އެއްވެސް ހާމަކަމެއް ނެތްގޮތަށް ރަސްމާލޭގެ ބިމުން ދެބައިކުޅަ އެއްބައި ބޭރުގެ ކުންފުންޏަކަށް ދޭން ނިންމުމުން ސާފުވަނީ މި ސަރުކާރުން ކުރަނީ ރަނގަޅު ހެޔޮ ވެރިކަމެއް ނޫންކަން ކަމަށް އެމްޑަބްލިއުއެސްސީގެ ކުރީގެ މެނޭޖިން ޑިރެކްޓަރު، އަބްދުލް މަތީން ވިދާޅުވެއްޖެ އެވެ.
އަދަދު ނޫހުގެ އެތެރެފުށް ޕްރޮގްރާމުގައި ވާހަކަދައްކަވަމުން މަތީން ވިދާޅުވީ ސަރުކާރުގެ ބޭނުމަށް ކިތަންމެ ކުޑަ ކަމެއް ހޯދަން ޖެހުނަސް، އެކަން ކުރަން ވަކި އުސޫލެއް ހަމައެއް އޮންނަ ކަމަށެވެ. ނަމަވެސް، އެތައް ބިލިއަން ޑޮލަރެއްގެ އަގުހުރި މުދަލެއް ބޭރުގެ ބަޔަކަށް ދިންއިރު، ވާއެއް ނުވާއެއް ނޭނގޭ ކަމަށް އޭނާ ވިދާޅުވި އެވެ.
"އަޅުގަނޑުމެން ފޮތްފަންސޫރު ދައުލަތަށް ހޯދަން ވީމާ، ކޮފީ ދަޅު ހޯދަންވީމާ އެބަޖެހޭ އިއުލާނުކުރަން، ބިޑުކުރަން. އެކަމަކު 20 އަކަށް ބިލިއަން ޑޮލަރުގެ ދައުލަތުގެ މުދަލެއް މީހަކަށް ހިލޭ ދެވޭއިރުގައި މި ހަމަ، މީހެއް ކައިރީގައި އަހައިލުމެއް ކަހައިލުމެއް ވެސް ނެތް، ބިޑު ޕްރޮސެސްއެއް ވެސް ނެތް، ޓްރާންސްޕޭރެންސީއެއް ވެސް ނެތް،" މަތީން ވިދާޅުވި އެވެ.
"އެހެންވީމާ މި ނުވޭ ރަނގަޅު ހެޔޮ ވެރިކަމަކަށް، ދެ ފުށް ފެންނަ ވެރިކަމަކަށް ދެއްތޯ؟"
އޭގެ އިތުރުން، ބިޑު ކުރުމެއް ނެތި ރަސްމާލޭގެ 500 ހެކްޓަރުގެ ބިން އީގަލް ހިލްސް ކުންފުންޏަށް 99 ދޭން އެއްބަސްވި ކަމަށް ދިވެހި ސަރުކާރުން ބުނި ނަމަވެސް، އެތަނުން ޕްރޮޕާޓީއެއް ވިއްކާލާ ނުވަތަ ތަރިކައިގެން ގޮތުގައި ދެވަނަ ނުވަތަ ތިންވަނަ ނުވަތަ އެއަށްވުރެ ގިނަ ފަހަރަށް ވިޔަސް ދޭ ކޮންމެ ފަހަރަކު 99 އަހަރު އިތުރުވާކަން އީގަލް ހިލްސް ކުންފުނިން ހާމަކޮށްފައިވާކަން އޭނާ ފާހަގަކުރެއްވި އެވެ.
"އެހެންވީމާ އެގޮތަށް 99 ޕްލަސް ޕްލަސް އަހަރަށް ކުއްޔަށް ދިނުން އެއީ މިލްކު ކޮށްދިނުން އެއީ. އެހެންވީމާ އެއީ ގާނޫނުގައި އޮންނަ ދެފޮޅުވަތް ދޭތެރެއިން މިލްކުވެރިކަން ހޯދައިފައި އެއޮއް ފެންނަނީއޭ،" މަތީން ވިދާޅުވި އެވެ.
އެންމެ ކުރު މުއްދަތަށް ބެލިކަމުގައިވިޔަސް، 99 އަހަރު ވަންދެން ދުނިޔޭގައި ތިބެނީ ކިތައް މީހުންތޯ އޭނާ ސުވާލު އުފެއްދެވި އެވެ. އަދި، އެ އުމުރަށް އަޅާއިރު ދުނިޔޭގައި ތިބޭ މީހުންގެ ތެރެއިން ވެސް ގަދަވެ ސަލާމަތުން ތިބެނީ ކޮންބައެއްތޯ އޭނާ ސުވާލު އުފެއްދެވި އެވެ.
ރަސްމާލެއާމެދު ކަންބޮޑުވެގެން އުޅެނީ އެތަނުގެ ބައެއް އަލައްބާރުއަށް ދޭން ސަރުކާރުން ނިންމުމުން އެކަނި ނޫންކަމަށް މަތީން ވިދާޅުވި އެވެ. އޭނާ ވިދާޅުވީ ރަސްމާލެއަކީ ގޯސްތަކެއްގެ ސިލްސިލާއެއް ކަމަށެވެ.
