މާލޭ ގަލޮޅުގައި ހުންނަ ގެއެއްގެ އެޕާޓްމަންޓަކަށް ހުއްދަނޫން ގޮތުގައި ވަދެ، އެތަނުގައި ތިބި މީހުން ހިފަހައްޓައި ތޫނު ހަތިޔާރުން ބިރުދައްކައިގެން ގިނަ އަދަދެއްގެ ފައިސާ ފޭރިގަތް މައްސަލައިގައި ދެ މީހަކު ހައްޔަރުކޮށް ޝަރީއަތް ނިމެންދެން ބަންދުކޮށްފި އެވެ.
ފުލުހުން ބުނީ މި މައްސަލައިގައި ހައްޔަރުކުރީ ގ. ގަސްރު، ތަލާލް މުހައްމަދު، 41، އަދި މ. މުލި، ނައިޓްރޯސް، އަހްމަދު އުބައިދު، 46 އެވެ. އެ ދެ މީހުންގެ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ޝަރީއަތް ނިމެންދެން ވަނީ ބަންދުކޮށްފަ އެވެ.
މި މައްސަލައާ ގުޅިގެން ގަލޮޅު ގޭގެ އާއިލާ މީހަކަށް ތުހުމަތު ކުރެވިގެން އޭނާވެސް ހައްޔަރުކޮށް ބަންދަށް 15 ދުވަސް ވަނީ ޖަހާފަ އެވެ. އެއީ ހއ. ހޯރަފުށި، އަޅިވިލާގެ، ޒާހިރު އަލިދީދީ، 41 އެވެ.
ފުލުހުން ބުނީ މައްސަލައިގައި ޒާހިރު އަލިދީދީގެ ބައިވެރިވުން އޮތް ކަމަށް ބެލެވޭ ކަމަށާއި ހާދިސާގެ ކުރިން ފޭރުނު މީހުން އޭނާއާއެކު ހަރަކާތްތެރިވި ކަމަށެވެ.
"އެގެއަށްވެސް މީނާ [ޒާހިރު އަލިދީދީ] އާއެކު ދިޔަ ކަމަށާއި، ހާދިސާއަށް ހައްޔަރުކުމާ ހަމައަށް މީނާ ގެއަށް އެނބުރި އައިސްފައި ނުވާކަމަށާއި، މީނާ ހައްޔަރުކުރެވުނީ މި އަމަލު ހިންގުމުގައި އަމަލީގޮތުން ބައިވެރިވި މީހަކު ހައްޔަރުކުރަން ހިންގި އޮޕަރޭޝަންގައި އޭނާއާއެކު ހުއްޓާކަމަށް އައިއޯ ފާހަގަކުރި،" ކޯޓު އަމުރުގައި ބުންޏެވެ.
ފުލުހުންގެ ވާހަކަތަކަށް ރައްދުދެމުން ޒާހިރު އަލިދީދީ ބުނީ އެކަން ކުރި މީހުންނަކީ އޭނާއާ ގޭމެއްގެ ތެރެއިން ދިމާވި މީހެއް ކަމަށާއި އެމީހުން އޭނާ ހިފަހައްޓަފައި ނުދެވޭ ގޮތަށް ހެދުމަށްފަހު ތަޅުދަނޑި ހިފައިގެން ގޮސް ކުރި ކަމެއް ކުރީ ކަމަށެވެ.
މި މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ.
