މާލެ ސަރަހައްދަށް ފެނުގެ ހިދުމަތް ދޭ މާލޭ ވޯޓާ އެންޑް ސްވެރޭޖު ކޮމްޕެނީ (އެމްޑަބްލިއުއެސްސީ) ގައި އޮތް ޖަޕާނުގެ ހިޓާޗީ ކުންފުނީގެ ހިއްސާ ސަރުކާރަށް ގަންނަން ނިންމާފައިވާ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
މިހާރު ކުރިއަށްދާ ނޫސްވެރިންގެ ބައްދަލުވުމެއްގައި މުއިއްޒު ވަނީ ސައްތައިން ސައްތަ ދިވެހި ކުންފުންޏަކަށް އެމްޑަބްލިއުއެސްސީ ހެދުމުގެ މަސައްކަތް މިހާރު ފަށާފައިވާ ކަމަށް ވިދާޅުވެފަ އެވެ. އެއީ ރައްޔިތުންނަށް ހިދުމަތް ދިނުމަށް ކުރަން ޖެހިފައިވާ ކަމެއް ކަމަށް މުއިއްޒު ވިދާޅުވި އެވެ.
"ބޭރު ކުންފުންޏަކަށް ވިއްކާލާފައި އޮތް 20 ޕަސެންޓުގެ ޝެއާ ގަނެ 100 ޕަސެންޓު ސަރުކާރު ހިއްސާވާ ކުންފުންޏަކަށް އެމްޑަބްލިއުއެސްސީ ހެދުމަށްޓަކައި ކުރަން ޖެހޭ މަސައްކަތް މިހާރު ވަނީ ފެށިފައި،" ރައީސް މުއިއްޒު ވިދާޅުވި އެވެ.
މިހާރު ސަރުކާރުން ކޮންޓްރޯލް ކުރަނީ އެމްޑަބްލިއުއެސްސީގެ 80 ޕަސެންޓެވެ. ބާކީ 20 ޕަސެންޓު ހިއްސާ ކޮންޓްރޯލް ކުރަނީ ހިޓާޗީންނެވެ. އެ ކުންފުނީގެ ފަރާތުން އެމްޑަބްލިއުއެސްސީގެ ބޯޑުގައި މެންބަރަކު ވެސް އިންނަވަ އެވެ.
ހިޓާޗީއަށް އެމްޑަބްލިއުއެސްސީގެ 20 ޕަސެންޓު ވިއްކާލީ ޖެނުއަރީ 2010، ގައި އޭރު އޮތް އެމްޑީޕީ ސަރުކާރުންނެވެ. އެއީ ހިއްސާއަކަށް 305.9 ޑޮލަރުގެ ރޭޓުން 53،400 ހިއްސާ އެވެ. އެ މުއާމަލާތް އަގުކޮށްފައިވަނީ 16 މިލިއަން ޑޮލަރުގަ އެވެ.
އޭރު ސަރުކާރުން ބުނެފައިވާ ގޮތުގައި ހިއްސާ ވިއްކާލީ 2008 ވަނަ އަހަރުގެ ނިޔަލަށް އެ ކުންފުނީގައި އޮތް ޑެންމާކުގެ އެޗްއޯއެޗް ވޯޓާ ޓެކްނޮލޮޖީގެ ހިއްސާތައް ގަންނަން ސަރުކާރުން ޖެހޭތީ އެވެ. އެމްޑަބްލިއެއެސްސީ 1995 ވަނަ އަހަރު އުފެދިގެން އައިއިރު އެޗްއޯއެޗް ވޯޓާ ޓެކްނޮލޮޖީގެ 24 ޕަސެންޓު ހިއްސާ އޮތެވެ.
