ފާސްކޮށްފައިވާ ޖަބެޓާ އެއްގޮތަށް ފިނޭންސް މިނިސްޓްރީ އިން މާލެ ސިޓީ ކައުންސިލަށް ދޭންޖެހޭ ބްލޮކް ގްރާންޓުން ޖުމްލަ 74 މިލިއަން ރުފިޔާ ކަނޑާލާފައިވާ ކަމަށް މާލެ ސިޓީގެ މޭޔަރު އާދަމް އާޒިމް މިއަދު ވިދާޅުވެއްޖެ އެވެ.
މާލެ ސިޓީ ކައުންސިލުން ބޭއްވި ރަސްމީ ޖަލްސާގައި އާޒިމް ވިދާޅުވީ މިދިޔަ ތިން މަސް ތެރޭގައި މާލެ ސިޓީ ކައުންސިލުގެ ބަޖެޓުން 74 މިލިއަން ރުފިޔާ ކަނޑާލީ ރައްޔިތުންނަށް ދެމުން އަންނަ ހިދުމަތްތަކަށް ބުރޫ އަރުވަން ޖެއްސުން ކުރުމަށް ކަމަށެވެ. ނަމަވެސް ބަޖެޓު ހުރި މިންވަރަކުން ރައްޔިތުންނަށް ހިދުމަތް ދެމުންދާނެ ކަމަށް އޭނާ ވިދާޅުވި އެވެ.
"ބަޖެޓް ކަނޑަމުން މިދަނީ. މިހާރު މިހާތަނަށް މިވީ ތިން މަސް ތެރޭގައި 74 މިލިއަން ރުފިޔާ އަޅުގަނޑުމެންގެ ބަޖެޓުން ކަނޑައިފި އެމީހުން [ސަރުކާރުން]. އެހެންވީމަ ރައްޔިތުންނަށް ބޮޑެތި ހިދުމަތްތަކެއް ދޭ ކައުންސިލަކަށްވާއިރު މި ދަތި ޖައްސަމުންދާ ދިޔުމަކީ ސީދާ ރައްޔިތުންނަށް ކުރި ޖެއްސުމެއް ކަމަށް އަޅުގަނޑު ގަބޫލުކުރަނީ. އަޅުގަނޑުމެން ދެން މިތަނުގައި ބަޖެޓް ހުންނަ ވަރަކުން މަސައްކަތް ކުރަމުންދާނަން،" އާޒިމް ވިދާޅުވި އެވެ.
އާޒިމް ވިދާޅުވީ މާލެ ސިޓީ ކައުންސިލަށް މުވައްޒަފުން ނެގުމަށްވެސް ސަރުކާރުން ދަތިކުރަމުންދާ ކަމަށާއި ސަރުކާރުން އެކަން ކުރަން ފެށީ ގާބިލު މީހުން ކައުންސިލަށް ނެގުމުގެ މަސައްކަތް ކުރަމުންދަނިކޮށް ކަމަށެވެ.
"އަޅުގަނޑުމެންނަށް މުވައްޒަފުން ނެގުމުގެ ދަތިކަމާއި މި ހުރިހާ ކަމެއްގެ ދަތިކަމެއް ޖައްސާތީވެ އަޅުގަނޑުމެންނަށް މަސައްކަތް ކުރަން ދަތިވެފައި މިތިބީ. އެވާހަކަވެސް ތިބޭފުޅުންގެ މައުލޫމާތަށްޓަކައި ހިއްސާކޮށްލަން ބޭނުން އަސްލު. ކެޕަބަލް މީހުން ނަގަންވެގެން މަސައްކަތް ކުރަމުންދަނިކޮށް މި އުނދަގޫތަކެއް މި އަންނަނީ," އާޒިމް ވިދާޅުވި އެވެ.
ދިވެހިރާއްޖޭގެ އާބާދީގެ 42 ޕަސެންޓު ދިރިއުޅޭ މާލޭ ސިޓީގެ މުނިސިޕަލް ހިދުމަތްތައް ހިންގަން އޮންނަ ސިޓީ ކައުންސިލަށް ލިބެންޖެހޭ ބްލޮކް ގްރާންޓް ކަނޑާލީ ދައުލަތުގެ ކުނި އުކާ ކުންފުނި ވެމްކޯއަށް ސިޓީ ކައުންސިލުން ފައިސާތަކެއް ދައްކަންޖެހިފައި އޮތުމުންނެވެ.
މާލެ ސިޓީ ކައުންސިލުގެ ބްލޮކް ގްރާންޓް ކަނޑާލަން ސަރުކާރުން ނިންމުމާ ގުޅިގެން މުވައްޒަފުންނަށް މުސާރަ ދިނުމާއި ރައޔްިތުންނަށް ހިދުމަތްތައް ދޭން ދަތިވާނެ ކަމަށް ބުނެ ފިނޭންސް މިނިސްޓަރު ހަސަން ޒަރީރަށް ކައުންސިލުން ސިޓީއެއްވެސް ފޮނުވި އެވެ.
މީގެއިތުރުން ސަރުކާރުން ވަނީ މާލެ ސިޓީއަށް އާމްދަނީ ލިބޭ ބިންތައް ހިމެނޭ ގޮތަށް ޖުމްލަ 14 ބިމެއް ކައުންސިލް އަތުން އަތުލާފަ އެވެ. އަދި ކައުންސިލަށް އާމްދަނީ ލިބޭ ވެހިކަލް ފީތައްވެސް ކައުންސިލަށް ނުލިބޭ ގޮތަށް ސަރުކާރުން ނިންމައި، ގަވާއިދު އިސްލާހުކުރުމަށްފަހު އެކަން ތަންފީޒުކުރަންވެސް ވަނީ ފަށާފަ އެވެ.
