުގެ އަގު ބޮޑުވަނީ ސިޔާސީ ވާދަވެރިންގެ ވާހަކަތަކާއި ނޫސްތަކުގެ ހަބަރުތަކުން ހާސްކަން އުފައްދައިގެން ކަމަށެވެ. އޭރު ސަރުކާރުން ވަނީ ރަސްމީ ނޫން ރޭޓެއްގައި ޑޮލަރު ގަނެވިއްކުމަކީ މަނީ ލޯންޑަރިންގެ އަމަލެއް ކަމަށާއި، އެއީ ޖިނާއީ ދައުވާ އުފުލޭނެ ކަމެއް ކަމަށް ބުނެ އިންޒާރު ދީފަ އެވެ.
ސަރުކާރުން މި މަސައްކަތް ފެށި ދުވަސްވަރު ކަޅު ބާޒާރަށް ޑޮލަރު ސަޕްލައިކުރާ ވިޔަފާރިއެއް ރެއިޑުކޮށް، މަނީ އެކްސްޗޭންޖެއްގެ ލައިސެންސް ބާތިލުކޮށް، ކަޅު ބާޒާރުގައި އޮޕަރޭޓުކުރާ ކަމަށް ބުނާ ބިދޭސީންގެ ނެޓްވޯކެއް ވެސް ހައްޔަރުކުރި އެވެ. އޭގެ ފަހުން ބައެއް ބިދޭސީން ވެސް ހައްޔަރުކުރި އެވެ. ނަމަވެސް، ސަރުކާރުން އޭރު ކުރި ތުހުމަތުތަކާ ގުޅޭ ވަރުގެ އޮޕަރޭޝަނެއް ހިންގި ކަމަށް ނޫނީ މި ކަމުގައި ބައިވެރިވާ ބަޔަކާ ދެކޮޅަށް އެޅި ފިޔަވަޅެއް ނުބުނެ އެވެ.
ސަރުކާރުން ބުނެފައިވާ ގޮތުގައި، ހުއްދަ ނެތި ޑޮލަރު މާރުކުރާ ހަތް މަނީ އެކްސްޗޭންޖަކުން ނުވަ މަސް ތެރޭގައި 76 މިލިއަން ޑޮލަރު މާރުކޮށްފައި ވެ އެވެ. އަދި ބައެއް ރިސޯޓުތަކުން ވެސް މިކަމުގައި ބައިވެރިވާ ކަމަށް ބުނެފައި އޮތެވެ.
އިކޮނޮމިކް މިނިސްޓަރު މުހައްމަދު ސައީދު ވިދާޅުވެފައިވާ ގޮތުގައި، މި އޮޕަރޭޝަންގެ ނަތީޖާ ފެނި ޑޮލަރުގެ އަގު ވަނީ ވެއްޓިފަ އެވެ.
ނަމަވެސް ވިޔަފާރިވެރިންނާއި އާންމުން ބުނަނީ، މިހާރު ޑޮލަރު ގަންނަން ލިބެނީ ވަރަށް އުނދަގުލުން ކަމަށާއި، މަނީ އެކްސްޗޭންޖުތަކުން ވެސް ފާޅުގައި ޑޮލަރު ނުވިއްކާ ކަމަށެވެ. އޭގެ ބަދަލުގައި މިހާރު މި މުއާމަލާތްތައް ކުރަނީ އިތުބާރު ކުރެވޭ މަދު ބަޔަކާ އެކު ސިއްރިއްޔާތުގަ އެވެ.
ސަރުކާރުގެ ޑޮލަރު އޮޕަރޭޝަން ފެށި ފަހުން ގިނަ މަނީ އެކްސްޗޭންޖުތައް ވަނީ ބަންދުކޮށްފަ އެވެ.
ޑޮލަރުގެ ތާށިކަން ދިގުލައިގެން ގޮސްފައިވާއިރު، މާހިރުން ބުނަނީ ޑޮލަރު ހަރަދުކުރާ ގޮތަށް ބޮޑެތި ބަދަލުތަކެއް ނުގެނެސް މި މައްސަލައަށް އަވަސް ހައްލެއް ނެތް ކަމަށެވެ.
އެހެން ނަމަވެސް، ސަރުކާރުން އުންމީދު ކުރަނީ ޓާސްކްފޯހުގެ މަސައްކަތްތަކާއި ޑޮލަރު މާރުކުރާ މިންވަރު އިތުރުކޮށްފައިވާތީ އަގު ތިރިވާނެ ކަމަށެވެ. އަދި ރަސްމާލޭގައި އީގަލް ހިލްސްއިން މަޝްރޫއު ފެށުމުން، ޑޮލަރުގެ މައްސަލައަށް ދާއިމީ ހައްލެއް ލިބޭނެ ކަމަށް ވެސް ސަރުކާރުން ވަނީ ބުނެފަ އެވެ.
