ރަސްމާލެއިން އީގަލް ހިލްސްއަށް ދޭ ސަރަހައްދުގައި ދިވެހި ފުލުހުންނަށް ނުތިބެވޭނެ ކަމަށް މި ސަރުކާރުގެ ވަޒީރުން އޭނާ ގާތު ބުނި ކަމަށް ޝެއިހް ޒަމްޒަމް ފާރިޝް ބުނެފި އެވެ.
ފޭސްބުކްގައި ޒަމްޒަމް ކުރި ޕޯސްޓެއްގައި ބުނީ ރަސްމާލެ މަޝްރޫއުއާ ގުޅޭގޮތުން މައުލޫމާތު ސާފުކުރުމަށްޓަކައި މި ސަރުކާރުގެ ވަޒީރު ފެންވަރުގެ ފަސްވަރަކަށް ބޭފުޅުންނާ ބައްދަލުކުރި ކަމަށެވެ. އަދި، އޭގެ އިތުރުން ރައްޔިތުންގެ މަޖިލީހުގެ ގިނަ އަދަދެއްގެ މެންބަރުންނާ ވާހަކަދައްކާފައިވާނެ ކަމަށް އެ ޕޯސްޓުގައި ބުންޏެވެ.
"އަޅުގަނޑުމެންގެ ގާތުގައި ސަރުކާރުގެ ބައެއް ވަޒީރުން ވިދާޅުވެފައިވަނީ، އެ ތަނުގައި ދިވެހި ފުލުހުންނަށް ނުތިބެވޭނެ ކަމުގަ. އެތާ ތިބޭނީ އަލައްބާރުގެ އަމިއްލަ ސެކިއުރިޓީގެ ކަމުގަ. ދިވެހި ފުލުހުންނަށް ކްރައިމްއެއް ހިނގައިގެން ރިޕޯޓު ކުރީމަ ކަމުގަ. ދިވެހި ފުލުހުންނަށް ހަމައެކަނި ލިބޭނީ އެ ތަނުގެ ސީސީޓީވީ ކެމެރާތަކުގެ އެކްސެސް ކަމުގަ،" ޒަމްޒަމް ކުރި ޕޯސްޓުގައި ބުނެފައިވެ އެވެ.
އެ ވާހަކަތައް އެގޮތަށް ސަރުކާރުގެ ވަޒީރުން ދެއްކި ކަމަށް އޭނާއާއެކު އެ ބައްދަލުވުންތަކުގައި ބައިވެރިވި އެހެން ޝެއިހުން ހެކިވާނެ ކަމަށް އެ ޕޯސްޓުގައި ބުންޏެވެ.
ރަސްމާލެ ޑީލްއާ ގުޅޭގޮތުން މިހައިތަނަށް 70 އަށްވުރެ ގިނަ ޝެއިހުންނާ ބައްދަލުކޮށްފައިވާ ކަމަށާއި އޭގެ ތެރެއިން އެންމެ ޝެއިހަކު ފިޔަވައި ދެން ތިބި ހުރިހާ އެންމެން ވެސް އެ މަޝްރޫއުއާ މެދު ކަންބޮޑުވުން ހުރި ކަމަށް ޒަމްޒަމް ގެ ޕޯސްޓުގައި ބުންޏެވެ.
އޭގެ އިތުރުން، ރަސްމާލެ މަޝްރޫއުއާ ގުޅޭގޮތުން އިލްމުވެރިންގެ ގުޅުމުން 100 އެއްހައި ސަފުހާގެ ރިޕޯޓެއް ތައްޔާރުކޮށްފައިވާ ކަމަށް ޒަމްޒަމްގެ ޕޯސްޓުގައި ބުންޏެވެ. އެ ރިޕޯޓު ސަރުކާރާއި ދައުލަތުގެ ކަމާބެހޭ ފަރާތްތަކަށް ވަރަށް އަވަހަށް ފޮނުވާނެ ކަމަށް އުއްމީދުކުރާ ކަމަށް ވެސް އެ ޕޯސްޓުގައި ބުންޏެވެ.
"އެ ރިޕޯޓު ސަރުކާރާއި ދައުލަތުގެ ކަމާބެހޭ ފަރާތްތަކަށް ވަރަށް އަވަހަށް ފޯރާނެކަމުގައި އުއްމީދު ކުރެވެ އެވެ. އޭރުން ތިޔަ ބޭފުޅުންނާއި ދިވެހިރާއްޖޭގެ އެންމެހައި ރައްޔިތުންނަށް މިކަމުގެ ހަގީގަތް ސާފުވާނެ ކަމުގައި އުއްމީދު ކުރަން،" އެ ޕޯސްޓުގައި ބުންޏެވެ.
ޒަމްޒަމް މިފަދަ ޕޯސްޓެއް ކުރީ ގައުމީ ސަލާމަތާ ގުޅޭ ކަންކަމުގައި އޭނާ ދޮގުހަދަމުންދާ ކަމަށް ވިދާޅުވެ ހޯމް މިނިސްޓަރު، އަލީ އިހުސާން އިންޒާރު ދެއްވުމުންނެވެ.
އިހުސާން، ޒަމްޒަމްއަށް "އިންޒާރު" ދެއްވީ ވެސް ފޭސްބުކްގަ އެވެ. އިހުސާން ތުހުމަތު ކުރެއްވީ ރަސްމާލެ ޕްރޮޖެކްޓާ ގުޅޭ ގޮތުން ޒަމްޒަމް ދަނީ "ފިތުނަފަސާދަ އުފެދޭނެހެން ދޮގު ވާހަކަ" ފަތުރަމުންދާ ކަމަށެވެ.
އީގަލް ހިލްސްއަށް ރަސްމާލެ ދޫކޮށްލަން ސިއްރު އެގްރިމެންޓެއްގައި ސޮއި ކުރީ ސެޕްޓެމްބަރު 21، ގަ އެވެ. ދައުލަތުގެ ފައިސާއިން ހިއްކި ރަސްމާލެ ދޫކޮށްލަނީ އެކުއިޒިޝަން ކޮސްޓެއް އަދި ބިމު ކުއްޔެއް ނުނަގާ ގޮތަށެވެ.
ރަސްމާލެ ދޫކޮށްލަނީ 99 އަހަރަށް ކަމަށް ސަރުކާރުން ބުނެ އެވެ. އެއީ ގާނޫނުތައް ހުއްދަ ކުރާ ކަމަކަށް ނުވާތީ ސަރުކާރުން އުޅެނީ އެ ޕްރޮޖެކްޓަށް ފަހިކުރަން ގާނޫނުތަކެއް ހަދާށެވެ. އަދި ނޮވެމްބަރު 11، ގައި އެގްރިމެންޓުގައި ދާއިމީ އެގްރިމެންޓުގައި ސޮއި ކުރެވޭތޯ މިހާރު ދަނީ މަސައްކަތް ކުރަމުންނެވެ.
ރަސްމާލެ ދެނީ 99 އަހަރަށް ކަމަށް ސަރުކާރުން ބުނި ނަމަވެސް އީގަލް ހިލްސް އިން އެންމެ ފުރަތަމަ ބުނީ، ރަސްމާލެއިން ތަނެއް ވިއްކާލުމުން ގަންނަ ފަރާތަށް 99 އަހަރުގެ އާ ލީސް ޕީރިއަޑެއް ލިބޭނެ ކަމަށެވެ.
