މާލޭގައި ފުޅާ ދާއިރާއެއްގައި ބަނގުރާގެ ވިޔަފާރިކުރަމުންދާ ނެޓްވޯކެއްގެ އިސް މީހާ ކަމަށް ތުހުމަތުކޮށް ދިވެއްސަކު ހައްޔަރުކޮށްފި އެވެ.
ފުލުހުން ބުނީ ބަނގުރާ ވިއްކާ ނެޓްވޯކަކަށް އަމާޒުކޮށް ހެންވޭރު ގެއެއް ބަލައި ފާސްކޮށް އަތުލައިގަތް ބަނގުރަލުގެ މައްސަލައިގައި ހައްޔަރުކުރީ ހ. ކަރޯގެ، މުހައްމަދު ރަޝްވާން އައްބާސް، 53، ކަމަށެވެ. އޭނާގެ ހައްޔަރުކޮށް ބަންދާމެދު ގޮތެއް ނިންމަން ކޯޓަށް ހާޒިރުކުރުމުން 15 ދުވަހަށް ވަނީ ބަންދުކޮށްފަ އެވެ.
"ތަހުގީގަށް މިހާތަނަށް ލިބުނު މައުލޫމާތުގެ އަލީގައި، މި ނެޓްވޯކްގައި އިސްކޮށް ހަރަކާތްތެރިވާ ކަމަށް ތުހުމަތު ކުރެވޭ ހ. ކަރޯގެ، މާލެ، މުހައްމަދު ރަޝްވާން އައްބާސް، 53، ކޯޓު އަމުރެއްގެ ދަށުން ފުލުހުންގެ ބެލުމުގެ ދަށަށް ގެނެވިފައިވަނީ 2026 އޮކްޓޫބަރު 13 ވަނަ ދުވަހު،" ފުލުހުން ބުންޏެވެ.
ފުލުހުން ބުނީ މި ނެޓްވޯކާ ގުޅިގެން ހައްޔަރުކުރި ތިން ބިދޭސީންގެ ތެރެއިން ދެ ބިދޭސީންނަކީ ރަޝްވާންގެ މުވައްޒަފުން ކަމަށާއި ބަނގުރާ ވިއްކަނީ ރަޝްވާނުގެ އިރުޝާދަށް ކަމަށް މުވައްޒަފުން ބުނެފައިވާ ކަމަށެވެ.
ރަޝްވާން ކޯޓުގައި ބުނެފައިވަނީ އޭނާގެ މައްޗަށް ކުރާ ތުހުމަތުތަކަށް އިންކާރު ކުރާ ކަމަށާއި ބަނގުރާ ފެނުނު ތަން ބަލައި ފާސްކޮށްފައިވަނީ އޭނާ އާއި އޭނާގެ މަސްލަހަތު ހިމާޔަތްކޮށްދޭނެ މީހެއްގެ ހާޒިރުގައި ނޫން ކަމަށެވެ.
މި މައްސަލައިގައި ހައްޔަރުކުރި ތިން ބިދޭސީންނަކީ ބަންގްލަދޭޝްއަށް ނިސްބަތްވާ އަލް އަމީން, 34، އާއި ޕޮލިން, 43، އަދި އެމްޑީ ރަކިބް ހޮސެން، 25، އެވެ. އޭގެ ތެރެއިން އަލް އމީން އަދި ޕޮލިން ފަސް ދުވަހަށް ބަންދުކުރިއިރު، ރަކިބްގެ ބަންދަށް ޖެހީ 15 ދުވަހެވެ.
ފުލުހުންގެ ކައުންޓާ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓް ގުޅިގެން ހިންގި މި އޮޕަރޭޝަންގައި 826 ބަނގުރާ ފުޅި އަތުލައިގަތެވެ. އެ ތަކެތި ހުރީ ހާމައަށް ސްޓޯ ރޫމެއްގެ އެކި ތަންތަނުގައި ބަހައްޓާފަ އެވެ.
މީގެއިތުރުން އަތުލައިގަތް ބައެއް ބަނގުރާ ފުޅިތައް ފޮށިތަކުގައި ބަންދުކޮށްފައި ހުރިއިރު، އެ ފޮށިގަނޑުތަކުގައި ބަނގުރާގެ ބްރޭންޑްތައްވެސް ލިޔެފައި ހުއްޓެވެ.
