އެމްޑަބްލިޔޫއެސްސީގައި އޮތް ޖަޕާނުގެ ހިޓާޗީ ކުންފުނީގެ 20 ޕަސެންޓު ހިއްސާ ގަނެ، ސައްތައިން ސައްތަ ދިވެހި ސަރުކާރު ކުންފުންޏަކަށް ބަދަލުކުރަން ރައީސް މުހައްމަދު މުއިއްޒު ނިންމެވި ނިންމެވުމަކީ ގޯހެއް ކަމަށް، އެ ކުންފުނީގެ ކުރީގެ މެނޭޖިން ޑިރެކްޓަރު އަބްދުލް މަތީން ވިދާޅުވެއްޖެ އެވެ.
"އެއީ [ހިޓާޗީގެ ހިއްސާ ގަތުމަކީ] ރައީސް ބޭނުންފުޅުވާ ކަމެއް. އެހެންނަމަވެސް އެއީ ގޯސް ވިސްނުންފުޅެއް،" 'އަދަދު' ނޫހުގެ 'އެތެރެފުށް' ޕްރޮގްރާމުގައި މަތީން ވިދާޅުވި އެވެ.
މަތީން ވިދާޅުވީ، ދައުލަތުގެ މާލީ ހާލަތު އޮތް ގޮތުން ފިނޭންސް މިނިސްޓަރު ބަޖެޓު ސަޕޯޓު ހޯއްދެވުމަށް "ނާށިގަނޑު ހިއްޕަވައިގެން" އުޅުއްވާއިރު، އެމްޑަބްލިޔޫއެސްސީގެ ހިއްސާ ގަތުމަށް އެތައް މިލިއަން ޑޮލަރެއް ހޭދަކުރުމަކީ ދެކޮޅުޖެހޭ ކަމެއް ނޫން ކަމަށެވެ.
"ފުރަތަމަ، މިއަދުގެ ހާލަތަކީ ފިނޭންސް މިނިސްޓަރު އެ އުޅުއްވަނީ ނާށިގަނޑު ހިއްޕަވައިގެން ބަޖެޓު ސަޕޯޓް ހޯއްދަވަން. އެ ހިއްސާ 20 ޕަސެންޓު ގަންނަން ކިތައް މިލިއަން ޑޮލަރު ބޭނުންވާނެތޯ؟ އާދެ، ވިހި، ތިރީސް، ސާޅީސް މިލިއަން ޑޮލަރު،" މަތީން ވިދާޅުވި އެވެ.
މިފަދަ ނިންމުންތައް ނިންމަނީ ވަޒީރުންނާއި ސަރުކާރުގެ އިސް މަގާމުތަކުގައި ތިއްބެވި ބޭފުޅުންގެ ކޯޕަރޭޓް ގަވަނަންސް ފަރިތަ ނުވުމުން ކަމަށް ވެސް އޭނާ ވިދާޅުވި އެވެ.
ހިޓާޗީގެ ހިއްސާ ގަނެ އެމްޑަބްލިއުއެސްސީ 100 ޕަސެންޓު ސަރުކާރު ކުންފުންޏަކަށް ހަދަނީ
އެމްޑަބްލިއުއެސްސީގައި އޮތް ޖަޕާނުގެ ހިޓާޗީ ކުންފުނީގެ 20 އިންސައްތަ ހިއްސާ ގަނެ، އެ ކުންފުންޏަކީ ސައްތައިން ސައްތަ ސަރުކާރު ހިއްސާވާ ކުންފުންޏަކަށް ހެދުމަށް ނިންމާފައިވާކަން ރައީސް މުއިއްޒު އިޢުލާނު ކުރައްވައިފިއެވެ. މި ބަދަލަކީ ރައްޔިތުންނަށް ފޯރުކޮށްދޭ ޚިދުމަތްތައް ރަނގަޅު ކުރުމަށްޓަކައި ގެންނަ ބަދަލެއް ކަމަށާއި، މިކަމާ ގުޅޭ މަސައްކަތްތައް މިހާރު ފަށާފައިވާ ކަމަށް ރައީސް ވިދާޅުވިއެވެ.
