ހުޅުމާލެ ފޭސް 2، ގައި ތިން މީހުން އަރުވައިގެން ވަންވޭއާ ދެކޮޅަށް ދުއްވި ސައިކަލެއް ފުލުހުންނަށް ފިލަން އުޅެނިކޮށް ސައިކަލެއްގައި ޖެހި ހިނގި އެކްސިޑެންޓާ ގުޅިގެން ތިން މީހުން އަރުވައިގެން ދުއްވި ސައިކަލުގައި އިން އެކަކު ހައްޔަރުކޮށްފި އެވެ.
ފުލުހުން ބުނީ މި މައްސަލައާ ގުޅިގެން ހައްޔަރުކުރީ ލ. މާމެންދޫ، އިރުމަތީގެ، މުހައްމަދު ސައިފް، 27 ކަމަށެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ހަތް ދުވަހަށް ވަނީ ބަންދުކޮށްފަ އެވެ.
އޭނާއަކީ ލައިސަންސް ނެތި ދުއްވުމުގެ 13 މައްސަލައެއްގެ ރެކޯޑާއި އަހަރީ ފީ އާއި ރޯޑްވާދިނަސް އަދި އިންޝުއަރެންސް ނެތި ދުއްވުމުގެ މައްސަލަތަކާއި މުވާސަލާތީ ވަސީލަތެއް ބޭނުން ކުރަމުން ދުއްވުމުގެ ރެކޯޑް އޮންނަ މީހެއް ކަމަށް ފުލުހުން ބުންޏެވެ.
މި އެކްސިޑެންޓުގައި ސައިފް ހިމެނޭ ގޮތަށް ޖުމްލަ ފަސް މީހަކަށް އަނިޔާވި އެވެ. އޭގެ ތެރެއިން ބައެއް މީހުންގެ ހާލު ސީރިއަސްކަމުން ފަރުވާދެމުންދަނީ އައިސީޔޫގަ އެވެ.
ފުލުހުން ބުނީ މި އެކްސިޑެންޓު ހިނގަން މެދުވެރިވި އެއް ސައިކަލުގައި ތިން މީހުން އަރައިގެން ދަތުރުކޮށްފައިވަނީ ވަންވޭއާ ހިލާފަށް ކަމަށާއި އެއީ ވަގަށް ނަގާފައިވާ ސައިކަލެއް ކަމަށްވެސް ބެލެވޭ ކަމަށެވެ. އޭގެއިތުރުން އެ ސައިކަލު ދުއްވަން އިން މީހާ އަތުގައި ލައިސަންސް ނެތް ކަމަށްވެސް ފުލުހުން ބުންޏެވެ.
މި އެކްސިޑެންޓުގައި ތިން މީހުން އަރުވައިގެން ދުއްވި ސައިކަލުގައި އިން ހ. ލާމިޔާ، އަހްމަދު އުވެއިސްއަކީ ގެސްޓްހައުސްއަކަށް ފައިސާ ދެއްކި ކަމަށް ބުނެ ފޭކް ސްލިޕެއް ފޮނުވި މައްސަލައެއްގައި ހައްޔަރުކޮށްފައި ހުއްޓާ މުއްދަތު ހަމަނުވަނީސް މި މަހު ފުލުހުންގެ ބަންދުން ދޫކޮށްލި މީހެކެވެ.
މަކަރާއި ހީލަތުގެ މި މައްސަލައިގައި އުވެއިސްގެ ބަންދުގެ މުއްދަތު ހަމަވާ ގޮތަށް އޮތީ އޮކްޓޯބަރު 16، އަށެވެ. ނަމަވެސް ފުލުހުން ބުނި ގޮތުގައި އޭނާގެ މައްސަލައިގެ ތަހުގީގު ނިމުމުން އެ މުއްދަތު ހަމަވުމުގެ ކުރިން މި މަހުގެ 6، ގައި ދޫކޮށްލާފައިވާ ކަމަށެވެ.
