މެޑްރިޑް (އޮކްޓޫބަރު 17) - ސްޕެއިނުން 2035 ވަނަ އަހަރު ރަގްބީ ވޯލްޑް ކަޕް ބާއްވަން ކުރި ބިޑްގައި ބޭނުންކުރާނެ ސްޓޭޑިއަމްތަކުގެ ތެރޭގައި، ރެއާލް މެޑްރިޑްގެ ސަންޓިއާގޯ ބާނަބައު އާއި ބާސެލޯނާގެ ނޯ ކޭމްޕް ވެސް ހިމަނައިފި އެވެެ.
ސްްޕެއިނުގެ ރަގްބީ ފެޑެރޭޝަނުން ބުނީ، މިހާތަނަށް ތާރީހުގައި ވެސް ބާއްވާ އެންމެ ފުރިހަމަ ރަގްބީ ވޯލްޑް ކަޕް ހޯސްޓްކުރުމަކީ ސްޕެއިނުގެ ހާއްސަ އަމާޒުކަމަށެވެ. އަދި، ދުނިޔޭގެ އެކި ކަންކޮޅުތަކުގައި 700 މިލިއަން ސްޕެނިޝް ބަހުން ވާހަކަ ދައްކާ މީހުން އެބަތިބި ކަމަށާއި މިއީ ވެސް ރަގްބީ ވޯލްޑް ކަޕްގެ މައުލޫމާތު ފުޅާކޮށް ގެންދަން ބާރު އެޅޭނެ ކަމެއް ކަމަށެވެ.
ރަގްބީ ވޯލްޑް ކަޕް، 2035 ވަނަ އަހަރު ބޭއްވުމުގެ ބިޑް ސްޕެއިނަށް ކާމިޔާބުވެއްޖެނަމަ، ފައިނަލް މެޗު ކުޅެން ނިންމާނީ ބާސެލޯނާގެ ނޯ ކޭމްޕްގަ އެވެ. އަދި، އެއާ އެކު ވެގެންދާނީ، 100،000 މީހުންނަށް ވުރެން ގިނަ ސަޕޯޓަރުންގެ ކުރިމަތީގައި ރަގްބީ ވޯލްޑް ކަޕެއްގެ ފައިނަލް ކުޅޭނެ ފުރަތަމަ ފަހަރަށެވެ.
އަންނަ އަހަރުގެ ޖުލައި/އޮގަސްޓް ހިސާބުގައި، 2035 ގެ ރަގްބީ ވޯލްޑް ކަޕް ހޯސްޓްކުރާނެ ގައުމެއް އިއުލާނުކުރަން ތައްޔާރުވަމުން އަންނައިރު، ސްޕެއިނާ ވާދަކުރަން، އާޖެންޓީނާ އާއި ޖަޕާނުން ވެސް އަންނަނީ ބިޑް ތައްޔާރުކުރަމުންނެވެ.
ސްޕެއިނުން ރަގްބީ ވޯލްޑް ކަޕްގެ ކަންކަން ފުރިހަމަ ކުރުމާއި ޕްރޮޕޯސަލް ވަރުގަދަކުރުމަށް ބާރު އެޅުމަށްޓަކައި، 2030 ވަނަ އަހަރު ސްޕެއިނުން މޮރޮކޯ އާއި ޕޯޗުގަލްގައި ހޯސްޓްކުރާ ފީފާ ވޯލްޑް ކަޕްގެ ކަންކަން ވެސް ރަގްބީ ވޯލްޑް ކަޕްގައި ބޭނުންކުރަން ވަނީ ނިންމައިފަ އެވެ. އެ ގޮތުން، ދުރާލާ ރޭވިގެން، އޮފިޝަލުންނާއި ސެކިއުރިޓީން ތަމްރީން ކުރުމާއި ޓެކްނޮލޮޖީގެ އެހީގައި ގެނެވޭނެ ބަދަލުތަކަށް ކަންކަން ރޭވުން ވެސް ހިމެނެ އެވެ.
ރެއާލްގެ ސަންޓިއާގޯ ބާނަބައު އާއި ބާސެލޯނާގެ ނޯ ކޭމްޕްގެ އިތުރުން، ދެން، ފުޓްބޯޅަ ޓީމެއްގެ މަޝްހޫރު ދަނޑެއް ރަގްބީ ވޯލްޑް ކަޕްގެ ބިޑްގައި ހިމަަނާފައިވަނީ، ވެލެންސިއާގެ އެސްޓަޑިއޯ މަސްޓެއްޔާ އެވެ.
