ހުޅުމާލެއަށްދާ ހައިވޭގައި ވަރަށް ބާރަށް ދުއްވި ސައިކަލެއް ކޮންޓްރޯލުން ނެއްޓި، މަގުމަތީ ޑިއުޓީ ކުރަން ހުރި ފުލުހެއް ގައިގައި ޖެހި އެ ފުލުސް މީހާއަށް ސީރިއަސް އަނިޔާތަކެއް ލިބިއްޖެ އެވެ.
އެ ހާދިސާ ހިނގީ ފަތިހު 4:29 ހާއިރު ކަމަށް ފުލުހުން ތަރުޖަމާނު ވިދާޅުވި އެވެ. އަނިޔާ ލިބުނު ފުލުސް މީހާއަށް އޭޑީކޭގައި ފަރުވާދެމުން އަންނަ ކަމަށް ފުލުހުން ބުންޏެވެ.
"އަނިޔާވި ޕޮލިސް އޮފިސަރަށް ސީރިއަސް އަނިޔާތަކެއް ލިބިފައިވާތީ އޭޑީކޭގައި ދަނީ ފަރުވާދެމުން،" ފުލުހުން ބުންޏެވެ.
ބާރު ސްޕީޑުގައި ދުއްވި ސައިކަލު ފުލުހުން ހިފަހައްޓާފައިވާ ކަމަށް ފުލުހުން ބުންޏެވެ. އަދި ސައިކަލާއި ސައިކަލު ދުއްވަން އިން މީހާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ވެސް ފުލުހުން ބުންޏެވެ.
މީގެ ކުރިން ޖޫން 1، 2013، ގައި ވެސް ޑިއުޓީ ކުރަން ހުރި ފުލުސް އޮފިސަރެއްގެ ގައިގައި ސައިކަލަކުން ޖެހި ހާދިސާއެއް ހިނގި އެވެ. އެ ހާދިސާގައި ކޮންސްޓަބަލް މިސްބާހު އަބްދުﷲ، 22، ވަނީ ނިޔާވެފަ އެވެ.
މިސްބާހު ގައިގައި ސައިކަލުން ޖެއްސީ ގަސްދުގަ އެވެ. އެއީ އޭގެ ކުރިން ވެސް ފުލުހުން ގައިގައި ސައިކަލުން ޖައްސައިގެން ހަމަލާތަކެއް ދިން ދެ މީހުން ކަމަށް އެއިރު ފުލުހުން ބުނެފައިވެ އެވެ.
