މިއަދު ފަތިހު ފުލުހެއް ގައިގައި ސައިކަލުން ޖެއްސީ ބަޔަކު ރާވައިގެން ގަސްތުގައި ކަމަށާއި އެ ސައިކަލު ދުއްވީ 100 ކިލޯމީޓަރަށްވުރެ ބާރުމިނުގައި ކަމަށް ކޮމިޝަނާ އޮފް ޕޮލިސް އަހުމަދު މުހައްމަދު (ޓޫފޯ) ބުނެފި އެވެ.
ޕޮލިސް ކޮމިޝަނަރު ނެރުއްވި ބަޔާނެއްގައި ވިދާޅުވެފައި ވަނީ ހުޅުމާލެއަށްދާ ހައިވޭގައި ޑިއުޓީއަށް ހުރި ޕޮލިސް އޮފިސަރު ގައިގައި ސަައިކަލުން ޖެއްސީ، މަގުމަތީގެ ރައްކާތެރިކަން ކަށަވަރު ކުރަން ފުލުހުން ފަށާފައިވާ ކެމްޕެއިނަށް ހުރަސް އަޅައި ނަފްސާނީ ގޮތުން ފުލުހުން ބަލިކަށިކުރަން ކަމަށެވެ.
"މިހާދިސާއާ ގުޅިގެން މިހާތަނަށް ބެލިބެލުމުން، މިއީ މަގުމަތީގައި ނުރައްކާތެރިކޮށް އުޅަނދު ދުއްވާ ފަރާތްތަކާ ދެކޮޅަށް ފުލުހުން މިހާރު ހިންގަމުންގެންދާ ހާއްސަ އޮޕަރޭޝަނަށް ހުރަސްއަޅައި، މިކަމުގައި ހަރަކާތްތެރިވާ ފުލުހުން ނަފްސާނީގޮތުން ބަލިކަށިކޮށްލައި ފަހަތަށް ޖެއްސުމުގެ މަގުސަދުގައި ގަސްތުގައި ހިންގާފައިވާ އަމަލެއް ކަމަށް ބެލެވޭ،" އެ ބަޔާނުގައި ކޮމިޝަނަރު ވިދާޅުވި އެވެ.
އެ ހާދިސާގައި ފުލުސް މީހާއަށް ސީރިއަސް އަނިޔާތަކެއް ލިބިފައިވާ ކަމަށް އަހުމަދު މުހައްމަދު ވިދާޅުވި އެވެ. ފުލުސް މީހާގެ ދަތް ބިނދި، އަނގަމަތި ވަނީ ފަޅައިގެން ގޮސްފަ އެވެ. އޭނާއަށް އޭޑީކޭ ހޮސްޕިޓަލުގައި މިވަގުތު ދަނީ ފަރުވާދެމުންނެވެ. ކޮމިޝަނަރުގެ ބަޔާނުގައި ވިދާޅުވެފައި ވަނީ، ޑިއުޓީ އޮފިސަރު ގައިގައި ޖެއްސި ސައިކަލު ދުއްވީ ގަޑިއަކު 100 ކިލޯމީޓަރަށް ވުރެ ބާރު މިނެއްގައި ކަމަށެވެ.
"މިހާދިސާ ހިނގާފައިވަނީ 100 ކިލޯމީޓަރަށްވުރެ ބާރު ސްޕީޑްގައި ދުއްވާފައި ދިޔަ ސައިކަލު މަގުމަތީގައި ތިބި ފުލުހުންނާ ދިމާއަށް ބާރު ސްޕީޑްގައި ގޮސް މަގުމަތީގައި ފުލުހުން ޖަހާފައިވާ ބެރިކޭޑްގައި ޖައްސައި، އެއާ އެކު ގޮސް ޑިއުޓީގައި ހުރި ފުލުސް އޮފިސަރުގެ ގައިގާ ޖެހިގެން،" އެ ބަޔާނުގައި އޭނާ ވިދާޅުވި އެވެ.
ފުލުސް މީހާގެ ގައިގައި ޖެއްސީ ހަތަރު ސައިކަލު ރޭވިގެންނެވެ. ފުލުސް އޮފިސަރު ގައިގައި ޖެއްސި ސައިކަލު ދުއްވި ދެ މީހުން ވަނީ ހައްޔަރުކޮށްފަ އެވެ. އަދި އެކަމުގައި އުޅުނު ކަމަށް ބެލެވޭ އިތުރު ސައިކަލެއް ނަގައި އިތުރު ދެ މީހުން ވެސް ހައްޔަރުކޮށްފައިވާ ކަމަށް ފުލުހުން ބުންޏެވެ.
"މި ހާދިސާ ހިނގި ވަގުތު މިކަމުގައި އިތުރު ތިން ސައިކަލެއް ބައިވެރިވެފައިވާކަން ވަނީ ފާހަގަ ކުރެވިފަ .... މި އަމަލު ހިންގި ސައިކަލު ޓޯކޮށް އެ ސައިކަލް ގައި ތިބި ދެމީހުން މިހާރުވަނީ ފުލުހުންގެ ބެލުމުގެ ދަށަށް ގެނެސްފަ. އަދި މިކަމުގައި ޝާމިލްވާ އިތުރު ދެމީހަކާއި ސައިކަލެއް ލޮކޭޓްކޮށް މިހާރު ވާނީ ފުލުހުންގެ ބެލުމުގެ ދަށަށް ގެނެސްފަ،" ކޮމިޝަނަރު ވިދާޅުވި އެވެ. .
އެ ބަޔާނުގައި އިތުރަށް ބުނެފައި ވަނީ، ފުލުހުންނަށް ބިރު ދައްކަން މަސައްކަތް ކުރި ނަމަވެސް ފަސްޖެހުމެއް ނެތި ޓްރެފިކުގެ އޮޕަރޭޝަން ކުރިއަށްގެންދާނެ ކަމަށެވެ. އަދި ގަވާއިދާ ހިލާފުވާ ފަރާތްތަކާމެދު ފިޔަވަޅު އަޅަމުންގެންދާނެ ކަމަށް ވެސް ފުލުހުން ބުންޏެވެ.
"ފުލުހުން މިހާރު ފަށާފައިވާ މި ހާއްސަ އޮޕަރޭޝަނަށް އެކި ގޮތްގޮތުން ހުރަސްއަޅައި، ފުލުހުންގެ މަސައްކަތްތައް ހުއްޓުވުމަށް ހިންގާ މިފަދަ ކަންކަމަށް ފަސްނުޖެހި، މެދުކެނޑުމެއްނެތި މި އޮޕަރޭޝަން ކުރިއަށް ގެންދާނެކަމުގެ ފުރިހަމަ ޔަގީންކަން ވެސް މި ފުރުސަތުގައި އަރުވަން. މީގެ އިތުރުން މިފަދަ އަމަލުތައް ހިންގާ ފަރާތްތަކާމެދު އެޅެން ހުރި ގާނޫނީ ފިޔަވަޅުތައް، ގާނޫނީ ހަމަތަކުގެ މަތިން އިތުރަށް ހަރުކަށި ކުރާނެ ވާހަކަ ވެސް މިފުރުސަތުގައި ދަންނަވަން،" އޭނާ ވިދާޅުވި އެވެ.
