ނުރައްކާތެރިކޮށް ދުއްވުމުގެ ރިކޯޑު އޮތް މީހުން ފުލުސް އޮފީހަށް ހާޒިރުކޮށް ނަސޭހަތްތެރިވަނީ

މަގުމަތީގައި ނުރައްކާތެރިކޮށް ދުއްވުމުގެ ރިކޯޑު އޮންނަ މީހުން ހާޒިރުކޮށް ނަސޭހަތްތެރިވެ، ގާނޫނީ އިންޒާރުދޭން ފުލުހުން ފަށައިފި އެވެ.

ފުލުހުންގެ މީޑިއާ އޮފިޝަލް އަދަދު ނޫހަށް ވިދާޅުވީ ނުރައްކާތެރިކޮށް ދުއްވުމުގެ ރިކޯޑު އޮތް މީހުން އެ އިދާރާއަށް ހާޒިރު ކުރުމަށްފަހު، އެފަދަ ކަމެއް ތަކުރާރު ނުކުރުމަށް ނަސޭހަތްތެރިވަމުންދާ ކަމަށެވެ.

"އަޅުގަނޑުމެން މި ދަނީ ނުރައްކާތެރިކޮށް މަގުމަތީގައި ވެހިކަލް ދުއްވުމުގެ ރިކޯޑު އޮތް މީހުން ހާޒިރުކޮށް އެ މީހުންނަށް ނަސޭހަތްތެރިވަމުން. އެފަދަ ކަމެއް ދެން ތަކުރާރުކޮށްފި ނަމަ، އެ މީހުންނާ ދެކޮޅަށް ޖިނާއީ ދައުވާ އުފުލާނެ ކަމުގެ އިންޒާރު ވެސް ދެން،" ފުލުހުން ބުންޏެވެ.

ފުލުހުން ވަނީ މީގެ ކުރިން މަގުތައް މަތީގައި ބާރަށް ވެހިކަލް ދުއްވުމުގެ ރިކޯޑު އޮތް 22 އަހަރުގެ ޒުވާނަކު ފުލުހަށް ހާޒިރުކޮށް މިއަދު ނަސޭހަތްތެރިވެފަ އެވެ.

ފުލުހުން ބުނީ އެ ޒުވާނާގެ ރިކޯޑުތަކުގެ ތެރޭގައި އާންމުންގެ ހިތްތަކުގައި ބިރުވެރިކަން އުފެދޭ ގޮތަށް މަގުމަތީގައި ސްޓަންޓު ޖައްސަމުން ދުއްވުމާއި އަރިއަރިއަށް ބާރު ސްޕީޑުގައި ދުއްވުން ހިމެނޭ ކަމަށެވެ.

ދިގު ކިޔުން: އެއްގަމު ދަތުރުފަތުރުގެ އާ ގާނޫނާއެކު އައި ބޮޑެތި ބަދަލުތައް

މި ބަދަލުތަކަށް ސޯޝަލް މީޑިއާގައި ތައުރީފާއި ފާޑުކިޔުން ވެސް ދަނީ އަމާޒުވަމުންނެވެ. ގާނޫނާމެދު ކޮންމެ ގޮތަކަށް ދެކުނު ނަމަވެސް އޮކްޓޯބަރު 1، 2026، އިން ފެށިގެން ގާނޫނަށް ބަދަލުތަކެއް އަންނާނެ. އެހެންކަމުން މި ލިޔުމުގައި މި ބަލައިލަނީ، ވެހިކަލްތަކާ ބެހޭ ގާނޫނުން އަލަށް ތައާރަފުވާ ކަންކަމާއި ރައްޔިތުންނަށް އެނގެން މުހިންމު މައުލޫމާތުތައް.

އޭގެ އިތުރުން، ވަންވޭއާ ހިލާފަށް ދުއްވުމާއި މޯބައިލް ފޯނުން ވާހަކަދައްކަމުން ދުއްވުމާއި އަހަރީ ފީ ހަމަވެފައި އޮއްވައި ދުއްވުން ވެސް އޭނާގެ ރިކޯޑުތަކުގެ ތެރޭގައި ހިމެނޭ ކަމަށް ފުލުހުން ބުންޏެވެ.

