ސަރުކާރުން މާލެ ސިޓީ ކައުންސިލުގެ އިހުތިސާސުން 14 ބިމެއް ވަކިކުރުމާ ގުޅިގެން، އެ ކައުންސިލުގެ ކުއްލި ޖަލްސާއެއް މިރޭ ބާއްވަން ނިންމައިފި އެވެ.
ސަރުކާރުން އިއްޔެ ކުރި އިއުލާނެއްގައިވާ ގޮތުން، މާލޭގެ އިގްތިސާދީ އަދި އިޖުތިމާއީ ގޮތުން އެންމެ މުހިންމު ސަރަހައްދުތައް ކަމަށްވާ ސަލްޓަން ޕާކާއި، ރަސްފަންނާއި، ކާނިވާ އަދި ތައިސޭ ކޮށި ހިމެނޭހެން ގިނަ ބިންތަކެއް ވަނީ ކައުންސިލުގެ ބާރުގެ ދަށުން ވަކިކޮށްފަ އެވެ.
މި ނިންމުމުގެ ސަބަބުން ކައުންސިލަށް އާމްދަނީ ލިބޭނެ މުހިންމު ވަސީލަތްތަކެއް ގެއްލި، ލާމަރުކަޒީ ނިޒާމަށް ބޮޑެތި ގޮންޖެހުންތަކެއް ކުރިމަތިވެފައިވާތީ ކައުންސިލުން ވަނީ ކަންބޮޑުވުން ފާޅުކޮށްފަ އެވެ.
މާލެ ސިޓީ ކައުންސިލުގެ އިހުތިސާސުން މި ބިންތައް ވަކިކޮށްފައި ވަނީ ލާމަރުކަޒީ ގާނޫނަށް ސަރުކާރުގެ ފުލް ކޮންޓްރޯލް އޮންނަ މަޖިލީހުން އެންމެ ފަހުން ގެނައި އިސްލާހުގެ ދަށުންނެވެ.
މާލޭ ސިޓީ ކައުންސިލުގެ އިހުތިސާސުގައި ހުރި މުހިންމު ހުރިހާ ބިމެއް ސަރުކާރަށް ނަގައިފި
އެ ބިންތައް ކައުންސިލުގެ އިހްތިސާސުން ވަކި ކުރިކަން އަންގައި ހައުސިން މިނިސްޓްރީ އިން ވަނީ އިއުލާނެއް ގެޒެޓުކޮށްފަ އެވެ. އެ އިއުލާނުގައި ބުނެފައި ވަނީ އެ ބިންތައް ވަކި ކުރީ ލާމަރުކަޒީ ގާނޫނަށް ސަރުކާރުގެ ފުލް ކޮންޓްރޯލް އޮންނަ މަޖިލީހުން އެންމެ ފަހުން ގެނައި އިސްލާހުގެ ދަށުން ކަމަށެވެ.
އެ ގާނޫނުގެ 2-56 ވަނަ މާއްދާއާ ހަވާލާދީ ސަރުކާރުން ބުނެފައިވަނީ، ކައުންސިލެއްގެ އިހްތިސާސުގައި އޮންނަ ބިމެއްގައި ތަރައްގީގެ މަޝްރޫއެއް ހިންގަން ބޭނުންވެއްޖެ ނަމަ، ވަޒީރުންގެ މަޖިލީހުގެ ނިންމުމަކުން އެ ބިމެއް ވަކިކުރެވިދާނެ ކަމަށެވެ.
ސަރުކާރުގެ އިއުލާނުގައި ބުނެފައިވާ ގޮތުގައި މި ބިންތައް ނެގީ މާލެ އާއި ވިލިމާލޭގެ އާބާދީއަށް ބޭނުންވާ އުމްރާނީ ތަރައްގީގެ މަސައްކަތްތަކާއި އިންފްރާސްޓްރަކްޗާ ހިދުމަތްތައް ތަރައްގީކޮށް ބެލެހެއްޓުމަށެވެ. ނަމަވެސް، ވަކިކުރި ބައެއް ބިންތަކުގައި އެއްވެސް މަޝްރޫއެއް މިހާތަނަށް އިއުލާނެއް ނުކުރެ އެވެ.