ދިވެހިރާއްޖޭގައި އޮތް އެންމެ ބޮޑު މައްސަލައަކީ މާލެއަށް މީހުން ތޮއްޖެހުންކަން ފާހަގަކުރައްވައި މަތީން ވިދާޅުވީ އެ މައްސަލަ އެހެން އޮއްވައި އެތައް ސަތޭކަ މިލިއަން ޑޮލަރެއް ހަރަދުކޮށްގެން މާލެ ސަރަހައްދުގައި ސިޓީއެއް ބިނާކުރުމުގެ މަސައްކަތް ފެށުން އެއީ އޭގެ ޒާތުގައި ގޯހެއް ކަމަށް އޭނާ ވިދާޅުވި އެވެ.
އެގޮތުން، ރަސްމާލެ ހިއްކަން ކުރި ހަރަދާއި ހޭދަކުރި ވަގުތު، ރާއްޖޭގެ އެހެން ސަރަހައްދެއް ތަރައްގީ ކުރުމަށް އިންވެސްޓުކުރި ނަމަ، އޭގެ ފައިދާ މާބޮޑުވީސް ކަމަށް އޭނާ ވިދާޅުވި އެވެ.
"700 މިލިއަން ޑޮލަރުން ޒަމާނީ ސިޓީއެއް ތަރައްގީ ކުރެވޭެނ އައްޑޫ ސިޓީގައި، ލާމު އަތޮޅުގައި ހދ. އަތޮޅުގައި،" މަތީން ވިދާޅުވި އެވެ.
"ހަގީގަތަށް ދަންނަވަންޏާ ރައީސް މުއިއްޒު މިކަމުގައި ދޫދެއްވާފައި ތަންކޮޅެއް އޯޕެން މައިންޑެޑްކޮށް ފުޅާ ވިސްނުމެއްގައި ކުރިއަށް ގެންދަވާނަމަ ރައީސް މުއިއްޒު އަމިއްލަފުޅަށް އުފެއްދެވި ސިޓީއެއްގައި އެ ތަނުގެ އިމާރާތްތަކުގައި މިހާރު މީހުން ދިރިއުޅޭނެ."
އެހެންނަމަވެސް، އެ ސިޓީ ތަރައްގީކުރަން ޖެހޭނީ މާލެ ސަރަހައްދުގައި ކަމަށް ނިންމައިގެން އެ މަޝްރޫއު ކުރިއަށް ގެންދިޔައީމާ އޭގެ ހަގީގީ ކްރެޑިޓް ސަރުކާރަށް ނުލިބޭކަމަށް މަތީން ވިދާޅުވި އެވެ.
ފުށިދިއްގަރު ފަޅަކީ ރާއްޖޭގައި އޮތް އެންމެ ބޮޑު އެއް ފަޅުކަން ފާހަގަކުރައްވައި މަތީން ވިދާޅުވީ ރަސްމާލެ ތަރައްގީ ކުރާނީ އިކޯ ސިޓީއެއްގެ ގޮތުގައި ކަމަށް މުއިއްޒު އިއުލާނުކުރެއްވިއިރު، އެކަން ހާސިލު ކުރުމަށްޓަކައި ހިންގެވީ އިކޯސައިޑެއް ކަމަށެވެ.
"ރާއްޖޭގައި އޮތް ބޮޑު އެއްފަޅު ހިއްކާލީމި، ކޮންކަހަލަ ބޮޑު ތިމާވެށީގެ ޖަރީމާއެއްތޯ ދެއްތޯ؟ އެއީ އެއް ވާހަކަ، ތިމާވެށީގެ ގޮތުން ބަލާއިރު ދެކޮޅުޖެހޭ އެއްޗެއް ނޫން، ޕްލޭނެއް، އާބަން ޑިވެލޮޕްމެންޓަށް ބަލާއިރު ދެކޮޅުޖެހޭ އެއްޗެއް ނޫން، ދެން އަނެއްކާ އެތަނަށް ހަރަދުކުރީ ކިހިނެއްކަމެއް ނޭނގޭ،" މަތީން ވިދާޅުވި އެވެ.
ރަސްމާލެ ހިއްކުމުގެ މަސައްކަތް ސަރުކާރުން ކުރިއަށް ގެންދިޔައީ ނިންމަން ޖެހިފައި ހުރި ކުދިކުދި މަޝްރޫއުތައް މަޑުޖައްސައިލުމަށްފަހު، ކަމަށެވެ. މުޅި ރާއްޖެއަށް ޑޮލަރުގެ ބޮޑު ތަދެއް ކުރިމަތިވީ އެ ސަބަބާހުރެ ކަމަށް އޭނާ ވިދާޅުވި އެވެ.
ތަދު ދުވަސްވަރެއްގައި ރަސްމާލެ ހިއްކުމަށް އެތައް ހަރަދެއް ކުރުމުގެ ބަދަލުގައި ރަށްރަށުގެ ފެނާއި ނަރުދަމާގެ މަޝްރޫއުތައް ނިންމަން ހިފިނަމަ، ރައްޔިތުންގެ ލޯތްބާއި ތާއީދު މާބޮޑަށް މުއިއްޒުއަށް ލިބޭނެ ކަމަށް މަތީން ވިދާޅުވި އެވެ.
