ޑްރަގު ކެފޭއެއްގެ ގޮތުގައި ހިންގަމުންދިޔަ އެޕާޓުމެންޓަކުން ހަ މީހުން ހައްޔަރުކޮށްފި އެވެ.
އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އެ އެންމެން ވެސް 30 ދުވަހުގެ މުއްދަތަކަށް ބަންދުގައި ބެހެއްޓުމަށް ކްރިމިނަލް ކޯޓުން ވަނީ އަމުރުކޮށްފަ އެވެ.
އެ މީހުންގެ ކޯޓު އަމުރުން އެނގޭ ގޮތުގައި، އެ ހަ މީހުން ހައްޔަރުކުރި އެޕާޓުމެންޓުން ގިނަ އަދަދެއްގެ މަސްތުވާތަކެއްޗާއި މަސްތުވާތަކެތި ބަންދުކުރަން ބޭނުންކުރާ ކައްޓާގެ އިތުރުން ފައިސާ ވެސް ފެނިފައިވެ އެެވެ.
ކޯޓުގައި ފުލުހުން ބުނެފައި ވަނީ އެ އެޕާޓުމެންޓަކީ މަސްތުވާތަކެތި ވިއްކާ ބޭނުންކުރުމުގެ އިންތިޒާމު ހަމަޖައްސާފައިވާ ތަނެއް ކަމަށެވެ.
އެ މައްސަލައިގައި ހައްޔަރުކުރީ އަޒްމީ ރަޝީދު، ފިނިވާގެ، ރ. އަނގޮޅިތީމު އާއި އަހުމަދު ނޫހު މުހައްމަދު، ކެމަރާގެ، ރ. ދުވާފަރު އާއި މުހައްމަދު ހަމްދާން، ވައިޓްރޯސް، ކ. ތުލުސްދޫ އާއި އަހުމަދު އަކްރަމް، ހ. މިލްކުބުޝް، ކ. މާލެ ގެ އިތުރުން، މައިޝަމް މުހައްމަދު، ދޯދިލް، ފ. ފީއަލި އަދި، ޒަޔާން ޔޫސުފް، ކުޅުދޫ، ގުލްފާމްގެ، ނ. ކެނދިކުޅުދޫ އެވެ.
އެ ހަ މީހުން ވެސް މަސްތުވާތަކެއްޗަށް ޕޮޒިޓިވްވެފައިވާ ކަމަށް ކޯޓު އަމުރުން އެނގެ އެވެ. އަދި، އެ ތަނުން ޒަޔާންގެ އަތުން 18،200ރ. ފެނިފައިވާ ކަމާއި އެ ފައިސާއަކީ އޭނާ ފޯނެއް ގަތުމަށް އެއްކުރި ފައިސާ ކަމަށް ކޯޓުގައި ބުނެފައިވާކަން ވެސް ކޯޓު އަމުރުން އެނގެ އެވެ.
އެ މީހުންގެ ތެރެއިން، މަސްތުވާތަކެއްޗާ ހަވާލުވެފައި ވަނީ އަޒްމީ ރަޝީދު އެވެ. އޭނާ ބުނެފައި ވަނީ އެ ތަކެއްޗަކީ އޭނާ ބޭނުންކުރުމަށް ގެންގުޅޭ ތަކެތި ކަމަށެވެ.
