މާލެ ސިޓީ ކައުންސިލްގެ ބެލުމުގެ ދަށުގައި ހުރި 14 ބިމެއް ސަރުކާރަށް ނެގުމަށް ނިންމީ އެތަންތަނުގައި ހިންގަން ބޭނުންވާ މަޝްރޫއުތައް ނުހިންގި ދިގުލައިގެންދާތީ ކަމަށް ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) ވިދާޅުވެއްޖެ އެވެ.
މުންދު "ސަން" އަށް ދެއްވި އިންޓަވިއުއެއްގައި ވިދާޅުވީ ކައުންސިލްގެ ބިންތައް އަތުލަން ނިންމީ އެ ބިންތަކުގައި ވަކި ތާރީހަކަށް ނިންމަން ކަނޑައަޅާފައި އޮތް މަޝްރޫއުތައް ނުހިންގި، ކައުންސިލްގެ ފަރާތުން އެއްބާރުލުން ނުލިބިގެން ކަމަށެވެ.
"މަސައްކަތްތައް ފަށަން ނުފެށި އެ ބޭފުޅުންނާ [މާލެ ސިޓީ ކައުންސިލާ] ހެދި އެބަހުރި، ބައެއް ކަންތައްތައް އެ ބޭފުޅުންނާ ހެދި ލަސްވެފަ އެބަހުރި. މިސާލަކަށް މާރުކޭޓު ކަންތައްތަކުގައި ރައީސް ބޭނުންފުޅުވި އެންމެ ފުރަތަމަ ރޭވި ތާރީޚަކަށް ނުވެސް ނިންމޭ އެ ބޭފުޅުންނާ ހެދި،" އޭނާ ވިދާޅުވެފައިވެ އެވެ.
އުމްރާނީ ތަރައްގީގެ މަސައްކަތްތައް ހިންގުމަށް ކަމަށް ބުނެ މާލެ ސިޓީ ކައުންސިލުން ބިންތައް އަތުލި މައްސަލަ އެ ކައުންސިލުން ކޯޓަށް ވައްދަން ވަނީ ނިންމާފަ އެވެ.
މާލޭ ސިޓީ ކައުންސިލުން ވަކި ކުރި ބިންތައް:
- ސަލްޓަން ޕާކު (އީ-ސްޕޯޓިން އެރީނާ އަދި މިއުޒިއަމް ޕާކެއް)
- ރަސްފަންނު (އިތުރު ކަމެއް ނުކުރޭ)
- މަސް މާރުކޭޓު އަޅަން ހިއްކި ސަރަހައްދު (ވެޓް މާކެޓެއް)
- ތައިސޭ ކޮށި (މަސައްކަތްތެރިންގެ ވަގުތީ އެކޮމޮޑޭޝަން ބްލޮކެއް)
- މަސް މާރުކޭޓު (އޮފީސް އަދި ކޮމާޝަލް އިމާރާތެއް)
- މަސްވެރިންގެ މައިޒާން (ޕަމްޕު ސްޓޭޝަނެއް)
- ލޯކަލް މާރުކޭޓު (މިކްސް ޔޫސްޑް ކޮމާޝަލް އިމާރާތެއް)
- ކާނިވާ (ރެކްރިއޭޝަން އަދި ކޮމާޝަލް އިމާރާތެއް)
- އާޓިފިޝަލް ބީޗު (އަޕްގްރޭޑްކޮށް އިތުރު ތަންތަން ހެދުން)
- ޕޭ ޓޮއިލެޓް ނަންބަރު 2 (ޕަބްލިކް ރެސްޓްރޫމް އަދި އިތުރު ފެސިލިޓީތައް)
- ވިލާ ހަކަތައިން ބޭނުން ކުރި ޕެޓްރޯލް ޝެޑް (އިލެކްޓްރިކް ވެހިކަލް ޗާގިން ސްޓޭޝަނެއް)
- ބޮންޑިބަތް ޕާކު (ޕާކިން ބިލްޑިންގެއް އަދި މިކްސް ޔޫސްޑް ކޮމާޝަލް އިމާރާތެއް)
- ގައުމީ ކުތުބުހާނާއަށް ދީފައި އޮތް ބިން (ކުޑަކުދިންގެ އެކްޓިވީ ސެންޓަރެއް އަދި ޑޭކެއާ ސެންޓަރެއް)
- މާލޭ ސިޓީ ކައުންސިލުގެ އެކޮމޮޑޭޝަން ބިން (ލޭބާ ރިލޭޝަންސްގެ އެކޮމޮޑޭޝަން)
މި ބިންތައް ސަރުކާރަށް ނެގުމުގެ ފުރުސަތު ލިބުނީ މިދިޔަ މަހު ލާމަރުކަޒީ ގާނޫނަށް ގެނައި އިސްލާހަކާ ގުޅިގެންނެވެ. އެ އިސްލާހުގައިވާ ގޮތުން ކެބިނެޓުން ނިންމައިފި ނަމަ، ތަރައްގީގެ މަޝްރޫއުތަކަށް ރަށްރަށުގެ ބިންތައް ސަރުކާރަށް ނެގުމުގެ ބާރު ލިބިގެންވެ އެވެ.
މޭޔަރު އާޒިމް ވިދާޅުވީ އެމްޑީޕީން އަލުން ވެރިކަމަށް އަންނަ ދުވަހަކުން، ކައުންސިލްތަކުގެ ކިބައިން އަތުލާފައިވާ ހުރިހާ ހައްގުތަކާއި ވަސީލަތްތައް އިއާދަކޮށްދޭނެ ކަމަށެވެ. އަދި ކައުންސިލްތަކަށް މިހާރަށްވުރެ ބޮޑެތި ބާރުތަކާއި މިނިވަންކަން ދޭނެ ކަމަށްވެސް އޭނާ ވައުދުވެވަޑައިގަތެވެ.
މާލެ ސިޓީ ކައުންސިލާއި ސަރުކާރާ ދެމެދު އޮތް ގުޅުން ގޯސްވެފައިވަނީ ހަމައެކަނި ބިންތަކުގެ މައްސަލައިގައެއް ނޫނެވެ. މިދިޔަ ސެޕްޓެމްބަރު މަހު އެއްގަމު ދަތުރުފަތުރުގެ ގާނޫނަށް ގެނައި ބަދަލުތަކުގެ ސަބަބުން އުޅަނދުފަހަރުގެ ފީން ކައުންސިލަށް ލިބޭ އާމްދަނީ ހުއްޓިފައިވާއިރު، މާލެ ސިޓީ ކައުންސިލްގެ ގްރާންޓުން ބޮޑުބައެއް ވެސް ކަނޑާލާފައިވެ އެވެ.
