އިސްރާއީލަށް ދަތުރުކުރި ފްލައިދުބާއީގެ ބޯޓެއްގެ ކޮންޓްރޯލް ހޯދައި، އެ ބޯޓު ވައްޓާލަން ކޯޕައިލެޓަކު މަސައްކަތް ކުރި ހާދިސާއާ ގުޅިގެން، އެ ފްލައިޓް ފުރުމުގެ ކުރިން އޭގެ ފަސިންޖަރުންނާއި ފަޅުވެރިންގެ ލިސްޓު ޔުނައިޓެޑް އަރަބް އެމިރޭޓްސް (ޔޫއޭއީ) އިން އިސްރާއީލާ ހިއްސާކޮށްފައިވާ ކަމަށް ސަރަހައްދީ އޮފިޝަލުން އާދީއްތަ ދުވަހު ބުނެފި އެވެ.
މިކަމާ ގުޅިގެން، ހަމަލާދޭން އުޅުނު މީހާ ސަލާމަތީ ފިޔަވަޅުތަކުގެ ތެރެއިން ދެނެގަނެވިފައި ނުވަނީ ކީއްވެގެންތޯ ވަނީ ސުވާލު އުފެދިފަ އެވެ.
މި ހާދިސާގެ ތަހުގީގު ކުރިއަށްދާއިރު، މިހާތަނަށް ލިބިފައިވާ މައުލޫމާތުތަކުން ސަލާމަތީ ގޮތުން ބޮޑެތި އިހުމާލުތަކެއް ވެފައިވާކަން ވަނީ ހާމަވެފަ އެވެ. އޮފިޝަލުން ވިދާޅުވި ގޮތުގައި، އެ ބޯޓުގެ ކޯ-ޕައިލެޓަކަށް ހުރި އޮމާންގެ ރައްޔިތަކީ ހަރުކަށި ފިކުރު ގެންގުޅޭ ކަމުގެ ކަންބޮޑުވުން އޮތުމުން، އޭނާގެ އަމިއްލަ ގައުމުގައި އުދުހުން މަނާކޮށްފައިވާ މީހެކެވެ.
މީގެ އިތުރުން، އިސްރާއީލާ އެކު ސިޔާސީ ގުޅުން ނޯންނަ އޮމާންގެ ރައްޔިތަކަށް، އިސްރާއީލު މީހުން ގޮވައިގެން ތެލް އަވީވަށް ދަތުރުކުރި ބޯޓެއްގެ ފްލައިޓް އޮޕަރޭޝަނުގައި ބައިވެރިވުމުގެ ހުއްދަ ލިބުނު ގޮތެއް ވެސް އަދި ސާފެއް ނުވެ އެވެ.
މި ތަހުގީގު އިސްކޮށް ހިންގަމުންދާ ޔޫއޭއީން ބުނި ގޮތުގައި، މިދިޔަ ބުދަ ދުވަހު ހިނގި މި "ޓެރަރިސްޓް ހަމަލާ" ގައި ކޯ-ޕައިލެޓް ވަނީ ކޮކްޕިޓްގައި އޮންނަ ކުއްލި ހާލަތްތަކުގައި ބޭނުންކުރާ ކޯރާޑި ބޭނުންކޮށްގެން ބޯޓުގެ ކެޕްޓަނަށް ހަމަލާދީފަ އެވެ. އަދި ބޯޓު ވައްޓާލުމަށް އޭނާ މަސައްކަތް ކުރި އެވެ. އޭނާގެ މި އަމަލުގެ ސަބަބުން 182 މީހުންނާއެކު ދަތުރުކުރި އެ ބޯޓު ވެއްޓެން ދަނިކޮށް، އިންޑިއާގެ ކެޕްޓަން ކޮކްޕިޓްގެ ދޮރު ހުޅުވުމުން ފަސިންޖަރުންނާއި އެހެން މީހުން ވަދެ ހަމަލާދިން މީހާ ވަނީ ހިފަހައްޓާފަ އެވެ.
