ޔުނައިޓެޑް އެރަބް އެމިރޭޓްސްގެ އީގަލް ހިލްސްއަށް ރަސްމާލެ ދޫކޮށްލުމާމެދު ފާޑުކިޔާތީ ހޯމް މިނިސްޓަރު އަލީ އިހުސާން އޭނާއަށް ބިރު ދައްކައި އިންޒާރު ދީފައިވާ ކަމަށް ޝެއިހު ޒަމްޒަމް ފާރިޝް ތުހުމަތުކޮށްފި އެވެ.
އޭނާއަށް ހޯމް މިނިސްޓަރު އިންޒާރު ދެއްވި ކަމަށް ޒަމްޒަމް ތުހުމަތު ކުރީ، ގައުމީ ސަލާމަތާ ގުޅޭ ކަންކަމުގައި އޭނާ ދޮގުހަދަމުންދާ ކަމަށް އިހުސާން ވިދާޅުވުމުންނެވެ.
"މިއަދު ބާރު އޮތީތީ ތިޔަގޮތަށް އިންޒާރު ދެއްވިދާނެ. ޖަލަށް ވެސް ލެވިދާނެ. ނަމަވެސް އަލުން ބައްދަލުވާނެ ދުވަހެއް އަދި އެބައޮތްކަން ހަނދުމަފުޅުގައި ބަހައްޓަވާ. މާތް ﷲ އަށް ބިރުވެތިވޭ. އެކަލާނގެ ކޯފާއަށް ބިރުވެތިވޭ،" ޒަމްޒަމް ފޭސްބުކް ގައި ކުރި ޕޯސްޓެއްގައި ބުންޏެވެ.
ހޯމް މިނިސްޓަރު އިހުސާން، ޒަމްޒަމްއަށް "އިންޒާރު" ދެއްވީ ވެސް ފޭސްބުކްގަ އެވެ. އިހުސާން ތުހުމަތު ކުރެއްވީ ރަސްމާލެ ޕްރޮޖެކްޓާ ގުޅޭ ގޮތުން ޒަމްޒަމް ވަނީ "ފިތުނަފަސާދަ އުފެދޭނެހެން ދޮގު ވާހަކަ" ފަތުރަމުންދާ ކަމަށެވެ.
މި ޕްރޮޖެކްޓާއި ގުޅުވައިގެން ރައްޔިތުންތެރޭ ފިތުނަފަސާދަ އުފެދޭނެހެން ދޮގުވާހަކަ ފަތުރަމުން ދާއިރު ގައުމީ ސަލާމަތާއި ގުޅޭކަންކަމުގައި ދޮގު ވާހަކަ ނުފެތުރުމަށް ދަންނަވަން. ކަންކަމުގެ މައުލޫމާތު ނެތްނަމަ އެ މައުލޫމާތު އެނގޭފަރާތްތަކުން ސާފުކުރުމަށް ދަންނަވަން،" އިހުސާން ވިދާޅުވެފައިވެ އެވެ.
އީގަލް ހިލްސްއަށް ރަސްމާލެ ދޫކޮށްލަން ސިއްރު އެގްރިމެންޓެއްގައި ސޮއި ކުރީ ސެޕްޓެމްބަރު 21، ގަ އެވެ. ދައުލަތުގެ ފައިސާއިން ހިއްކި ރަސްމާލެ ދޫކޮށްލަނީ އެކުއިޒިޝަން ކޮސްޓެއް އަދި ބިމު ކުއްޔެއް ނުނަގާ ގޮތަށެވެ.
ރަސްމާލެ ދޫކޮށްލަނީ 99 އަހަރަށް ކަމަށް ސަރުކާރުން ބުނެ އެވެ. އެއީ ގާނޫނުތައް ހުއްދަ ކުރާ ކަމަކަށް ނުވާތީ ސަރުކާރުން އުޅެނީ އެ ޕްރޮޖެކްޓަށް ފަހިކުރަން ގާނޫނުތަކެއް ހަދާށެވެ. އަދި ނޮވެމްބަރު 11، ގައި އެގްރިމެންޓުގައި ދާއިމީ އެގްރިމެންޓުގައި ސޮއި ކުރެވޭތޯ މިހާރު ދަނީ މަސައްކަތް ކުރަމުންނެވެ.
ރަސްމާލެ ދެނީ 99 އަހަރަށް ކަމަށް ސަރުކާރުން ބުނި ނަމަވެސް އީގަލް ހިލްސް އިން އެންމެ ފުރަތަމަ ބުނީ، ރަސްމާލެއިން ތަނެއް ވިއްކާލުމުން ގަންނަ ފަރާތަށް 99 އަހަރުގެ އާ ލީސް ޕީރިއަޑެއް ލިބޭނެ ކަމަށެވެ.