މާލޭ ސިޓީ ކައުންސިލުން ވަކި ކުރި ބިންތައް
- ސަލްޓަން ޕާކު (އީ-ސްޕޯޓިން އެރީނާ އަދި މިއުޒިއަމް ޕާކެއް)
- ރަސްފަންނު (އިތުރު ކަމެއް ނުކުރޭ)
- މަސް މާރުކޭޓު އަޅަން ހިއްކި ސަރަހައްދު (ވެޓް މާކެޓެއް)
- ތައިސޭ ކޮށި (މަސައްކަތްތެރިންގެ ވަގުތީ އެކޮމޮޑޭޝަން ބްލޮކެއް)
- މަސް މާރުކޭޓު (އޮފީސް އަދި ކޮމާޝަލް އިމާރާތެއް)
- މަސްވެރިންގެ މައިޒާން (ޕަމްޕު ސްޓޭޝަނެއް / މިހާރު ވެސް އެބަހުރި)
- ލޯކަލް މާރުކޭޓު (މިކްސް ޔޫސްޑް ކޮމާޝަލް އިމާރާތެއް)
- ކާނިވާ (ރެކްރިއޭޝަން އަދި ކޮމާޝަލް އިމާރާތެއް)
- އާޓިފިޝަލް ބީޗު (އަޕްގްރޭޑްކޮށް އިތުރު ތަންތަން ހެދުން)
- ޕޭ ޓޮއިލެޓް ނަންބަރު 2 (ޕަބްލިކް ރެސްޓްރޫމް އަދި އިތުރު ފެސިލިޓީތައް)
- ވިލާ ހަކަތައިން ބޭނުން ކުރި ޕެޓްރޯލް ޝެޑް (އިލެކްޓްރިކް ވެހިކަލް ޗާގިން ސްޓޭޝަނެއް)
- ބޮންޑިބަތް ޕާކު (ޕާކިން ބިލްޑިންގެއް އަދި މިކްސް ޔޫސްޑް ކޮމާޝަލް އިމާރާތެއް)
- ގައުމީ ކުތުބުހާނާއަށް ދީފައި އޮތް ބިން (ކުޑަކުދިންގެ އެކްޓިވީ ސެންޓަރެއް އަދި ޑޭކެއާ ސެންޓަރެއް)
- މާލޭ ސިޓީ ކައުންސިލުގެ އެކޮމޮޑޭޝަން ބިން (ލޭބާ ރިލޭޝަންސްގެ އެކޮމޮޑޭޝަން)
މި މައްސަލައިގައި ސަރުކާރަށް ފާޑުވިދާޅުވަމުން މާލޭގެ މޭޔަރު އާދަމް އާޒިމް ވިދާޅުވީ، ލާމަރުކަޒީ ނިޒާމަކީ ރައްޔިތުން ބާރުވެރިކުރުވުމަށް އޮތް ނިޒާމެއް ކަމަށެވެ. ނަމަވެސް ރައީސް މުހައްމަދު މުއިއްޒުގެ ސަރުކާރުން ކައުންސިލްތަކުގެ ބިންތަކާއި ބަޖެޓު ފަދަ މުހިންމު ވަސީލަތްތައް އަތުލަމުންދާ ކަމަށް އޭނާ ވިދާޅުވި އެވެ.
މިއީ ގާނޫނުއަސާސީން ކައުންސިލްތަކަށް މަތިކޮށްފައިވާ ޒިންމާތައް އަދާކުރުމަށް އެޅޭ ހުރަހެއް ކަމަށާއި، މީގެ ސަބަބުން ނިޒާމުގެ މުސްތަގުބަލާ މެދު ސީރިއަސް ސުވާލުތަކެއް އުފެދޭ ކަމަށް ވެސް އާޒިމް ވިދާޅުވި އެވެ. އަދި، އެމްޑީޕީން އަލުން ވެރިކަމަށް އަންނަ ދުވަހަކުން، ކައުންސިލްތަކުގެ ކިބައިން އަތުލާފައިވާ ހުރިހާ ހައްގުތަކާއި ވަސީލަތްތައް އިއާދަކޮށްދޭނެ ކަމަށް ވެސް މޭޔަރު ވައުދުވެވަޑައިގަތެވެ.
ސަރުކާރުން ކައުންސިލްގެ 14 ބިން އަތުލުމުން މޭޔަރު އަޒީމް ފާޑުވިދާޅުވެއްޖެ
މާލެ ސިޓީ ކައުންސިލްގެ ބެލުމުގެ ދަށުގައި ހުރި 14 ބިމެއް ސަރުކާރަށް ނެގުމާ ގުޅިގެން، މޭޔަރު އާދަމް އަޒީމް ވަނީ އެއީ ލާމަރުކަޒީ ނިޒާމަށް ހުރަސްއެޅޭ ކަމެއް ކަމަށް ވިދާޅުވެ ސަރުކާރަށް ވަރަށް ބޮޑަށް ފާޑުވިދާޅުވެފައެވެ. ސަރުކާރުން މި ބިންތައް ނަގަނީ ތަރައްގީގެ މަޝްރޫއުތައް ހިންގުމަށް ކަމަށް ބުނާއިރު، މޭޔަރު ވިދާޅުވީ މިއީ ކައުންސިލްތަކުގެ ބާރުތަކާއި ވަސީލަތްތައް އަތުލައި ރައްޔިތުންނަށް ދޭ ހިދުމަތްތަކަށް އެޅޭ ހުރަހެއް ކަމަށެވެ.
މާލެ ސިޓީ ކައުންސިލާއި ސަރުކާރާ ދެމެދު އޮތް ގުޅުން ގޯސްވެފައި ވަނީ ހަމައެކަނި ބިންތަކުގެ މައްސަލައިގައެއް ނޫނެވެ. އުޅަނދުފަހަރުގެ ފީން ކައުންސިލަށް ލިބޭ އާމްދަނީ ހުއްޓުމާއި، މުނިސިޕަލް ހިދުމަތްތަކުގެ ބާރުތައް ކުޑަކުރުމުގެ ސަބަބުން ކައުންސިލް ހިންގުމަށް ވަނީ ބޮޑެތި ދަތިތަކެއް ކުރިމަތިވެފައިވާ ކަމަށް އެ ކައުންސިލުން އަންނަނީ ބުނަމުންނެވެ.
އެންމެ ފަހުން ބޭއްވި ލޯކަލް ކައުންސިލް އިންތިހާބުގައި ސަރުކާރު ހިންގާ ޕީއެންސީގެ ކެނޑިޑޭޓުންނަށް ލިބުނު ބޮޑު ނާކާމިޔާބީއާއެކީ، މާލެ ސިޓީ ކައުންސިލުގެ 18 ގޮނޑީގެ ތެރެއިން 16 ގޮނޑި ކާމިޔާބުކުރީ އިދިކޮޅު އެމްޑީޕީންނެވެ.