ނުރައްކާތެރިކޮށް މަގުމަތީގައި ވެހިކަލް ދުއްވާ މީހުން ހާޒިރުކޮށް ފުލުހުން ނަސޭހަތްތެރިވާން ފަށާފައިވާއިރު، މި މަހު އަމަލުކުރަން ފެށި އެއްގަމު ދަތުރުފަތުރުގެ އައު ގާނޫނުގައި ފުލުހުންނަށް ބޮޑެތި ޒިންމާތަކާއި ބާރުތައް ދީފައިވެ އެވެ.

އެގޮތުން، މަގުމަތީގައި ނުރައްކާތެރިކޮށް ދުއްވާ މީހުން 25،000ރ. އާއި 100،000ރ. އާ ހަމައަށް ޖޫރިމަނާ ކުރުމާއި ފަސް އަހަރާއި 10 އަހަރާ ދެމެދުގެ މުއްދަތަކަށް ލައިސެންސް ހިފެހެއްޓުމުގެ ބާރު އެ ގާނޫނުގެ ދަށުން ލިބެ އެވެ.

އަދި، ނުރައްކާތެރިކޮށް ދުއްވައިގެން މީހަކަށް އަނިޔާއެއް ވެއްޖެނަމަ، ދުއްވި މީހާ 100،000ރ. އާއި 500،000ރ. އާ ދެމެދުގެ އަދަދަކުން ޖޫރިމަނާ ވެސް އައު ގާނޫނުގެ ދަށުން ކުރެވެ އެވެ.

އައު ގާނޫނުގެ ދަށުން ލައިސެންސް ހިފެހެއްޓުމުގެ އިތުރުން، ލައިސެންސް ޑީމެރިޓް ކުރުމުގެ އައު ނިޒާމެއް ވެސް ތައާރަފުކުރަން ޖެހެ އެވެ. ލައިސެންސުން ޕޮއިންޓު ކެނޑުމަކީ މިހާރު ވެސް ކުރަމުން އަންނަ ކަމެކެވެ.

ގާނޫނުގައި ބުނެފައިވާ ގޮތުން، ޑީމެރިޓް ސިސްޓަމް ގާއިމްކޮށް އަމަލު ކުރަންޖެހެނީ ގާނޫނަށް އަމަލު ކުރަން ފަށާތާ ދެ އަހަރު ދުވަހުގެ ތެރޭގަ އެވެ. އެ ސިސްޓަމުގެ ތެރެއިން ޑްރައިވިން އެޑިއުކޭޝަން ޕްރޮގްރާމް ނެގޭނެ ގޮތް ވެސް ފަރުމާ ކުރަން ޖެހެ އެވެ.

ގާނޫނުގައި ބުނެފައިވާ ގޮތުން، ވަކި މިންވަރަކަށް ލައިސަންސުން ޕޮއިންޓު ކެނޑުމުން ލައިސަންސް ހިފަހައްޓަން ޖެހެ އެވެ. އޭގެ ފަހުން ލައިސަންސް ލިބޭނީ ޑްރައިވިން އެޑިކޭޝަން ޕްރޮގްރާމެއް ފުރިހަމަ ކުރުމުންނެވެ. މިއީ މި ގާނޫނުން މުޅިން އަލަށް ތައާރަފް ކުރާ ކަމެކެވެ. 

ޕޮއިންޓު ޑީމެރިޓް ކުރާތާ ދެ އަހަރު ފާއިތުވާއިރު އިތުރު އެއްވެސް ޕޮއިންޓެއް ކެނޑިފައިނުވާ ނަމަ ކުރިން ރިކޯޑު ކުރެވިފައިވާ ޕޮއިންޓުތައް އުނި ކުރެވޭނެ އެވެ.