މާލޭ ސިޓީ ކައުންސިލްގެ ބެލުމުގެ ދަށުގައި ހުރި މުހިންމު ބިންތަކާއި ތަންތަން ސަރުކާރަށް ނެގުމަށް ރައީސް މުހައްމަދު މުއިއްޒުގެ ސަރުކާރުން ނިންމާފައިވާ ނިންމުމަކީ ކައުންސިލްތަކުގެ ބާރު ކަނޑުވާލުމަށް ހިންގާ އަމަލެއް ކަމަށް ވިދާޅުވެ، ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު އަހުމަދު ޝަމްހީދު އެކަން ކުށްވެރިކުރައްވައިފި އެވެ.
މިކަމާ ގުޅިގެން ކަންބޮޑުވުން ފާޅުކުރައްވައި ޝަމްހީދު އެކްސްގައި ކުރެއްވި ޕޯސްޓެއްގައި ވަނީ، ސަރުކާރުގެ މި ނިންމުމަކީ ލާމަރުކަޒީ ނިޒާމު ފުނޑާލައި، ބާރުތައް މަރުކަޒީކުރުމަށް ސަރުކާރުން ކުރަމުންދާ މަސައްކަތެއްގެ ގޮތުގައި ވިދާޅުވެފަ އެވެ.
"މާލޭ ސިޓީ ކައުންސިލްގެ ބެލުމުގެ ދަށުގައި ހުރި މަސް މާރުކޭޓާއި، ލޯކަލް މާރުކޭޓާއި، އާންމު މައިޒާންތަކާއި ފާހާނާތައް ސަރުކާރަށް ނެގުމަކީ ބާރުތައް މަރުކަޒީކުރުމަށް ކުރަމުންދާ އަމަލުތަކަށް އިތުރުވި ބޮޅެއް،" ޝަހްމީދު ވިދާޅުވި އެވެ.
"މީގެ ކުރިން ގާނޫނަށް ބަދަލުުގެނެސް ޓްރެފިކް ބެލެހެއްޓުމުގެ ބާރާއި ވެހިކަލް ރަޖިސްޓްރީ ފީގެ އާމްދަނީ އަތުލުމަށްފަހު، މިހާރު ބިންތައް އަތުލައި ކައުންސިލްތަކުގެ ބާރު ކަނޑުވަން ހިންގާ މިފަދަ އަމަލުތައް ކުށްވެރިކުރަން."
މައްސަލައިގެ ފަސްފަހަތް
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން، ރަށު ކައުންސިލްތަކާއި ސިޓީ ކައުންސިލްތަކުގެ އިހުތިސާސް ތެރޭގައި ހިމެނޭ ބިންތަކާއި، މާރުކޭޓުތަކާއި، ޕާކުތައް ފަދަ އާންމު ތަންތަން ތަރައްގީކޮށް ބެލެހެއްޓުމުގެ ބާރު ދީފައިވަނީ އެ ކައުންސިލަކަށެވެ. ނަމަވެސް، ފަހަކަށް އައިސް މާލޭ ސިޓީ ކައުންސިލްގެ ބެލުމުގެ ދަށުގައި ހުރި ބައެއް ބޮޑެތި ބިންތަކާއި މުހިންމު ތަންތަން ސަރުކާރުގެ ވުޒާރާތަކުގެ ދަށަށް ބަދަލުކުރުމުގެ މަސައްކަތް ސަރުކާރުން ދަނީ ކުރަމުންނެވެ.
މީގެ އިތުރުން، އަލަށް އެކުލަވާލި އެއްގަމު ދަތުރުފަތުގެ ގާނޫނާއެކު އުޅަނދުތައް ރަޖިސްޓްރީކުރުމުން ކައުންސިލަށް ލިބެމުންދިޔަ އާމްދަނީ ވެސް ވަނީ ސަރުކާރުގެ ކަމާބެހޭ ވުޒާރާއަށް ބަދަލުކޮށްފައެވެ. އަދި ލާމަރުކަޒީ ގާނޫނަށް އެންމެ ފަހުން ގެނައި އިސްލާހާއެކު ތަރައްގީގެ މަޝްރޫއުތައް ހިންގުމުގެ ނަމުގައި ކައުންސިލްތަކުގެ ބިންތައް ސަރުކާރަށް ނެގޭ ގޮތް ވަނީ ހަދައިފަ އެވެ.
އެ ބިލް ހުށަހެޅުމާއެކު ވެސް އިދިކޮޅު ފަރާތްތަކުން ބުނަމުން ދިޔައީ އެއީ "ބިން ފޭރުމުގެ ގާނޫނު" ކަމަށެވެ.
ސިޓީ ކައުންސިލްގެ ބާރުތައް ސަރުކާރަށް ނަގަމުންދާތީ އިދިކޮޅު ފަރާތްތަކުން ފާޑުކިޔަމުންދާއިރު، މުއިއްޒަކީ ރައީސްކަމަށް ވަޑައިގަތުމުގެ ކުރިން މާލޭ ސިޓީގެ މޭޔަރުކަމުގެ މަގާމުގައި ހުންނެވިއިރު، ކައުންސިލްތަކަށް މާލީ އަދި އިދާރީ ފުރިހަމަ މިނިވަންކަން ދިނުމަށާއި، ކައުންސިލްތަކުގެ ބާރުތައް މަރުކަޒީ ސަރުކާރުން ނުހިފެހެއްޓުމަށް އެމަނިކުފާނު ވަނީ ވަރަށް ބޮޑަށް ވަކާލާތު ކުރައްވާފަ އެވެ. ނަމަވެސް، އެމަނިކުފާނުގެ ވެރިކަމުގައި ކައުންސިލްގެ ބާރުތައް ސަރުކާރަށް ނަގަމުންދާތީ، ލާމަރުކަޒީ ނިޒާމަށް ތާއީދުކުރާ ފަރާތްތަކުން ދަނީ އެކަމާ މެދު ކަންބޮޑުވުން ފާޅުކުރަމުންނެވެ.
