ޒަޔަނިސްޓް ފިކުރަކީ ނަސްލީ ތަފާތުކުރުމުގެ ބާވަތެއް ކަމަށް އިނގިރޭސި ގްރީން ޕާޓީއިން ކަނޑައަޅައި ގަރާރެއް ފާސްކުރުމާ ގުޅިގެން، އެ ޕާޓީގެ ލީޑަރު ޒެކް ޕޮލާންސްކީ އިޒްރޭލަށް އެތެރެވުން މަނާކޮށްފި އެވެ.
އިޒްރޭލުގެ ފޮރިން މިނިސްޓްރީން ބުނި ގޮތުގައި ގްރީން ޕާޓީން ފާސްކުރި މި ގަރާރަކީ "ޔަހޫދީންނާ ދެކޮޅު ސާފު އަމަލެއް" ކަމަށާއި، މިއީ ސިޔާސީ ގޮތުން ބަހުސްކުރެވޭނެ މިންގަނޑުތަކުން ބޭރުވެފައިވާ ކަމެއް ކަމަށެވެ.
މިދިޔަ އާދީއްތަ ދުވަހު ނެގި މި ވޯޓުގައި ޕޮލާންސްކީ ބައިވެރިވެފައެއް ނުވެ އެވެ. ގްރީން ޕާޓީގެ އިސްވެރިންގެ މެދުގައި ޚިޔާލުތަފާތުވުން އުފެދިފައިވާ މި ގަރާރުގައި ޒަޔަނިސްޓް ފިކުރު ސިފަކޮށްފައިވަނީ، ވަކި ނަސްލަކަށް ނިސްބަތްވާ ޔަހޫދީ ދައުލަތަކަށް ތާއީދުކުރާ ފިކުރެއްގެ ގޮތުގަ އެވެ. އަދި ތާރީޚީ ފަލަސްތީނުގެ ހުރިހާ ބިމެއް ހިމެނޭ ގޮތަށް، ޑިމޮކްރެޓިކް ފަލަސްތީނުގެ ދައުލަތެއް ގާއިމުކުރުމަށް ވެސް މި ގަރާރުގައި ބާރުއަޅާފައިވެ އެވެ.
ޔަހޫދީ ބައެއް ޖަމާއަތްތަކުން މި ގަރާރަށް ފާޑުކިޔަމުން ބުނެފައިވަނީ، މިއީ "ޔަހޫދީ މުޖުތަމައަށް ދިން ހަމަލާއެއް" ކަމަށެވެ.
ބޯޑް އޮފް ޑެޕިއުޓީޒް އޮފް ބްރިޓިޝް ޖޫސް އާއި ޖޫވިޝް ލީޑަޝިޕް ކައުންސިލުން ނެރުނު ބަޔާނެއްގައި ބުނެފައިވަނީ، ޒަޔަނިޒަމަކީ ނަސްލީ ތަފާތުކުރުމާ ދެކޮޅު ފިކުރެއް ކަމަށާއި، އެއީ އެތައް ހާސް އަހަރެއްގެ އަނިޔާވެރިކަމަށް ފަހު ޔަހޫދީންގެ ކާބަފައިންގެ ބިމުގައި އެމީހުންނަށް ރައްކާތެރިކަން ހޯދައިދިނުމަށް އުފެދުނު ފިކުރެއް ކަމަށެވެ.
އެ ބަޔާނުގައި އިތުރަށް ބުނެފައިވަނީ، އިނގިރޭސިވިލާތުގެ ގިނަ އަދަދެއްގެ ޔަހޫދީންނާއި ޔަހޫދީ މުއައްސަސާތަކަކީ "ނަސްލީ ތަފާތުކުރުން ގެންގުޅޭ ބައެއް" ކަމަށް ބުނުމަކީ ޔަހޫދީންނާ މެދު ނަފުރަތު އުފެދޭނެ ކަމެއް ކަމަށެވެ.
އިޒްރޭލުގެ ފޮރިން މިނިސްޓްރީން ބުނި ގޮތުގައި ގްރީން ޕާޓީން ފާސްކުރި މި ގަރާރަކީ "އިނގިރޭސިވިލާތުގެ ތާރީޚުގައި ޖެހުނު ކަޅު ސިއްކައެއް" ކަމަށެވެ.
މި މައްސަލައިގައި ގްރީން ޕާޓީގެ ދެ ޑެޕިއުޓީ ލީޑަރުންގެ މެދުގައި ވެސް ވަނީ ޚިޔާލުތަފާތުވުން އުފެދިފަ އެވެ. އެގޮތުން މޯތިން އަލީ މި ގަރާރަށް ތާއީދުކުރެއްވި ނަމަވެސް، ރޭޗަލް މިލްވާޑް ވިދާޅުވީ ގަރާރުގައި ބޭނުންކޮށްފައިވާ ބައެއް ބަސްމަގާމެދު ސުވާލު އުފެދޭ ކަމަށެވެ.
ނަމަވެސް އެކްޓިވިސްޓުން ހުށަހެޅި މި ގަރާރު ފާސްވެފައި ވަނީ 1022 ވޯޓުންނެވެ. އެއާ ދެކޮޅަށް ވޯޓު ދިނީ 813 މީހުންނެވެ. މިދިޔަ ހުކުރު ދުވަހު ޕާޓީގެ ލީޑަރު ޕޮލާންސްކީ ވިދާޅުވީ ޒަޔަނިސްޓު ފިކުރަކީ ފަލަސްތީނު ރައްޔިތުން އެ މީހުންގެ ބިމުން ބޭރުކުރުން ކަމުގައިވާ ނަމަ، އެއީ "ރޭސިސްޓް" ފިކުރެއް ކަމަށެވެ.
