މަސްތުގެ ހާލުގައި ހުރެ، އާންމު އުނދަގޫކުރާ މީހާ ފުލުހުން ހައްޔަރުކޮށްފި އެވެ.
އެ މައްސަލައިގައި ފުލުހުން ހައްޔަރުކޮށްފައި ވަނީ އަހުމަދު ފައިރަޝް ނަމަކަށް ކިޔާ މީހެކެވެ. އޭނާއަކީ މި އަހަރުގެ ކުރީކޮޅު މީހަކަށް މަރުގެ އިންޒާރު ދިން މައްސަލައެއްގައި ވެސް 15 ދުވަސް ބަންދުގައި ހޭދަކޮށްފައިވާ މީހެކެވެ.
އެކަމާ ބެހޭގޮތުން، ފުލުހުންގެ ތަރުޖަމާނު އަހުމަދު ޝިޔާމް އަދަދު ނޫހަށް ވިދާޅުވީ އޭނާ ހައްޔަރު ކުރުމަށްފަހު، އެ މައްސަލައަށް ގާނޫނީ ގޮތުން ހައްލެއް ހޯދައިދެވޭތޯ ފުލުހުން މަސައްކަތް ކުރާނެ ކަމަށެވެ.
"އެ ކަން ހައްލު ކޮށްދިނުމަށްޓަކައި ގާނޫނުގެ ތެރެއިން އަޅުގަނޑުމެން މަސައްކަތް ކުރާނަން، މީގެ ކުރިން ވެސް އަޅުގަނޑުމެން ވާނީ ފުލުހުންގެ ބެލުމުގެ ދަށަށް އެ މީހާ ގެނެސް ފިޔަވަޅު އަޅާފައި،" ޝިޔާމް ވިދާޅުވި އެވެ.
އެ މީހާ ހައްޔަރުކޮށްފައި މިވަނީ، އޭނާގެ އުނދަގުލުން ސަލާމަތް ކޮށްދިނުމަށް އެދި ފުލުސް އޮފީހުގައި މިއަދު މީހަކު ބަނޑުހައި ހޫނުކަމުގެ ހަޅުތާލެއް ކުރަމުން ދަނިކޮށެވެ.
ހެންވޭރުގައި ހުންނަ އާދަމް ހަލީމް ބިލްޑިންގައި މިއަދު ހެނދުނުން ފެށިގެން ބަނޑުހައި ހޫނުކަމުގެ ހަޅުތާލެއް ކުރަމުންދާ މުހައްމަދު ސައީދު މި ނޫހަށް ބުނީ، ހަޅުތާލު ކުރަންޖެހުނީ ދޮޅު އަހަރުދުވަސްވީއިރު، ވެސް އެކަމަށް އެއްވެސް ހައްލެއް ނުލިބުމުން ކަމަށެވެ.
"މަގުމައްޗަށް ހަމަ ކުއްލިއަކަށް ހުރެފައި ފެން އުކާނެ، ތެޔޮ އުކާނެ، ދެން ސޯސަންމަގު ކޮޅުގައި ހުންނާނެ ވެމްކޯ މީހުން ބޭނުންކުރާ މަގު ބަންދުކުރާ ބޯޑުތަކެއް، އެ ބޯޑުތައް ގެނެސް ބޯޑުތައް ބަހައްޓައި [މަގަށް] ނުވަދެވޭ ގޮތަށް، ކުޑަކުދިން ގޮވައިގެން ދާއިރު ވެސް އެންމެ ނުބައިއެއްޗެހި ކިޔާނެ،" ސައީދު ބުންޏެވެ.
މަސްތުވާތަކެތީގެ ޝިކާރައަކަށްވެފައިވާ މީހާ ހ. ކަށިމާ ހިނގުމާއި ދޫހިމެރި މަގުގައި ދިރިއުޅޭ މީހުންނާއި އެ މަގުތަކުން ދަތުރުކުރާ މީހުންނަށް އެތައް ތުރާލެއް ޖައްސަމުންދާ ކަމަށް އޭނާ ބުންޏެވެ. ނަމަވެސް، މިއަދާ ހަމައަށް އެއްވެސް ހައްލެއް ލިބިފައި ނުވާ ކަމަށް އޭނާ ބުންޏެވެ.
