މަނީ ޗޭންޖިން ވިޔަފާރިކުރުމުގެ ގަވާއިދާ ހިލާފުވުމުގެ ސަބަބުން އެމްއެސް ފައިނޭންސް ކަރަންސީ އެކްސްޗޭންޖަށް ދޫކޮށްފައިވާ މަނީ ޗޭންޖާ ލައިސަންސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހިފަހައްޓައިފި އެވެ.
މަރުކަޒީ ބޭންކުން ނެރުނު ނޫސް ބަޔާނެއްގައި ބުނެފައި ވަނީ، ލައިސަންސް ހިފެހެއްޓުމާ އެކީ ސުޕަވައިޒަރީ ފިޔަވަޅެއްގެ ގޮތުން އެމްއެސް ފައިނޭންސް ފަސް ލައްކަ ރުފިޔާއިން ޖޫރިމަނާކޮށްފައިވާ ކަމަށެވެ.
އެމްއެމްއޭއިން ވަނީ ބޭރު ފައިސާ ގަނެވިއްކުމުގެ މުއާމަލާތްތައް ކުރުމުގައި ގައުމުގެ ގާނޫނުތަކާއި ގަވާއިދުތަކާ އެއްގޮތަށް އަމަލުކުރުމަށް އެންމެނަށް އިލްތިމާސްކޮށްފަ އެވެ. އަދި ގަވާއިދާ ހިލާފުވާ ފަރާތްތަކާ މެދު ކުރިއަށް އޮތް ތަނުގައި ވެސް ތަންފީޒީ އިދާރާތަކާ ގުޅިގެން ހަރުކަށި ފިޔަވަޅުތައް އަޅަމުން ގެންދާނެ ކަމަށް އިންޒާރު ދިނެވެ.
މިއީ ޑޮލަރުގެ ކަޅު ބާޒާރު ހުއްޓުވުމަށްޓަކައި ކަމާ ބެހޭ އިދާރާތައް ގުޅިގެން ހާއްސަ ޓާސްކްފޯހެއް އުފައްދައި، ސަރުކާރުން ވަރުގަދަ މަސައްކަތްތަކެއް ފެށި ފަހުން ލައިސަންސް ހިފެހެއްޓި ނުވަތަ ބާތިލުކުރި ދެ ވަނަ މަނީ އެކްސްޗޭންޖެވެ. މީގެ ކުރިން މިދިޔަ އޮގަސްޓު މަހުގެ 20 ވަނަ ދުވަހު އެމްއެމްއޭ އިން ވަނީ އެކްސްޕްރެސް މަނީ އެކްސްޗޭންޖުގެ ލައިސަންސް ވެސް ބާތިލުކޮށްފަ އެވެ.
އެކްސްޗޭންޖު ހުއްދަ ހިފެހެއްޓި އެމްއެސް ފައިނޭންސްއަކީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލް އާއި އޭނާގެ ބައިވެރިންގެ މައްޗަށް ތުހުމަތު ކުރެވޭ ހިޔާނާތުގެ މައްސަލަތަކުގައި މަނީ ލޯންޑާކުރަން ބޭނުންކުރި އެއް ވިޔަފާރި އެވެ.
މި މައްސަލައިގައި ނެރުނު އޮޑިޓު ރިޕޯޓުގައިވާ ގޮތުގައި، އެފްއޭއެމްގެ ޓްރެއިނިން ގްރައުންޑެއް ހަދަން ހުޅުމާލޭން ދިން ބިމުން ތަންތަން ކުއްޔަށް ދީގެން ލިބުނު 52 މިލިއަން ރުފިޔާގެ ތެރެއިން 14 މިލިއަން ރުފިޔާއަށް ހިޔާނާތްތެރިވި އެވެ. މި ފައިސާގެ ތެރެއިން 8.9 މިލިއަން ރުފިޔާ ޖަމާކޮށްފައިވަނީ އެމްއެސް ފައިނޭންސްގެ އެކައުންޓުތަކަށެވެ.
އިކޮނޮމިކް މިނިސްޓްރީގެ ބިޒްނަސް ޕޯޓަލްގައިވާ މައުލޫމާތަށް ބަލާއިރު، އެމްއެސް ފައިނޭންސްގެ ހިއްސާދާރުންނަކީ އިބްރާހިމް އަހުމަދު (މަނިކު ސޭޓު) އާއި ނުޝްރަތު ޔޫސުފް ނަމަކަށް ކިޔާ މީހެކެވެ.