އެފަދަ އެހެން މިސާލެއްގެ ގޮތުގައި މަތީން ނެންގެވީ އެމްޓީޑީސީ އެވެ. ދިވެހި ރައްޔިތުންނަށް ޓޫރިޒަމް ސިނާއަތުން ސީދާ ޖީބަށް ޑޮލަރު ލިބޭނެ ގޮތް ހެދުމަށް މަސައްކަތްކުރާއިރު، އެމްޓީޑީސީގެ ދަށުގައި އޮތް ރަށެއް ދޫކޮށްލަން މަސައްކަތް ކުރުމަކީ ދެކޮޅު ނުޖެހޭ ކަމެއްގެ ގޮތުގައި މަތީން ފާހަގަ ކުރެއްވި އެވެ.
ސަރުކާރު ހިއްސާވާ ކުންފުނިތައް ހިންގުމުގައި ކޯޕަރޭޓް ގަވާނަންސްގެ އުސޫލުތައް ނުހިފެހެއްޓޭކަން ފާހަގަކުރައްވައި މަތީން ވަނީ އެކަމަށް ބޮޑަށް ފާޑުވިދާޅުވެފަ އެވެ. ކުންފުނިތައް ރަނގަޅަށް ނުހިންގެނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް އެތަނުގެ ދައުރު އަދާނުކުރެވޭތީ ކަމަށް މަތީ ވިދާޅުވި އެވެ. އަދި ޕީސީބީ އާއި ކުންފުނިތަކުގެ ބޯޑުތަކަށް އެކަށީގެންވާ ބާރުތަކާއި މިނިވަންކަން ނެތުމުން ކަމަށް ވެސް އޭނާ ވިދާޅުވި އެވެ.
މަތީން ވިދާޅުވީ ސަރުކާރު ކުންފުނިތައް އުފައްދަނީ ސިޔާސީ ނުފޫޒުން އެކަހެރިކޮށް، ވަކި ކޯޕަރޭޓް ބޮޑީއެއްގެ ގޮތުގައި ހިންގުމަށް ކަމަށް ވިޔަސް، މިއަދު ފެންނަމުންދަނީ އެ ކުންފުނިތައް ސަރުކާރުގެ ޑިޕާޓްމަންޓްތަކަކަށް ބަދަލުކޮށްގެން ސިޔާސީ ބޭނުންތަކަށް ހިންގަމުންދާ މަންޒަރު ކަމަށެވެ.
ސަރުކާރުގެ ބޮޑެތި ކުންފުނިތައް ހިންގަންވީ ގޮތާމެދު ވާހަކަދައްކަވަމުން މަތީން ވިދާޅުވީ، އެންމެ ރަނގަޅު ގޮތަކީ ކުންފުނިތައް ލިސްޓުކޮށް، އޭގެ މަންފާ ރައްޔިތުންނަށް ލިބޭނެ ގޮތަށް އާންމުންގެ ހިއްސާ އިތުރުކުރުން ކަމަށެވެ. އަދި ކުންފުނިތައް ހިންގަން މެނޭޖްމަންޓާއި ބޯޑަށް ދޫކޮށްލުމަށްފަހު، ސަރުކާރުގެ ދައުރަކަށް ވާންޖެހޭނީ ޕޮލިސީ ހެދުމާއި، މޮނިޓަރކުރުމާއި އަދި ރެގިއުލޭޓްކުރުން ކަމަށް އޭނާ ވިދާޅުވި އެވެ.
ހިޓާޗީއަށް އެމްޑަބްލިޔޫއެސްސީގެ 20 ޕަސެންޓު ވިއްކާލީ ޖެނުއަރީ 2010، ގައި އޭރު އޮތް އެމްޑީޕީ ސަރުކާރުންނެވެ. އެއީ ހިއްސާއަކަށް 305.9 ޑޮލަރުގެ ރޭޓުން 53،400 ހިއްސާ އެވެ. އެ މުއާމަލާތް އަގުކޮށްފައިވަނީ 16 މިލިއަން ޑޮލަރުގަ އެވެ.
އޭރު ސަރުކާރުން ބުނެފައިވާ ގޮތުގައި ހިއްސާ ވިއްކާލީ 2008 ވަނަ އަހަރުގެ ނިޔަލަށް އެ ކުންފުނީގައި އޮތް ޑެންމާކުގެ އެޗްއޯއެޗް ވޯޓާ ޓެކްނޮލޮޖީގެ ހިއްސާތައް ގަންނަން ސަރުކާރުން ޖެހޭތީ އެވެ. އެމްޑަބްލިއެއެސްސީ 1995 ވަނަ އަހަރު އުފެދިގެން އައިއިރު އެޗްއޯއެޗް ވޯޓާ ޓެކްނޮލޮޖީގެ 24 ޕަސެންޓު ހިއްސާ އޮތެވެ.
