މަސްތުވާތަކެތީގެ ޝިކާރައަކަށްވެފައިވާ މީހެއްގެ އުނދަގުލުން ސަލާމަތް ނުވުމުން ހައްލެއް ހޯދައިދިނުމަށް އެދި ފުުލުހުންގެ މަރުކަޒުގައި ބަނޑުހައި ހޫނުކަމުގެ ހަޅުތާލެއް ފަށައިފި އެވެ.
ހެންވޭރުގައި ހުންނަ އާދަމް ހަލީމް ބިލްޑިންގައި މިއަދު ހެނދުނުން ފެށިގެން ބަނޑުހައި ހޫނުކަމުގެ ހަޅުތާލެއް ކުރަމުންދާ މުހައްމަދު ސައީދު މި ނޫހަށް ބުނީ، ހަޅުތާލު ކުރަންޖެހުނީ އެކަމަށް އެއްވެސް ހައްލެއް ނުލިބުމުން ކަމަށެވެ.
އެގޮތުން، މަސްތުވާތަކެތީގެ ޝިކާރައަކަށްވެފައިވާ މީހާ ހ. ކަށިމާ ހިނގުމާއި ދޫހިމެރި މަގުގައި ދިރިއުޅޭ މީހުންނާއި އެ މަގުތަކުން ދަތުރުކުރާ މީހުންނަށް އެތައް ތުރާލެއް ޖައްސަމުންދާ ކަމަށް އޭނާ ބުންޏެވެ. ނަމަވެސް، މިއަދާ ހަމައަށް އެއްވެސް ހައްލެއް ލިބިފައި ނުވާ ކަމަށް އޭނާ ބުންޏެވެ.
"މި ތަނަށް އައިސް އަހަރެން ބަޔާން ދިން ފަހުން ވެސް 6 މަސް ވެދާނެ. މި ކަމުގައި ކޮންޓިނުއަސްކޮށް މައްސަލަ ހުށަހަޅާތާ ދޮޅު އަހަރުވެއްޖެ، ދެން ފުލުހުންގެ އިންނާނެ ޑެޑް [ޑްރަގް އެންފޯސްމެންޓު ޑިޕާޓުމެންޓު] ކިޔާ ޑިޕާޓުމެންޓެއް، އެ މީހުންނަށް ވީޑިއޯތައް ވެސް ހުށަހަޅައިފަ ހުންނާނީ، 20 އަށްވުރެ ގިނަ ވީޑިއޯ. މިނިސްޓަރާ ހަމައަށް ވެސް މި މައްސަލަ ގެންދިޔައިން، އޭގެ ފަހުން ވެސް ދެ މަސް ވެއްޖެ،" ސައީދު ބުންޏެވެ.
އޭނާ ބުނީ އެ ސަރަހައްދުގައި ދިރިއުޅޭ މީހުންނަށް އާންމު އުނދަގޫ ކުރަމުން ދަނީ އަހުމަދު ފައިރަޝް ނަމަކަށް ކިޔާ މީހެއް ކަމަށެވެ. މި ނޫހަށް ކަށަވަރުވެފައިވާ ގޮތުގައި، އޭނާއަކީ މި އަހަރުގެ ކުރީކޮޅު މީހަކަށް މަރުގެ އިންޒާރު ދިން މައްސަލައެއްގައި ވެސް 15 ދުވަސް ބަންދުގައި ހޭދަކޮށްފައިވާ މީހެކެވެ.
"މަގުމައްޗަށް ހަމަ ކުއްލިއަކަށް ހުރެފައި ފެން އުކާނެ، ތެޔޮ އުކާނެ، ދެން ސޯސަންމަގު ކޮޅުގައި ހުންނާނެ ވެމްކޯ މީހުން ބޭނުންކުރާ މަގު ބަންދުކުރާ ބޯޑުތަކެއް، އެ ބޯޑުތައް ގެނެސް ބޯޑުތައް ބަހައްޓައި [މަގަށް] ނުވަދެވޭ ގޮތަށް، ކުޑަކުދިން ގޮވައިގެން ދާއިރު ވެސް އެންމެ ނުބައިއެއްޗެހި ކިޔާނެ،" ސައީދު ބުންޏެވެ.
އޭނާ ހައްޔަރުކޮށްގެން ވިޔަސް، އެ މައްސަލައަށް ހައްލެއް ހޯދައިނުދެނީ ފުލުސް އޮފީހުގައި ކުރަމުންދާ ބަނޑުހައި ހޫނުކަމުގެ ހަޅުތާލު ހުއްޓައިނުލާނެކަމަށް ސައީދު ބުންޏެވެ.
