ކުޅުދުއްފުށި ސިޓީ އަމީނީމަގުގައި ދެ ސައިކަލު ޖެހި ހިނގި ނުރައްކާތެރި އެކްސިޑެންޓެއްގައި ތިން މީހަކަށް އަނިޔާވެގެންަ ކުޅުދުއްފުށި ރީޖަނަލް ހޮސްޕިޓަލުގައި ފަރުވާދޭން މިއަދު ފަށައިފި އެވެ.
ފުލުހުން ބުނީ އެކްސިޑެންޓުގައި އަނިޔާވެފައިވަނީ 20 އަހަރުގެ ފިރިހެނަކާއި 32 އަހަރުގެ އަންހެނެއްގެ އިތުރުން 17 އަހަރުގެ ކުޑަކުއްޖަކަށެވެ. އޭގެ ތެރެއިން ފިރިހެން މީހާ އާއި ކުޑަކުއްޖާ އެއް ސައިކަލުގައި އިންއިރު، އަންހެން މީހާ އިނީ އަނެއް ސައިކަލުގަ އެވެ.
އަނިޔާވި ފިރިހެން މީހާގެ ބޯފަޅައިގެންގޮސް ހަށިގަނޑުގެ އެކި ތަންތަން މަށައިގެން ގޮސްފައިވާއިރު، އަންހެން މީހާގެ ފައި ބިނދި ހަށިގަނޑުގެ އެކި ތަންތަން ވަނީ މަށައިގެން ގޮސްފައި ކަމަށާއި ކުޑަކުއްޖާގެ ވާތު ފަޔަށް ތަދުވެ ކަށިމަތި މަށައިގެން ގޮސްފައިވާކަމަށް ފުލުހުން ބުންޏެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި އެކްސިޑެންޓު ހިނގަން މެދުވެރިވީ އަންހެން މީހާ އިން ސައިކަލު ޔޫ ޓާނެއް ނަގަން އުޅެނިކޮށް ފިރިހެން މީހާ ދިޔަ ސައިކަލުން ޖެހިގެންނެވެ.
ފުލުހުންގެ ތަފާސް ހިސާބުތައް ދައްކާ ގޮތުގައި މި އަހަރު މިހާތަނަށް އެކްސިޑެންޓުގެ 2،378 މައްސަލަ ރިޕޯޓުކޮށްފައިވާއިރު، އޭގެ ތެރެއިން 95 މައްސަލައަކީ މި މަހު ހުށަހެޅުނު މައްސަލަތަކެވެ.