ސަރަހައްދީ އޮފިޝަލުން ބުނި ގޮތުގައި، އެމިރޭޓްސްގެ ކަމާބެހޭ ފަރާތްތަކުން ވަނީ ފަސިންޖަރުންނާއި ފަޅުވެރިންގެ ގައުމު ހިމެނޭހެން ހުރިހާ މައުލޫމާތެއް އިސްރާއީލާ ހިއްސާކޮށްފަ އެވެ. ނަމަވެސް، އެއްވެސް ފަސިންޖަރަކާ ނުވަތަ ފަޅުވެރިއަކާ މެދު އިސްރާއީލުން ކަންބޮޑުވުމެއް ފާޅުކޮށްފައެއް ނުވެ އެވެ. މި މައުލޫމާތު ދިން އޮފިޝަލުން ވާހަކަ ދެއްކެވީ، ތަހުގީގާ ގުޅޭ ގޮތުން މީޑިއާއަށް މައުލޫމާތު ދިނުމުގެ ހުއްދަ ނެތުމުން ނަން ހާމަނުކުރާ ގޮތަށެވެ.
މި ހަމަލާ ހުއްޓުވައި، ބޯޓުގެ ކޮންޓްރޯލް އަލުން ހޯދުމަށް އެހީތެރިވި ފަސިންޖަރުންނަށް އިސްރާއީލުގައި ވަނީ ބަތަލުންގެ ދަރަޖަ ދީފަ އެވެ.
ނަމަވެސް، ބޮޑު ކާރިސާއަކަށް މަގުފަހިވެގެން ދިޔަ ސަލާމަތީ އިހުމާލުތަކާ ގުޅޭގޮތުން އޮފިޝަލުން މިހާރު ވަނީ އުނދަގޫ ސުވާލުތަކެއް އުފައްދައި، ތުހުމަތުތައް ކުރަން ފަށާފަ އެވެ.
އިސްރާއީލުގެ ދާޚިލީ ސަލާމަތީ އިދާރާ، ޝިން ބެޓް އިން ބުނި ގޮތުގައި ބޭރުގެ ފްލައިޓްތަކުގެ ފަސިންޖަރުންގެ ލިސްޓުތައް ޗެކްކުރުމުގެ ޒިންމާ އޮންނަނީ އެ ގައުމުގެ ޓްރާންސްޕޯޓް މިނިސްޓްރީ އަށެވެ. ނަމަވެސް ޓްރާންސްޕޯޓް މިނިސްޓަރު މިރީ ރެގޭވް އިސްރާއީލުގެ ދައުލަތުގެ މީޑިއާ "ކާން" އަށް ވިދާޅުވީ، ފްލައިޓްތަކުގެ ސަލާމަތީ ކަންކަން ބެލެހެއްޓުމަކީ ސަލާމަތީ އިދާރާތަކުގެ ޒިންމާއެއް ކަމަށާއި، އޭނާގެ މިނިސްޓްރީއަށް ފަސިންޖަރުންގެ ލިސްޓެއް ނުވަތަ އެއްވެސް އިންޒާރެއް ލިބިފައި ނުވާ ކަމަށެވެ.
ބޮޑުވަޒީރު ބެންޖަމިން ނަތަންޔާހޫ ބުރާސްފަތި ދުވަހު ވިދާޅުވީ، އިސްރާއީލާ އެކު ސިޔާސީ ގުޅުން ނޯންނަ ގައުމުތަކުގެ ރައްޔިތުން ޕައިލެޓުންގެ ގޮތުގައި އެ ގައުމަށް ދަތުރުކުރުން ހުއްޓުވުމަށް ބޭރުގެ އެއާލައިންތަކާ އެކު ގިނަ ދުވަސްވީ އެއްބަސްވުންތަކެއް އިސްރާއީލުން ގާއިމުކޮށްފައިވާ ކަމަށެވެ.
އިސްރާއީލާއި ޔޫއޭއީއާ ދެމެދު ދަތުރުތައް ކުރާ އެމިރޭޓްސްގެ ބަޖެޓް އެއާލައިން، ފްލައިދުބާއީއަށް މި އޮމާންގެ ޕައިލެޓަކީ ސަލާމަތީ ނުރައްކަލެއްކަން ދެނެގަނެވިފައި ނުވަނީ ކީއްވެގެންކަން ވެސް އަދި އޮތީ ސާފުނުވެ އެވެ.
