ރައީސް މުހައްމަދު މުއިއްޒުގެ ސަރުކާރުގެ މިސްރާބު ކުރިއަށް އޮތް ދެ އަހަރު ދުވަހުގެ ތެރޭގައި ހުންނާނީ "އޮޔާދާ ބޮނބިގަނޑެއް ހެން" އެއްވެސް އަމާޒެއް ނެތި ކަމަށް، އެމްޑަބްލިޔޫއެސްސީގެ ކުރީގެ މެނޭޖިން ޑިރެކްޓަރު އަބްދުލް މަތީން ވިދާޅުވެއްޖެ އެވެ.
އަދަދު ނޫހުގެ "އެތެރެފުށް" ޕްރޮގްރާމްގައި ވާހަކަދައްކަވަމުން މަތީން ވަނީ، ރައީސް މުއިއްޒަށް 2028 ވަނަ އަހަރުގެ ރިޔާސީ އިންތިހާބު ކާމިޔާބު ނުކުރެއްވޭނެ ކަމަށް ވިދާޅުވެފަ އެވެ. އަދި އެކަން ހުދު ރައީސް މުއިއްޒަށް ވެސް އެނގިވަޑައިގަންނަވާނެ ކަމަށް އޭނާ ވިދާޅުވި އެވެ.
"ރައީސް މުއިއްޒު ކަންކަން ކުރައްވާ ގޮތާއި އަމަލުކުރައްވަމުން ގެންދެވި ގޮތަށް ބަލާއިރު، 2028 ﷲ ގެ އިރާދަފުޅުން ރައީސް މުއިއްޒުއަށް ލިބިވަޑައިގަންނަވާނެ އެއްގޮތެއް ވެސް ނެތް،" މަތީން ވިދާޅުވި އެވެ.
މަތީން ވަނީ ސަރުކާރުގެ ސިޔާސަތުތަކުގައި ވަކި ސާފު މިސްރާބެއް ނެތްކަން ފާހަގަކުރައްވައި، އެކަމުގެ މިސާލެއްގެ ގޮތުން ސަރުކާރުގެ ބޯހިޔާވަހިކަމުގެ ބިޔަ މަޝްރޫއު ކަމަށްވާ "ރަސްމާލެ" މަޝްރޫއު ނަންގަވާފަ އެވެ.
"މިސާލަކަށް ރަސްމާލެއަށް ބަލާކަމުގައި ވަންޏާވެސް ފުރަތަމަ ރާޖު ކިޔާ މީހަކާ ހަވާލުކުރީ [ސަރުކާރުން] އެއްވެސް ލާރިއެއް ނުދާ ގޮތަށް،" މަތީން ވިދާޅުވި އެވެ.
ރަސްމާލެ މަޝްރޫއާ ގުޅޭގޮތުން އިތުރަށް މަތީން ވިދާޅުވީ، އެ ބިމަށް ހަދާނެ ގޮތެއް ނޭނގި ސަރުކާރު އޮތީ ހޫނު ބޮނޑިބަތް ގުޅައެއް އަތަށް ލައިގެން އުޅޭ މީހަކާ އެއް ފަދަ ހާލަތެއްގައި ކަމަށެވެ.
މި މަޝްރޫއަކީ ފެށުނުއިރު ވެސް ގޯސްކޮށް ފެށިފައިވާ ކަމެއް ކަމަށާއި، ގޯހެއްގެ މައްޗަށް ބިނާކުރާ ކޮންމެ ކަމަކުން ނުކުންނާނީ އިތުރު ގޯސްތައް ކަމަށް އޭނާ ވިދާޅުވި އެވެ.
ރަސްމާލެ މަޝްރޫއާ ގުޅިގެން ސަރުކާރަށް މަތީން ކެނޑިނޭޅި އަމާޒުކުރައްވަމުން ގެންދަވާ ފާޑުކިޔުންތަކާ ގުޅިގެން، ސަރުކާރުގެ އިސް ބައެއް އޮފިޝަލުން ގެންދަވަނީ ސޯޝަލް މީޑިއާގައި މަތީނަށް ބަހުގެ ހަމަލާތައް ރައްދުކުރައްވަމުންނެވެ.
