މެޑްރިޑް (އޮކްޓޫބަރު 2) - ސްޕެނިޝް ލީގުގެ ރެފްރީ ކޮމިޓީގެ ކުރީގެ ނައިބް ރައީސް އެންރިކޭޒް ނެގްރެއިރާ އަށް ފައިސާ ދީގެން ރެފްރީންނަށް ނުފޫޒު ފޯރުވަން ބާސެލޯނާ އިން ކޮށްފައިވާ ކަންކަން ދިރާސާކޮށް ރެއާލް މެޑްރިޑުން ޔުއެފާ އަށް މައްސަލަ ހުށަހަޅަައިފި އެވެ.
ޔުއެފާ އިން ވަނީ 15 ފަހަރު ޗެމްޕިއަންސް ލީގުގެ ޗެމްޕިއަންކަން ހޯދި ރެއާލުން ހުށަހެޅި އެ މައްސަލަ ދިރާސާކުރަން ފަށައިފަ އެވެ.
ރެއާލުން ބުނީ، އާ ރިޕޯޓްގައި 50،000 އަށް ވުރެން ގިނަ ގަނޑު ހިމެނޭ ކަމަށެވެ. އަދި، މިއީ ރެފްރީންގެ ނަޒާހަތްތެރިކަން ހިފެހެއްޓުމަށްޓަކައި ޔުއެފާގެ ޝާމިލުވުން އޮވެގެން ހައްލެއް އަންނަން ޖެހޭ ކަމެއް ކަމަށް ބުނެފަ އެވެ.
ސްޕެއިންގެ މީޑިއާތަކުން ނެރުނު ރިޕޯޓްތަކެއްގައިވާ ގޮތުން ސްޕެއިން ލީގުގެ ރެފްރީސް ކޮމިޓީގައި އިސްކޮށް އުޅުނު ނެގްރެއިރާގެ ހިއްސާ އޮންނަ ކުންފުންޏެއް ކަމަށްވާ، ޑެޒްނިލް 96 އަށް ބާސެލޯނާ އިން ވަނީ 2001 އިން 2018 އަށް ޖުމްލަ އެކު، ނުވަ މިލިއަން ޑޮލަރު ދީފަ އެވެ.
އެކި ފަހަރު މަތިން ނެގްރެއިގާއާ ގުޅުވާ މައްސަލަތަކުގައި ރެއާލްގެ ތުހުމަތު ބާސެލޯނާ އަށް އަމާޒުވަމުން އަންނައިރު، އެ ކްލަބުން އަންނަނީ މި ކަންކަމާ ދެކޮޅު ހަދަމުންނެވެ. ބާސެލޯނާގެ ރައީސް ޖޮއާން ލަޕޯޓާ އާއި ކުރީގެ ދެ ރައީސް، ސަންޑްރޯ ރޮސެލް އަދި ޖޯސެފް މާރިއާ ބާޓޮމެއު އަށް ވެސް މި މައްސަލައިގައި ދައުވާކުރަން ސްޕެއިނުގެ މީޑިއާތަކުން އަންނަނީ ގޮވާލަމުންނެވެ.
ރެއާލުން ހުށަހެޅި މައްސަަލައާ ބެހޭގޮތުން ޔުއެފާ އިން ބުނެފައިވަނީ، މި ވަގުތު ކަންކަން ކުރިއަށްދަނީ ރިވިއު މަރުހަލާގައި ކަމަށެެވެ. ރެއާލުން ނެރުނު ބަޔާނެއްގައި މި މައްސަލަ ވީ އެންމެ އަވަހަށް ހައްލު ކޮށްދިނުމަށް ގޮވާލާފައިވާއިރު، ބާސެލޯނާ އިން ވަނީ ޔުއެފާ އިން އެ ކްލަބާ ދެކޮޅަށް ހުށަހެޅި މި މައްސަަލަ ބަލަން ފަށާފައިނުވާ ކަމަށް ބުނެފަ އެވެ.
ބާސެލޯނާ އިން ވަނީ 2023 ވަނަ އަހަރު ވެސް މި ފަދަ މައްސަލަތަކެއް އައުމުން، ޔުއެފާގެ އިންވެސްޓިގޭޓަރުން މި ކަންކަން ބެލި ކަމަށް ބުނެފަ އެވެ. އަދި، އެ ކްލަބަށް ފިޔަަވަޅު ނޭޅި ގޯހެއް ހެދިކަން ސާބިތުނުވާތީ ކަމަށާއި އެއީ ހަގީގަތް ކަމަށް ބާސެލޯނާ އިން ވަނީ ބުނެފަ އެވެ.
ލަލީގާގެ ރަައީސް، ހަވިއޭ ޓެބާސް، 2023 ވަނަ އަހަރުގެ މާޗް މަހު ދިން އިންޓަވިއުއެއްގައި ބުނެފައިވަނީ، މި ވަގުތު އެ އަށް އެޅޭނެ މާ ބޮޑު ފިޔަވަޅެއް ނެތީ ކުޅިވަރުގެ ގަވާއިދުތަކުގެ ތެރެއިން އެ މައްސަލަ ބެލޭނެ ހާލަތެއް ނެތުމުން ކަމަށާއި އެކަށީގެންވާ މިންވަރަށް ހެކި ވެސް ނެތް ކަމަށެވެ.
